يا بنت انا قلبي من الحب ممنـوع
يكفيه من قبلك هوى جافـي ٍ بـاع
شيّدت له قصر ٍ من الـود مرفـوع
وارسلت له قلبي في الوصل طمـاع
يآمر على قلبي و يآجيـه بالطـوع
واليا طلب غيره من الناس ما طاع
في عيني آشوف الخطا منه مشفوع
لو خالف بفعله نواميـس و طبـاع
و اليا تلاقينا على غيـر موضـوع
ضيعت كل اللي بليّـاه مـا ضـاع
ادناي لا منّـه دنـى فـزّ مفـزوع
واقصاي لا منّـي تعزويـت فـزّاع
و بداخلي صوت الهواجيس مسموع
بير ٍ تناهش به ثعابيـن و سبـاع
لو يطلب عيوني بعد حبّـة الكـوع
قدمت له عيني على حـبّ الاكـواع
كنت احسب اني به نهايات مجموع
وانّ العمر قبله تهاويـل و اوجـاع
و اثر العيون اللي بها الزين مزروع
بالسحر محفوفه نواعيس و وسـاع
من نونها طبع المحبيـن منـزوع
و برمشها كذبه و تزوير و خـداع
كم عاشق ٍ قبلي بها بات موجـوع
كم روّعت قلب ٍ بفرقـاه و ارتـاع
تسقيه من سم ٍ في الكاس منقـوع
و تداوي جروحه بتعويـذ وايقـاع
ما مسّه الجني و لاهوب مصـروع
لكنهـا تفتـح لعلـتْـه مـصـراع
واصبح لها تابع و قد كان متبـوع
ترفعْه للنجمـه و ترميـه بالقـاع
و آنا لو ادري بالهوى ذلّ و خضوع
ماظنّي ارضى به و لا القلب ينصاع
نفسي لها نزله على الذلّ و طلـوع
ما تقبله نفسي من ايـام الارضـاع
لي مرقب ٍ فوق المراقيب و ربـوع
به سلوتي لا مـن تمنيـت مربـاع
تحداني النجمه من الشرق بهجـوع
وارخي لها كف ٍ من العز ما جـاع
ما ينثني عزمي عن ايّات مشـروع
لا صارت الهمّه مجاديف و شـراع
و الحين انا قلبي من الحب ممنـوع
شوفي لك انسان ٍ على الحب ملتاع
وسلامتكم
مع فائق الاحترام والتقدير لمن مر هنا
الإهداءات
المواضيع المتشابهه
شــوفي لك انســان على الحـب مـلتــاع..
جميلة الصدفة اللي جابتك حي الهوا والنور
العرض العادي
