جـــمـــرة غــــــلا

صبحكم الله بالخير جميعا


أضع بين أيديكم هذه الرائعه لعلها تستحسن ذوقكم الرفيع


مجنونها بالحـب والقلـب مجنـون
مايعشـق الا بنـت عـز وامـيـره

درة بحر في وسـط محـار مدفـون
وكل اليديـن اللـي تبيهـا قصيـره

شامت عن اللـي بالمحبـه يحبـون
وحبت خفوق" فـي غرامـه جديـره

وانا بعد مالـي سواهـا بهالكـون
مثل القمـر لاغـاب مافيـه غيـره

في حبها ما سمع سواليف وظنـون
وفي قربها تصبح همومـي صغيـره

أميرتـي مجنونتـي ليـه ماتمـون
واصغر اصابعهـا شعـوري تثيـره

يا تاجي اللي ماملكته علـى هـون
عـزالله انـك للانـوثـه سفـيـره

أن قلت احبك غارت عيون وعيـون
كني مسـوي لـي جريمـه كبيـره

كلن ينشدنـي وش العلـم وشلـون
يستانس النجـدي بوسـط الفجيـره

واسكت .. افكر .. كل علما" له فنون
والسيـف حـدّه مايضـره جفيـره

نسيوا منام طريف في حضن قسيون
يوم الدلـع يلعـب بقذلـة سميـره

ونسيوا ولّه جده على شوف عجلون
وهلّـم جـرّا والنـمـاذج كثـيـره

وانا خفوقـي ذنبـه اللـي يقولـون
انـه مجـرد قلـب يملـك جزيـره

والقلب عذره كـل دقاتـه شجـون
جاته سحابـه بالمشاعـر غزيـره

جمرة غلا ومشعلله وسـط غليـون
راعي مـزاج ومنبسـط باتعميـره

والعذر وافي .. والغلا راس ومتـون
والشوق وصلة حب والصّـد غيـره

وقلبي معاه الحق والسـر مكنـون
بيـن المحانـي ثبـت الله مصيـره

ومجنووونها لو قالوا الناس مجنون
قال : ايه عادي عاشقٍ لـي أميـره


وسلامتكم


مع فائق الاحترام والتقدير لمن مر هنا