برلمان القلب

أناأُطالـب برلمـان القـلـب تحـديـد المصـيـر
روحي إجمعي نـوّاب قلبـك ثـم بعديـن اطلبـي

روحي إجمعي نبضك وشريانك ورى الضلع القصير
وقلبك رئيس الجلسه وشوفيه ويـش اللـي يبـي ؟

واتخذوا آراكـم وثـم أعطونـي الـراي الأخيـر
خلاص أنا ما عدت أطيق .. أما بلا .. ولا ارحبـي

أنا أبدلـي بالشهـاده كيـف مـا صـارت تصيـر
واخلّي الدعـوى تصيـر أمـا حبـي .. ولا دبـي

بقول كل اللـي أعرفـه عنـك يـا وجـه العبيـر
وان العطور اصـورّ منّـك يـا غـلاي ومكسبـي

منتي قصيده قلتهـا أشكـي مـن الوضـع المريـر
ومنتي قصيـده قلتهـا مـن شـان أكشّـخ مكتبـي

أنتي قصيده غير .. فعلاً لنّـك أنتـي غيـر غيـر
لاجيـت أبكتبهـا أشـب النـار وآزيـد إحطـبـي

ما قالها ذاك الفرزدق .. لا .. ولا مـرّت جريـر
ولا شواعيـر الـثـراث اليعـربـي والأجنـبـي

وما قالها أخطل صغير .. ولو طلع أخطل كبيـر!!
ماهمنـي بالشعـر انـا اتـعـب 1500 صـبـي

أشيل حمل جمـال مانـي بشايـل ٍ حمـل البعيـر
لجل عيـون اللـي لهـا نظـرات تسبينـي سبـي

في هجرها .. أسير حافي من على الرمضا أسيـر
والشمس فوقي .. والعجـاج يحوفنـي زاد تعبـي

وفي وصلها .. كني على أطراف ضفّـات الغديـر
أشرب من الما وارتوي .. وانسى عـذاب معذّبـي

وبغيابها .. كني عصـاة شويّـب ٍ مبطـي ضريـر
مغير يكمخ بي من الجـدران مـوّت لـي عصبـي

وحظورها.. مثل البشاره مـن بعـد عـودة أسيـر
بعيـون أمـه لا حضنهـا وقـال يالـروح إقربـي

أحلـم بهـا مثـل الغنـى بعيـون رجـال ٍ فقيـر
وأحلم بها حلم العقيم إن شـاف لـه طفـل يحبـي

أنا أبيها لـو علـى خبـزه وتفـرش لـي حصيـر
وش ليّه بحمـر النعـم عنـدي هـواي ومشربـي

من فمّها شهـد ٍ مصفّـى والشعـر مثـل الحريـر
جفول محـد ٍ ناشهـا تجفـل مثـل طبـع الظبـي

لا من مشت كل الورود إتموت مـن حسـن ٍ يُثيـر
إتموت غيره من حدود الشـرق .. ليـن المغربـي

لو تطلب إني آتنازل عـن ذكائـي .. قلـت خيـر
أبا آتغابـا لجـل خاطرهـا واصيـر أغبـى غبـي

الحب ما يعرف صغير وما عـرف يحشـم كبيـر
متسـاوي ٍ بالحـب قـدر العبـد والحـر الأبــي

والحين كانك ما اقتنعتي .. ما ابـي كـل المصيـر
وإذا اقتنعتي .. أقـدر آقـول ابجـراءه (اطلبـي)


وسلامتكم

مع فائق الاحترام والتقدير لمن مر هنا