"" بآقـي على شفـتك روجّ ""

ياعين مـن حطيـت عينـي بعينـه
وابطيت واقف في بحر عينـه أمـوج

ابحرت فـي عينـه بليـا .. سفينـه
سجيت فيهـا ليـن ضيعنـي المـوج

حاولت .. ألد الشـوف عمـا يهينـه
ولا انتبهـت الا وانـا فيـه ملبـوج

شفت الفتـن فـي ملتقـى حاجبينـه
السحر في عينه مع الزيـن مدمـوج

اسـود سـواده لابستـه السكيـنـه
وابيض بياضه طايش اللون مرجـوج

زاويـه طـرف ٍ حاجـز ٍ دمعتيـنـه
لولاه كـان الخـد بالكحـل ممـزوج

كاسيـه رمـش ٍ زاد ملحـه وزينـه
من فوق متكحل ومن تحـت مدعـوج

بين الرموش السود شفـت الغبينـه
واللي رماه الرمش ماعاد لـه بـوج

مـرت ثوانـي مـن حياتـي ثمينـه
وانا اتهـادى بيـن الاشـواق وأدوج

مرت وانـا قابـض علـى راحتينـه
واقف مقابل لـه وساهـي ومدلـوج

مدري وش اللي صار بينـي وبينـه
والقلـب ماردنـه ضلوعـي العـوج

ولا انتبهـت الا بسحـبـت يديـنـه
قال انت تبغى الناس تلحقني هـروج

قلت اعـذر اللـي شافـك الله يعينـه
يبطي ودمعه بعـد فرقـاك مزعـوج

عينك بنظـرات الغـلا مستهينـه ؟؟
قال الغلا في داخـل القلـب منسـوج

قلت الوعد قال ايه .. كل شيء بحينه
الله يفتح لـك مـن الضيقـة فجـوج

قلت آآآه .. طيب شف لي الدرب وينه
قال انتبه باقـي علـى شفتـك روج


وسلامتكم


مع فائق الاحترام والتقدير لمن مر هنا