[align=center]الليالي السرمدية

من عرفت العلم وانتي يالليالي سرمــديه
والوصول أغلى طموحات الفتى بأول شبابه

والمهابه ماتهادت غير لنفوسٍ رديــــه
ليت في قلب الليالي للفتى قدر ومهـابـه

دنيةٍ تجمع صفاتين الخجل والعنـــجهيه
كنها بنـت يزود بحـسنها ثقـــل وذرابه

يومـ جتني تمتحني في زمان الــجاهليه
جيتها رجلٍ تحلى في تقـاليد الصـــحابه

بالعطا تبخل علي وبالعذاب تمــوت فيه
عشتها قلب شجاع يكره الــضيم ويهابه

بس ابدري وش نهاية وصلها وأخـر هديه
وهو صحيح ان القصايد للجريح أول عذابـه

ومن عرف لك يالليالي وانتي اكثر من هويه
ومن تلحف في ترابك مقتنع باللي جرا بـه

من قدر طموحه في زمــــان المعمعيه
مَن مِن الناس يتجرا يتركك وانتي ترابـه

السؤال يعيد نفسه والاٍ جابه مـــبدئيه
والقلوب اللي تخالف ودها صارت تشـابه

والخلايق ماتسوي طيـــبها جود وحميه
كلنا نضحك بوجـــهِ مبتسم للغدر نابه

لو يصير الموت راعي .. كلبونا له رعـيه
لو زعل نزعل ونرضى لا رضى حضرة جنابه

والله اني مانويت اكـشف ملفات القضيه
لكن اني شفت شـيٍ يفقد العاقل صوابه

ياالحياه انتي غديتي بالغرابيل اجــوديه
كنك اللي مايميز بالخطا غير ارتكـابه

ماعطيتي غير جرح ولعنبوها مــن عطيه
والله انك ما عطيتي خير للقلب وصـوابه

خاينه .. ما انتي عزيزة خافقي ياالأجنبيه
جنبي عني وأجنب من مداخيل الـغرابه

وأخذ بدربٍ يدرك للقى روحــه وجيه
يايموت الدرب ولا بدفن القــلب بضبابه

وان ذبحتني تمني رجـــعتي وابكي عليه
لين تملين المحاجر بالبكا حزن وكـآ به

وادفنيني بين ظلك والخيوط العســجديه
لو لقيتي بعد موتي واحد بنـــفس الصلابه

شاعرٍ قدم قصيده لاغلب أيامـك ضحيه
بين ناسٍ مايطيقون القرايه والكــــتابه

يازماني لو بقى للشعر في صــدري بقيه
بكتبه وارسم خيالي بالورق وأروي سـرابه

وكان ردت للعناد وعــودت للمقدريه
والله أني ما اتنازل لين اعديه الســـحابه

يازمانٍ مبتلي به وابتلى فيني بلــــيه
لاتلوم اللي يخونك كان له عــــقل ولبابه

بقفل القلب المشقى عــن هبايبك العتيه
ودق بابه من بعدها لو قــدرت تدق بابه

الحياه اللي تسمي لعبة الشاطر خـــطيه
ماتساوت في عيوني مــــع جناحين الذبابه

أذكـــر أني كنت عايش بالليال الاوليه
وأذكر أني كنت عايش وقتها باحضــان غابه

ماعرفت إلا عبارة مثلها مثـــل الوصيه
عيش عمرك ذيب تسلم من مخالـــيب الذيابه [/align]

[align=center]قالها حامد
تماديتي وأنا مثلك تماديت بهجروعناد
وكلٍ مثّل عناده خفوقٍ ثابتٍ صامد
وإذا عندك بعادي عيد ترى عندي جفاك أعياد
وعسى طول الجفا مني يليّن قلبك الجامد
أبضحك وأظهر البسمة ولو إن الجروح اجداد
وترى قلب الحريقة ضو ولو وجه الحطب رامد
بكون أكبر من الغلطة وبعلن للهوا ميلاد
إذا كان الخطا منك مجرّد ثورة الخامد
وإذا كان الجفا منّك مسافات وغلا وعناد
تراي أكبر من عنادك وقولي قالها حامد[/align]

[align=center]تزعلين وتقعدين



عـافت الـشمس المدينة وأعلنت وقت الزوال
رغـبةٍ لـلنوم مـنها مـع عـيون الـناعسين
أبـعدت مـن يـوم شـافت بالسما ضيّ الهلال
كـنّـها كـانـت تـهزّا بـالهلال وتـستهين
كـفكفت صـبح التلاقي من ورا روس الجبال
واسـتخارتني وراحـت وابعدت عن كل عين
وانـتي أخـطيتي خـطاها وانعزلتي بالوصال
ولا رحـلتي مـن سـكات ولا وعدتيني تجين
عـشت عـمري بـالمحبة في سبيل الاحتمال
وانـتي تـعيشين عمرك تفرحين وتجرحين
مـن غـرورك فـي جمالك ما عطيتيني مجال
وأدري إنـك تـفهميني لـو بـغيتي تـفهمين
كيف أشوف الشمس تشرق بالسما وانت ظلال ؟
ومـن يـعيش بـوسط غارٍ للذياب الجايعين ؟
كنت أحسب الكره زايل والجفا لو طال زال
ولا بـديتي بـالغرام ولا بـقى فـيني حـنين
أشـهد إنـي مـا خـطيت ولا نويت الانعزال
ومـا خـدعتك فـي غرامي لين شفتك تخدعين
اصـدقي بـالوعد مـرة لـي ولـو فيها سؤال
مـن عـرفتك مـا أذكر إنك توعدين وتصدقين
كـنت أشوفك من عيونك تأمرين أقوى الرجال
والله إنـي قـبل أعـرفك مـا هقيتك تخضعين
كـنت أشـوفك تـبعدين وقلت من باب الدلال
وإن بـعدتي عـن عـيوني قلت باكر ترجعين
كـنتي أكـثر فـي عيوني من عدد وبل الخيال
ويـن أنـا ما الد وجهي كنت أشوفك تضحكين
وإن بـغيت أصد عنك من يمين ومن شمال
مـا قـوت عـيني تلفّت لا شمال ولا يمين
عـاشقٍ والـعشق بـلوى وأشهد إن الحال حال
ولا تـركتي رحـمة الله ولا عـرفتي ترحمين
وأدري إنـك فـي غـرامي للأسف نلتي منال
افـترقنا فـي دقـايق والـسبب لـعنة لـعين
حـبك أشبه في غرامي بالوصال الانفصال
ويـلعب الـخفاق لـعبة كـبرياء الـخاضعين
بـالهوى مـاهي غـريبة نـكبة عيال الحلال
ولانـي أول من يصون ولا انتي آخر من يهين
الـصداقة فـي عـيون الـناس مـنفى للعدال
وكــان ردّت لـلـصراحة كـلبونا مـذنبين
الـمـحبة شـبه زالـت والـصداقة لاتـزال
بـس أبـبقى في عيونك ( حامد ) اللي تعرفين
عـلّميها يـا قـصيدة واضـربي فـيني مثال
عـرفـيها بـالـبداوة فـي طـباع الأولـين
عـلّميها كـيف نـصنع صـبرنا والاحـتمال
عـلّميها كـيف نـفلح بـالعمل دنيا ودين
عـلّـميها فــي سـوالف حـلّنا والارتـحال
عـلّـميها كـيف نـظهر جـورنا لـلجايرين
عـلّـميها يــا دقـايق ، عـلّميها يـا لـيال
عـلّميها يـا عـصور وعـلّميها يـا سـنين
إن عـشقنا مـا بـغينا غـير عـشقٍ بالحلال
وإن نـويـنا مـا لـفينا كـود نـاس طـيبين
كـامـلينٍ فــي عـطانا بـس لـله الـكمال
والـرجل فـينا غـرامه لـو يـعين ويستعين
ابــدويٍ مـا يـقوده لـلردّى شـد الـحبال
يـعسف الـيدّ الـشحيحة لـلعطا حـتى تلين
هـمنا فـعل الـرجولة رمـزنا لـبس العقال
وانـتي الـمكياج كـله صار في وجهك سجين
عـندك الـمكياج مـوضة تـحسبين إنه جمال
صـار هـمك فـي حـياتك تكشخين وتطلعين
والا أنـا قـلبي بـقى لـي بالمحبة راس مال
والله الـلـي مـبـتليني بـالهوى والله يـعين
إن بـغيت أعـشق أبـالقى كثر حبّات الرمال
لـكن انـتي لـو بـغيتي صعب مثلي تعشقين
قـلت لـك كل الصراحة وأختم أطراف الجدال
وإن زعـلتي مـن كلامي تزعلين وتقعدين[/align]

[align=center]من تحت لتحت



لو تعرف الخطايا كيف كنت محروم
كان سود الليالي يـوم طحـت سمحـت
لو هموم المفارق مثل كـل الهمـوم
ماتشوفـون عينـي بالدمـوع سبحـت
ولو تحن المشاكل عقب حب الخشوم
كان حبيت خشـم المشكلـه واستحـت
بين صـدة عزيـز وكبريـاء مهزوم
عيـن شحـت علـى وعيـنٍ استسمحـت
بس مالله خلقني من بكـاي معصوم
وادري انه المحاجر لو تفيـض افضحـت
والله اني على جرحي صبـور وكتوم
لكن ان الدمـوع ان روحـت روحـت
اعذلـتني ظـروفي وانهكـتني عزوم
والوجيه احزنت لـي والقـلوب افرحـت
اشهد ان الليالي ماتعـرف السلـوم
قلب جافـي لقـاه ووجـه صافـي بحـت
راهنتنـي تبلـل بالدمـوع الكمـوم
ويشهـد الله عليهـا راهنـت واربحـت
احرمت نور عيني من غلا ريم قـوم
بـذرةٍ وارتوتنـي واثمـرت واطرحـت
جادلٍ دوم ماهـي مـثلها كـل يوم
استضاحت غمـوض وبالغمـوض اوضحـت
دورت بين قلبي والهـدب درب نوم
وامرحت ويـن مـدري المهـم امرحـت
تنحت اسمي بقلبٍ جيت فيه معزوم
واسمها بيـن جلـدي والعظـام انحـت
مثل جفني لعيني بالنعـاس محـكوم
كل مانمت نامـت كـل ماصحـى صحـت
ماتعارض كلامي غير عند اللـزوم
بس لا قمت اسولف واندمجـت سرحـت
دايم ازعل عليها بس قلبي رحـوم
وهي تموت بعذابي من تحـت لـي تحـت
مثل وجه العلاقه في ثياب الخصوم
ان تطيبت طابت وان جرحت اجرحـت
خصها الله بوصفٍ من خيال معدوم
لا اذان اسمعتبـه ولاعيـون المحـت
كن ربي خلقها من بياض الغـيوم
ومـن كفـوف السحابـه بالـورد القحـت
عن سواها فرقها بالقمر والنجـوم
وكـل عـذرى تباهـا بالجمـال انزحـت
بالحلا هي كوم وباقـي النـاس كوم
كفـتٍ عادلوهـا بالبشـر وارجحـت
حسبي الله على اللي مابغـاها تدوم
من بعد كيف كانت شوف كيـف اصبحـت
لاتحقـق وصـال ولا فـراق محتـوم
خطـةٍ قربتنـي للفشـل وانجحـت
لعنة العشق تبقى مثل ضرب السهوم
لو محى الوقت جرحه صورته ما انمحت
كيف ابنسى وانا اللي من جفاف لسموم
ماحشمت العيون ولا الدمـوع فلحـت
كانهـا بالـحميا كـل ربعـي قـروم
لـو يلـدون لاصعـاب الظـروف صلحـت
اجزم ان كنت ياقلبي شجاع وجـزوم
لـد لعيـون بنـتٍ لا التفـت الفحـت
ماتهين البخيـل الا يديـن الخـدوم
دام كـف الخطايـا بالجفـا لوحـت
نطح الباس باس ونطح اللـوم لـوم
وان تهـدت تهـد وصيـح ان صيحـت
ياتعيـش بمعـزه ياتمـوت محشـوم
ودك ان الليالـي لافعلـت امـدحـت
عمر ضعف الاراده مايسر الرخوم
ضربت السيف لوبيديـن الشجـاع ذبحـت[/align]

[align=center]غرام احباب


على ذاك الطريق اللي يسمونه غرام أحباب
وطت رجلي على دربه ولاأدري وش نوى فيني

تبعته لآخر دروبه .. ألين أن القمر قد غاب
تعب قلبي ، ولا تعبـت مسافـاتٍ توديـني

لقيت الليلة الجردا : هدب ظل وسما واعشاب
بعد ذاك الظـلام اللـي يتـوهني عنـاويني

صدفتك معجبه فيني وياليت..الغرام : اعجاب
وتراك انتي الـهنوف اللي هقيتك تستحقيني

عطيتك عشق من قلبي..وسلمت لغلاك رقاب
وغيرك يـحترق قلـبه ولا يقـدر يحـاكيني

أنا قبلك صدفت عيون لكن ويش جاب لجاب؟
ترى كل العيـون اللـي لقتـني ما تكفـيني

رماني حظي العاثر عليك وجيت لك طـلاب
ولا أنتي اللي عشقتيني ولا انتي اللي عتـقتيني

تعالي واعتقي ذاك الخـفوق المـولع المرتاب
مهب لاجلي ، عشان الله يجازيك ويجـازيني

تعدي في سما عشقي ولو عشقي خراب أصحاب
وصوني بالهوى نفسك قبل لا انتي تصـونيني

وشيليني على متنك : خفوقٍ باريٍ منصاب
ومن فوق الغرام العذب .. شيليني وحطيني

ولا منك هقيتيني شجاع وما يطـيق يهاب
أنا لك بالهوى والله مثـل ما انتي هقـيتيني

أنا ما أمشي ورا غيرك ولو أنه يطق الباب
وترى عيبٍ عليّ أطعن..ولو كثرت سكاكيني

زهودٍ ما يطـيق الدم لا داين ولا طلاب
شجاع وعارفٍ نفسي وأظن أنك تعرفيني

غيورٍ ماعرفت أضحك مع الغدر ببّرود أعصاب
أبيـع عيـوني الثنـتين قبل أنك تخونيني

إذا شد الغرام .. اترك خفوقي : بين ناب وناب
لفرقى تكسر ضلوعي .. ولا عشقٍ يوطّيني

أنا رجلٍ ولي غيره .. وإذا شفت الهوى كذاب
تثور بقلبي الفـزعه ولا تـهدى شيـاطيني

سؤالك لو يزعزع بي كياني ما قبلت عـتاب
اجي لك وأسالك نفس السؤال اللي سألتيني

عن العشق القديم أبواب .. تقفيها كثير أبواب
بعد ذاك الحبيب اللي خدعني وانخدع فيني

أبي عشق تحسب له كل نظرات العيون حساب
وابي قلبٍ علي قلبي ، وابى دينٍ على ديني

وابي نظرة عطا توفي ولا تخلف بدون أسباب
وابي منك قبل لا نتي تصـديني .. توديني

وابي دربٍ على العذال صعبٍ ومتعبٍ وغلاب
وابي نفس الطريق الصعب يبعدهم ويدنيني

ترى لو للقلوب عيون ولدموع العيون أهداب
حشى ما تنزل الدمعه لغيرك لو تركـتيني

أنا أول من عرف قدرك وأنا توي صغير وشاب
وابي منك ما دام أنك عرفتـيني تحـبيني

ما دام أني لقيتك في طريق أسمه غرام أحباب
دخيل الله ، وبعد الله دخيلك .. لا تخليني

ما دام أن كل من يحيا على وجه التراب تراب
عسى تنساني الدنـيا مادام أنتي ذكرتيني[/align]

[align=center][grade="8B0000 FF0000 FF7F50"]الـجريــمة


يوم ثارت فــي جـنـون مـن جـنـون الجـاهليــه
عـاتـبـتـنـي ليـن شـبـت فـي شرايينـي لهـبهـا
واسـتـفزتنـي وفـزت وزعـلـت مـنــي عـلـيـه
وسـتـضاقت مـن كلامـي يـوم زعـلنـي عـتبـهـا
مـن بـعدهـا ما بـقـى لـي فــي مـحانـيهـا بقيـه
اسـدلــت دمــع المحاجـر للـبكـا ورخـت هـدبهـا
والله انــي مـانــويـت ابـدي معـاهـا بالخـطـيـه
بـس هــي اللـي تعـدت حدهـا لحـظـة غـضـبهـا
والله انــي كنـت اكابـر بالعـتـب بـحـسـن نـيـه
بـس ابدري هو صـحـيح اني الوحـيد اللـي عـجـبهـا
يـمـكـن اني كـنت قـاسـي بالعـتـب مـعهـا شويـة
كـثـر ما كـانت تـمنـى راحتـي واعـشـق تعـبهـا
جـرحـتـنــي بالكـلام وكبـرت حـيـل الـقضـيـة
واخـسرت بي كل عرق مـن شرايـينـي كـسـبـهــا
ولا هـــي مــاكـان فيـهـا للـمـوادع مـقـدريـة
والـجـفـا كانـت تـعـافـه بـس مـدري وش قلبـهـا
لـيـتـنـي مارحـت اقيـاس قـيـمتـي عـنـد بدويـة
رجـعــت لـي كـل عـرقـ حـبـهـا ولا نهبـهـا
وعـلـمـتـني كـيـف بالجفا وانـتصر وابقى ضـحـيه
وعـلـمـتنـي كـيف قـلـبي لو غـلبـها مـا غلـبهـا
وعـلمـتـنـي يـوم صــدت عـنـفـوان الاجـوديـة
مـاتـلــوح لـلـمقـفـي لو سـلـبهـا مـا سـلبهـا
رابـيـة بيـن الـقـبايـل والـعـرب واهـل الحـمـيـة
عـاقـلـه مـاتبـذر إلا نخـلـة تـعـرف رطـبـهـا
إن تــهــادت ذكرتـنـي فـي خـفـوق الـعامـريـه
وإن تـمـادت تركـب ابلـيـس الرجـيـم وماركـبـهـا
جـفـنـها لا سـلهـمت به مـا يطـليـق الـسامـريـة
تسـحـبه برضاه عـينه وان سـهت عـيـنه سـحـبهـا
وان حـكـت تـعطـي مـكانـه للـحـروف الابجـديـة
كـن كـلـمتـهـا تلـفت للكـلام اللي عـقبها
والـحـروف الـيـا تعـدت بالـشـفـاه الـنرجـسـيـة
كـنهـا صـارت قـصـيـدة بـس ربـي ماكتـبـهـا
وش بوصـف مـن حـلاهـا وش بـخـلـي للـبـريـة
مـابها بالـحسـن عـيـب واكـشـفتـه الا حـجـبهـا
شـعـرها فيـه الخـوي الـلـي تـبـرى مـن خـويـه
والـشـفا لو تـشرب الـما واخـتلـط فيـهـا شـربهـا
كـن فــي ضـمـة شـفاهـا جـمرتيـن بنـار حيـه
كـل مـن حـس بـدفاهـا وحـتـرق صــد وقربـهـا
شـفـتـها مـثل الجـريـمه وابـتلـيـت ابهـا بـليـه
غلطة ٍجـيت اتـحاشـى ظـلـمـهـا قلـت ارتـكـبهـا
كــل شـي شـفـت فيـها فـيـه نــبـره جاذبـيـه
موهـبـة مـن فـضـل ربي واشـهـد ان الله وهـبهـا
كـلــهـا لــلـه بـلـلـه فاتـنـه هــا لآدمـيــه
عـاجبـتـني مـن بدايـة راسهـا لا سـفـل كـعـبهـا
لــو تـبـادلـنـي شـعـوري والهـديـة بالـهـديـة
مـاوفت لي لـو تـبيـع ثـيابـهـا واغـلـى ذهـبـهـا
هـملـتـنـي والقلـوب الـجـرهــديـة جـرهـديـة
وحـرقتـنـي والـمحـبـه نارهـا تاكـل حـطـبـهـا
ولا انــا ماكنـت اكابـر واللـيـالـي الـسـرمـديـة
يـمكن ان اللي غـصـبـني للولع فيـهـا غـصـبـهـا
ياخـوفوقي وادري انـك مـنـت فـي حـاجـة وصيـة
شـف مـكاني وانت تدري ويـن هـي يـمـة عـربهـا
رح لـهـا وان كان فيـها قلـب يـطمـح فـي مـجيـه
شـف طلبهـا فـي عـروقـه وان حـصل تمـم طلبهـا
وانشـده وان قـال عـنهـا مـن هـدر دمــي بـريـه
قـلـه ان اللـي حـصـلي بالـمحـبـة مـن سـببـهـا
ولـو يـقـول انـي تـعمـدت الـخـطـا لجـل الأذيـة
قـلـه انـي ما تـحـمـل بالـعـتـب قـلـه ادبـهـا
ولـو يـقول انـي انـا اللي كـنـت بادي بالخـطـيـة
قل هـي اللـي تـعـدت حـدهـا لحـظـة غـضبـهـا [/grade][/align]

[align=center]وش يجبر الشاعر؟!



انا والليل والعـبـرة وجــرح وخـاطـر ٍمكسـور
ونفس من هجيـر البعـد والحرمـان مقهـورة
وقلب ظامي لـشوفك ولايــروى ظمـاه بحـور
وعين تحتري لحظة غيـاب الطيـف وحظـوره
ونـار تنطـفـي مـره ومـره تـشـتعـل وتـثـور
واقول النار مقدورة وهـي مـا هيـب مقـدورة
حسـبـت الـليـل بغـيابـك يمـرن الليـال دهـور
وكنـي شايـل بقلبـي ليـال الوقـت وشهـوره
تصبرت وتقدرت وبنيت مـن الخيـال قصـور
إليـن ان الجفـا شـد الركايـب وانتهـى دوره
تحريتـك على درب القصـيد من ثـلاث شهـور
وحشا ما مات لك غصن يشف المـاي بجـذوره
تخيرت الغرام وجيـت لا راضـي ولا مجبـور
وجيتـي تسبقيـن خطـاك مرضيـه ومجبـوره
وانا ما كان لي رغبه أبيـن واكشـف المستـور
ولكن الجمـال أكبـر مـن الخفـاق وشعـوره
جمــال وود وعيــون ودلال وكبريـاء سعـور
وفتنة تخـذل عيـون النهـار وينطفـي نـوره
ولك في خافقي صوره تلاشت بين ضي ونـور
وأخاف اسكت من الفرحة وتنطق باسمك الصورة
عرفتك وانتهت رحلة قسـاوة دربـي المهجـور
والا يا جملـة أيـام الجفـا والصـد مشكـورة
خذتـني للجفـا عـزه واخذنـي للعنـاد غـرور
واخاف اكون بعنادى حبيـب ومـات بغـروره
وإذا كانـت مسـافـات الخيانـة للغـرام قبـور
وش اللي يجبر العاشق يخون ويحفـر قبـوره؟
وش اللي يجبر الشاعر يدور للشعـر جمهـور؟
مـدام انتـي محـبيـنـه وعشـاقـه وجمـهـوره [/align]