[align=center]الثريا


ليـه تطعنـي وانـا ميـت بليـا
ماكفاك الي حصلّـي قبـل ساعة
كن بين همومـي وبينـك حميا
جيتكم واحـد وجيتونـي جماعـه
انت منا والمصايـب مـن هنيا
كلكم ضدي ترى ماهـي شجاعة
ما ابشع من جروح طعنات القفيـا
غير سكينٍ تصيـب بالبشاعة
لاتتـوب ولاتـذوب ولاتريا
جرحها جرح وفظاعتها قضاعة
ترتوي من فيض دمـي والنقيا
وصار قلبي مثل اخوها بالرضاعه
وانت ليـل لـو ضويتـه مايضيّـا
ضعت فيه وشفت نفسي في ضياعة
اتهيـا ويـن مـا اشوفـه تهيا
وارسي بمرساه وشراعي بشراعه
مـن عرفتـه والمحيـا بالمحيـا
ومايروح الا ذراعي في ذراعه
ان رضيت ارضيه وان عييت عيا
وان طلبني قلت له سمـع وطاعة
ما عشقت من النجوم إلا الثريا
وماملكت من الكنوز إلا القناعة
وانت وجيـوش المـوادع والجفيـا
كيف اوقف ضدكم وانتم جماعه
لوبجيكـم بالشجاعـه والحميا
البلا ان الكثـره تغلـب الشجاعه[/align]

[align=center]المــباني
جابك الله من غياب ٍ ضيّـق صـدور المبانـي ......... قبل لا الوحشه تزعزع بيتـك الصلـب وتبيـده

بيتك اللي من رحلـت وكـل جدرانـه تعانـي ......... ماتحمـل ينتظـر شهريـن وعيونـك بعـيـده

الله العالـم لـو إنـك جيـت متأخـر ثوانـي ......... ماتشوف إلا بقايـا مـن حصـاه ومـن حديـده

من عرفتك وأنت تايه من موانـي لـي موانـي ......... وتارك ٍ قلبي مولّـع مـن وقيـده فـي وقيـده

ضاعـت سنينـي أحـد بهاليالـي وتحـدانـي ......... وأنت ماتشبع غيـاب ولاتخـاف مـن النقيـده

ودي أتحمـد لـك الله بالسلامـه , مامـدانـي ......... كل ماتوصـل برحلـه ترجـع برحلـه جديـده

دام تدري كـل وجـه ٍ غيـر وجـه الله فانـي ......... ياخي أكسبلك ثواب وخاف ربـك فـي عبيـده

كان فينـي عيـب قلي:فينـي العيـب الفلانـي ......... كان هرجي مزعلـك فـي شـي قلي:لاتعيـده

عيب تصغر في عيوني وأنت برقـاب الغوانـي ......... كيف تستسهل طعوني وأنت خابرنـي وليـده ؟

لعنبوك أن مت بيدك من يفكك مـن أخوانـي ؟ ......... لحزنوا ربعي على فرقـاي شاللـي تستفيـده ؟

أنت منت اللي عشقته أنت أكيـد انسـان ثانـي ......... ليه صرت بهالبـرود وبهالاحاسيـس البليـده ؟

وين حبك للزعـل .ويـن العنـاد الأولانـي ؟ ......... وين حنّية زمـان وفرحـة العمـر الرغيـده ؟

وين ذاك اللي اليا أقبـل مايبـات إلا بمأنـي ؟ ......... وين راح اللي اليا أقفـى مايـروح ألا فقيـده ؟

واحد ٍ مـن جابـه الله بـس يامـر ويعصانـي ......... الوحيد اللي أخافه غصب وأمشـي معـه سيـده

(مابغيت أطيـح بيـده) ليـن ماربـي بلانـي ......... ولا أنا لو هي بكيفـي (مابغيـت أطيـح بيـده)

ذاك بس اللـي يامـن جيتـه يلخبـط كيانـي ......... اللـي بنظـره ينشـف دم قلبـي فـي وريـده

قبل أشوفه أجمع اله أحلى القصايـد والمعانـي ......... وأن لقيته ماعرفـت أقـول لـي جملـه مفيـده

الف مـره قبلـه أعـد القصيـده مـن لسانـي ......... ولعنبوه أن جيت عنده قمت أخربـط بالقصيـده

أمدحه وأنـا أدري أنـه لـو تباطانـي نسانـي ......... أنطحه وانا أعرفـه مجنـون وأفكـاره عنيـده

من يسوي بي سواتك يالرهيـف الاسمرانـي ؟ ......... منهو من الناس غيرك غلطته ترفـع رصيـده ؟

من يقص(جناح طيرك)وأنت أعز أنسان جاني ؟ ......... ليه أخاف(رماح غيرك)وأنت ضرباتك سديده ؟

ان تبعتك .أتبعك مـن طيبـي وواسـع بطانـي ......... ولا أنا لاجيـت أكيـد انسـان عـزالله بكيـده

أقدر أنزع لك ثيابـي وألبـس ثيـاب الأنانـي ......... وأقدر أطلع من عذابي والعب بـدورك وأجيـده

ومستعد أكسب رهاني لو بغيت أكسـب رهانـي ......... وأخدعك بحساس كاذب وأتحـدى مـن يصيـده

أبك أنا لي شفت خلّي حط غيـري فـي مكانـي ......... والله إني لتركه وأن صـد لعشـق سيـد سيـده

جيت مابيك تحقرني جيت أبيـك تعـز شانـي ......... جيت أبي فزعة ظلوعك من مشاعـرك البليـده

خلني داخل (حدودك) وأجبـر بخاطـر زمانـي ......... أكذب بباقي (وعودك) وأصدق بلحظـه سعيـده

أنتشلني مـن (بـرودك) لـو تولّـع بالمحانـي ......... عطني أحساس (بوجودك) وأخذ كل اللي تريـد

تكفى واليا قلت :تكفى بيـع خلـق الله عشانـي ......... لاتضيّع من يدينـي فرصـة العمـر الوحيـده

يعلم الله شفـت منـك ومـن غيابـك ماكفانـي ......... كـان ماتقـدر تخفـف هـم قلبـي !! لاتزيـده

شف غيابك وش يسـوي بالصـدور وبالمبانـي ......... وأنت تدري كيف كانت صدمت غيابـك شديـده

والله أنك لـو وصلـت البيـت متأخـر ثوانـي ......... مالقيت إلا بقايـا مـن حصـاه ومـن حديـده[/align]

[align=center]اربع خناجر
مشكله لا جات حاجتك بيدين البخيل
مايفكك لين تدفع كثر مايدفعه
ومشكله لا صرت مطعون بكفوف الدخيل
في ظهرك اربع خناجر وبالصدر اربعه
ومشكله لا ضاق بالوقت رجالً ثقيل
يطلب احبابه وعيا زمانه ينفعه
ليت ربي مايحاسب خليلً من خليل
دام مال الحظ فزعه وللوجه اقنعه
ودام مال العذل تالي ومابالحيل حيل
الغلا سـماً نذوقه ومرً نجرعــه
نحتري فيه القا والحصيل هو الحصيل
مثل حلماً ماتحقق وعيت اقطعـه
كني اللي حط بشفاه من جمر المليل
لا قدر يرميه للناس وزرا يبلعه
والظروف اللي حدتني لنيران وفتيل
عرضت دمع المحاجر لشيً يجزعه
والمدامع بالغلا لا تحال ولا تحيل
والمشاكل كل ماجات جات مجمعه
اعذلوني عن هوى النفس وعيوني تخيل
في حبيب ٍ ماتركته ولازلت اتبعه
مغرم في حب مثله ولا ارضى له بديل
عيني تشوفه وقلبي يجوع ويشبعه
ذاك كل مازان بالي وطالعت النخيل
ماذكرت الا ثباته بوقت الزعزعه
ماهو الاقطعة من حشا قلباً عليل
وماني الا قطعة منه مخلوقً معه
لا جميل شفت قبله ولا بعده جميل
العذارا رهن رمشه وانا رهن اصبعه
والله انه لو طلبني اطلوع المستحيل
لا اطلعه مني مناك يعني لا اطلعه
ماعلي من الملامه وهرج الهبيل
مشجع الرجال لا ثار غيره مشجعه
في عيون اللي عشقني ولا جاني هزيل
الله اللي حط عشقه بقلبي وزرعه
لو سكت ينطق له الصم والدنيا تسيل
وان حكى لو يمشي المزن ياقف يسمعه
سلسبيل من شفاته يخالط سلسبيل
معمعه بسكات واحلا سكات بمعمعه
ماهقيت ان اكثر الليل يمرح بالجديل
لين شفته شوف عيني بكفه يرفعه
وان حيت ومابقالي معه ياكود ليل
لا اسهره بأول غروبه وموت بمطلعه
والله ان العشق جمره وطاحت بالشليل
وان حصل ماطاعك الوقت بحبابك طعه
من هو اللي علم عداي نكران الجميل
ومن هو اللي خان خلي وحاول يقنعه
كل عاذل ردني عنك يالطرف الكحيل
ياعسى الله يقلعه ياعسى الله يقلعه
يامعرض قلب الاحباب للدرب الطويل
السعه لا بارك الله بالضيق السعه
والله ان الوقت قاسي وانا ماني ذليل
واشهد ان الرجل مرات ظنه يخدعه
وانتم اتعذلون خفاق بعيون العديل
مارحمتم نار جرحه وحيرة مدمعه
والسوالف ليلها ليل والحايل يحيل
والمشاكل مشكله بمشكله متجمعه
مشكله لا خانك الوقت بالحمل الثقيل
لو زرعت الزرع هوج العواصف يشلعه
ومشكله لاصار عاذلك مايبرد غليل
لا ترده طيب كلمه ولحدً يمنعه
ومشكله لا صرت مطعون بكفوف الدخيل
في ظهرك اربع خناجر وبالصدر اربعه[/align]

[align=center]الشعراء
مابـقـى الا ســود الايــام تـحــرمـك الــرقــاد
كـيــف الاوهــام اتـجــرأ اتـســريــك مـغــبــون

مـن مـتـى تـجـزع مـن الـدمــع وتـخــاف الـبـعــاد؟
مـن مـتـى تـقـفـي بـك ظـنـون وتـجـيـبـك ظـنــون؟

صـرت تـاخــذ كـذبـتــي صــدق، ومـزاحــي وكــاد
لـو بـقـول انـي بـخـونـك تـحـســب انــي بـخــون

ماتـعــرف ان كــل شـاعــر يـهـيــم بــكــل واد؟
وانـهــم دايـــم يـقــولــون مـــالا يـفـعــلــون؟

ابــك انــا لاقـلــت ابـنـســاك وانـكــرت الـــوداد
والله انـــي مـانـسـيــتــك وولاهـــم يـحــزنــون

مـن جـزع مـن صـفـعـة الـشـمـس يـطـمـع بـالـبـراد
ومـن فـقـد وجـهـاتـه الـخـمـس يـلـقـى بــك ركــون

اعـتـبـرهــا هـفــوة انــســان او كــبــوة جـــواد
لـو بـتـسـمـح فـانـت غـالـي ولــو تـجــرح تـمــون

عــد صــداتــك مـــروة وطـعـنــاتــك ضــمــاد
خـلــهــن لاراحـــن طــعــون ولا ردن طــعـــون

خـنـجـرك يـسـتـاهــل الـطـعــن ومـتـونــي شــداد
ومـنـك يـازيـن الـخـنـاجـر ويــا بـخــت الـمـتــون

ردلــي حـنـيــة الـمــزح بـاحـســاس الـجــمــاد
خـلـنـا واحــد يـجــي صـلــب والـثـانــي حـنــون

مـوت فـيـنــي وانـدفــن فـيــك بـثـيــاب الـحــداد
وان حـيـيـت أمـوت لـرضــاك واحـيــا بــك بـهــون

مــره ارقــد بـالـكـفــن وانــت تـرقــد بـالـمـهــاد
ومـرة ارقـد بـالـمـهــد وانــت تـرقــد بـالـكـفــون

ادري ان شـجـونــك شــجــون واعــنــادك عــنــاد
والـبــلا ان عـنــادك عـنــاد وشـجـونــك شـجــون

ربــك الـلــي سـخــرك لــي تـقــود ومــا تـقــاد
والله الـخـالــق ولــلــه فـــي خـلــقــه شـــؤون

ازرع ضـلـوعـي مـن رضــاك وابـشــر بـالـحـصــاد
لـعـنـبـو مـن جـيــت تـرضـيــه وتــرد امـحــزون

بــس تـسـوالــك بـلــد ؟ قــول تـسـوالــك بـــلاد
انــت كــل الـعـالــم بـكــون ولـحـالــك بـكــون

مـابـعــد مـحـبــتــك حـــب ومـــرادك مـــراد
غـيـر كـونـك سـيـد حشــاي تــدري مــن تـكــون ؟

نـعـمـتـيـن اخـتـصـوا الـخـلـق مـن جــود الـجــواد
كـافــل الأرزاق مــن حــيــث مـــالا تـعـلــمــون

الـبـنــون ونـعـمــة الـمــال بـعـيــون الـعـبــاد
زيـنــة الـدنـيــا بــلا شــك فــي كــل الـعـيــون

مـثــل زيـنــة دنـيـتــي بــس عـنــدي شـــي زاد
مـن عـرفـتــك صــاروا الـمــال وانــت والـبـنــون

انـتـشـي بـك نـشــوة الـتـيــه لـعـنــاق الـرشــاد
وافــزع الــك فـزعــة الـقــرم لـشـهــاب الـزبــون

واحـصـنـك تـحـصـيــن الأرزاق عــن درب الـفـســاد
واعـشـقـك عـشـق الـمـظـالـيـم لـفـراق الـسـجــون

لــو تـزيــد الـشــوق جـمــرة تـحـولـنــي رمــاد
لـو يـزيـد الـعـشـق شـعــرة بـوصــل لـلـجـنــون

خــل هـقـواتــك كـبـيــرة ونـظــراتــك بــعــاد
كـانـك انـت بـكـبـرك تـهـون مـن الـلـي مـا يـهـون ؟

ازعـلـك وارهــن حـيـاتــي تـحــت رحـمــة زنــاد
تـهــبــى لا والله الا انـــت والــمــوت تـهــبــون

عـاد اذا مـا ارضـاك هـرجــي ولا الـلــي قـلــت فــاد
انــنــا لــلــه وانــــا الــيـــه راجــعـــون

وانــت بـاكــر بـتـعــرف عـلــى نـــاس جـــداد
والـكـلام يـجـيــك مــن كــل شـكــل وكــل لــون

لاتـحـسـب ان كــل كـلـمــة بـتـسـمـعـهــا وكــاد
ولا تـصـدق هــرج شـاعــر وتـخـدعــك الـظـنــون

دايــم اعــرف كــل شــاعــر يـهــيــم بــكــل واد
وان هـــم دايـــم يـقــولــون مـــا لا يـفـعــلــون

حـتـى انـا الـلـي قـلـت اعـشـقـك ومـا اطـيـق الـبـعـاد
يـمـكـن اطـلـع مـاعـشـقـتـك .. ولا هـم يـحـزنـون [/align]

[align=center]الاولى والتالي



جـا نهـار مـا رحمتنـي جيتـه وقدومـه
شفت فيـه النـاس واجـد واقفيـن اقبالـي

كنت احسب انها حقيقـة والعـرب ملمومـه
وقمت افضفض عن همومي واشتكي غربالي

ويوم زال الحـزن عنـي وانجـلا بغيومـه
واثرني ما غير اسولـف بالخـلا بلحالـي

من عذابي قمت اعـزي قصـة مرحومـة
ولعـت بيديـن خلـي وانطفـت بهمالـي

قصةٍ لدت عيـون صويحبـي مـن نومـه
يوم شلت المـوت بيـدي وابتلـوا عذالـي

ما رضيت اكسر غلاي وما قدرت ارومـه
وعاذلي ما صد عني ومـا قـوى منزالـي

إبتليتـه ليـن جتنـي خنجـر مسمـومـة
وابتلانـي ليـن جاب الاولـى والتـالـي

والله انـه مـا عذلنـي لين شـق هدومـه
ولين خانتنـي عزومـي وانكسـر تمثالـي

والا انا ما كنت ابين لا أمطـرت ديمومـة
بالمدامع مـن فـراق المخلصيـن امثالـي

كنـت اوقـف واتذكـر نفخـة اليشمومـة
واذكر اني كنت غالي فـي عيـون الغالـي

واحـد كانـت نسايـم سيرتـه بسمـومـه
وكان كل ما شاف ظلمي بالهوى يلجـالـي

ذاك والله كل ما أرسل في حشـاي سهومـه
انتهى ليـل السكينـة وأبتـدا زالـزالـي

ووالله اني كل ما اسمـع سيرتـه وعلومـه
قمت اشوف الموت الاحمر واقف بظلالـي

واشهد اني كل ما اسهى وافتكـر برسومـه
وما وعيت الا وانا ارمي غترتي وعقالـي

ليـت ربـي يحتميـه ويحرسـه ويدومـه
يومه اقرب من عروقي للجسـد بوصالـي

وليتني لما عرفتـه مـا عرفـت خصومـه
وما وقعت بظلـم نـاس ماوراهـم والـي

العـذول اللـي حرمنـي حاجـة مقسومـة
ليـه يحرمنـي قهوتي(والـدلال دلالـي)؟

وليه يسأل في غرامي وان بغيـت اسومـه؟
دام صار الجيب جيبـي والريـال اريالـي

والله ان العشـق شـي يستحـق القـومـة
واشهد ان عيـون خلـي تستحـق افعالـي

يكفـي انـه لا نظرلـي نظـرة محشومـة
يرتجف كفي ويوقـع مـن يـدي فنجالـي

وان لمحت بطرف عينـه دمعـة مكتومـة
جيت كلـي مـن عذابـي عالـي متعالـي

وان تبوسم لـي بعينـه والشفـا مضمومـة
والله ان مدري وش اللي بعدها يجـرالـي

ليت يومـي قبـل يومـه أو معـاه بيومـه
وليت حاله غيـر حالـي دام هـذا حالـي

إن غفيـت الليـل جتنـي بالمنـام حلومـه
وان صحيت الصبح ناسي سيرته يطرالـي

والله ليبطـي وعينـي تسـهـره وتقـومـه
والله ليبطـي عذولـي مـا يفـك حبـالـي

دامني لا زلـت احبـه واعشقـه بهمومـه
بذكره مـع كـل خطـوة حللـت ترحالـي

بذكره مـع كـل ليلـة مظلمـة مشؤومـة
نزلتنـي فـي حشـاه ورفعـت منـزالـي

وبذكره مع كـل دمعـة نوخـت بكمومـه
وعلمتني بان قـدري فـي غرامـه عالـي

وبذكره مـع كـل نظـره بائسـة مظلومـة
حسستني بانه اخـر مـن نـوى يصفالـي

وبذكره كا ما نسيتـه وان ذكـرت سلومـه
قمت اشوف الناس واجـد واقفيـن قبالـي

وان حسبت انها حقيقـه والعـرب ملمومـة
ما تحكمـت بسكوتـي ليـن طـال جدالـي

ويوم زال الحـزن عنـي وانجـلا بغيومـه
واثرني لا زلت اسولـف بالخـلا بالحالـي[/align]

[align=center]
ادلعها



بـعـد ماقابلتـنـي عاتـبـوهـا
على شـوف الحبايـب حاسبوهـا

خذوها وأبعدوهـا غصـب عنـي
وعـن وجهـة طريقـي جنّبوهـا

وشالوهـا عـن عيونـي غصيبـه
عـواذل وأغصبونـي وأغصبوهـا

خذوها من يدينـي شـوف عينـي
وعـن عينـي تعـدّوا وأحجبوهـا

كـلام وصدّقـوا بالبنـت كـذبـه
وهـم اللـي مـن أول كذّبـوهـا

وهـم وشدخلهـم فـي مـال بيّـن
لبـوهـا والخـلايـق طالبـوهـا

وفـيّـه لاتـخـون ولاتـعـانـد
جسـوره والمواعيـد أرعبـوهـا

مــلاكٍ كامـلـه والكـامـل الله
ولـكـن الـعـواذل عذربـوهـا

وهي كلمـا دعتنـي تشتكـي لـي
عـن اللـي سالفتـنـا سرّبـوهـا

تخـاف وتلتفـت مـع كـل كلمـه
تظـن أن الـعـواذل راقبـوهـا

تلفّت مـن عقـب ماهـي جريئـه
شجـاعـه ماتـهـاب وهيّبـوهـا

وأهدّيهـا وأنـا حـايـر وثـايـر
مصيـبـه يـاعـذابٍ عذبـوهـا

وهم كلمـا خذوهـا عـن طريقـي
تراهـم صـوب قلبـي قرّبـوهـا

وأنـا ماتعّبـت قلـبـي خيـانـه
خيـانـه رتّبـوهـا وأحسبـوهـا

ولا يعجـز خفـوقـي لايقـابـل
جفـا مـن حاربـوه وحاربـوهـا

وأنـا لـي عـزّة ٍ تفـرض عليّـه
أخاطـب بالجفـا مـن خاطبوهـا

وأكسر لوحـة الماضـي وأزيلـه
وأخرّبـهـا مـثـل ماخرّبـوهـا

وأذوّقهـم نـدم مـاصـار فيـهـا
وأشرّبهـم مـن اللـي شرّبـوهـا

وأدلّعـهـا وأولّعـهـا بنفـسـي
وأشرٌّقـهـا بـعـد ماغرّبـوهـا

وأعوّضهـا عـن اللـي راح كلـه
وعـن ذيـك الليـالـي كلّبـوهـا

غلاهـا بالحـشـى لازال ثـابـت
ولـو حتـى بغـيـري حبّبـوهـا

وغـلاي بقلبهـا مـرّ وتـعـدى
غـلاهـا لأمـهـا ولا لأبـوهـا [/align]

[align=center]التــــمثال

عفا الله عن خطا غدر الخناجر والضلوع ابطال
بسامح واتركك تحت الظلام الحالك لحالك
دخيلك وفر دموعك ترى هدر الدموع اذلال
وترى ما فيه أحد يصبر مثل صبري بغربالك
انا عيب علي أنقض كلامي والرجال افعال
واذا قلت اقطع احبالك تراني بقطع حبالك
عشان اكسب هدب عينك تجرعت العذاب اشكال
وليتك ترأف بحالي علشان ارأف بحالك
مسوي في حياتي شي ما يذكر ولا ينقال
حشا حتى العدو وهو العدو ما يعمل اعمالك
تمسيني على الهم وتصبحني على الغربال
تقلطني فناجيلك وتقصر عني دلالك
تحملت التعب لجلك وانا حملي يهد جبال
رحلت من العذاب وما وقفت الا على جالك
علامك كل ما جيك متواضع جيتني تختال؟
معاك اليا متي بصبر وصبري معك يحلالك؟
مثل ما اقبلت لعيونك لزوم تلد لي باقبال
ومثل ما قد حشمتك حس واحشم قلبي اشوى لك
أنا محدن بجابرني أساير معك هالمنوال
ترى لاني تبيع لك ولا ني باصغر عيالك
أنا جيت اعشقك نبض ومشاعر ما اعشقك (تمثال)
أنا جيت اسكنك واحياك وابقى فيك وابقى لك
أنا جيت بظما عاشق تعب يطرد سراب اللال
أنا جيت استفز رضاك من فرقاك والجا لك
أنا ما همت بك عاقل أنا كنت اعشقك بخبال
أنا ما كنت احبك حي أنا كنت اعشقك هالك
تخيل من كثر ما اخاف تلقى للزعل مدخال
أخاف اخطي على طيفك وادوس برجلي ظلالك
تبعتك والعرب تتبع رعود البارق الهمال
وانا شفت المطر يتبعك في حلك وترحالك
كأن اللي خلق حسنك خلقني مع جسدك ظلال
وصرت اقرب جسد يمشي معك باقفاك واقبالك
أبي قلبك يحس انه فقد بمحبته رجال
ملكته من هدب عين وخسرت رضاه باهمالك
صحيح ان الفراق اقسى ولكن الوصال محال
أنا صعبن علي أرضي غرورك واضعف قبالك
بعد ما حققت عيني فبعدك للرقاد امال
أعود للسهر؟ -- يا خوي فال الله ولا فالك!
ببدل نظرتك فيني واجي لك كل يوم بحال
بكون اقرب من ثيابك عليك ولا تهيا لك
بلمك وانثرك واجمعك وارجع وانثرك باهمال
بخونك وازعلك وارضيك وازعل منك وارضى لك
أبرسم بالثرى وجهك وابدفن صورتك برمال
أبشكي للعرب فرقاك واضحك عند عذالك
أبهديك الوصال فراق واهديك الفراق وصال
بسوي مثل ما شوفك تسوي وافعل افعالك
عشان تعرف من فينا الزعول ومن وسيع البال
أبيك تذوق فنجالي وانا بذوق فنجالك
نصيحة واحتفظ فيها قصر معك الزمن أو طال
أبي تسمع كلامي زين وتحطه على بالك
اذا حبك هبال اطفال لك عندي هبال اطفال
ولا --- وابشر بعد بهبال حب ٍ ما هو بهبالك
واذا قصدك تهين اسمي عشان تشمت العذال
ترى لا انته ولا غيرك --- ولا عشرة من اشكالك [/align]