يووم دراسي

يوووووووووه يا شين الشدة عقب الرخا

وياشين الواحد اذا قعد يلعب بالطين عقب الرمل الناعم <=== جاكم التشبيه عطلتنا نعتبرها من اطول العطل مابغت شي خلصت يادافع البلا ؟

عاد اذا جا موعدنا مع اول يوم دراسي <== مدري ليش اوجعني راسي

عاد وش راح يكون شعور الطالب في هاليوم ؟؟

انا اقول لكم :

طبعا تطقه الهواجيس والتفاكير في ليلتها ويبي يخطط وشلون يغاب بعذر انه اول يوم في الدراسه ماله داعي ( اجل المفروض يخلون الدراسه الاحد مهوب السبت :) عاد الوالده او الوالد يبي يشيك عليه الصبح ويلشطه بكم لشطه ويقول له : قم قامت عصبك ماكفاك تسدح اكثر من 3 شهور يالهيس

وامه تبي تقول له : قم وانا امك رح استلم الكتب لا يقضن عنك :(

يتقلب الولد على جنوبه شوي ويعض الوساده من القهر ويهمس لامه يمه بطني يوجعني الظاهر عقب عشاي البارح .. ترد امه اقول بلا حركات قديمه قم والا ناديت ابوك يقوم الولد متثيقل ويسحب روحه ويشرب كاس الحليب ويغط فيه قطيعة صاموليه قبل يخلصه <== صرفها .. ويروح للمدرسه مهموم وماله خلق عاد اول مايقابل ربعه يبي يسلم عليهم ويتحاب معهم كأنه مابعد شافهم من زمان وهو مفرق معهم كوره البارح .؟ وتبدا الحصه الأولى ويدخل المدرس ويبارك لهم بالعام الدراسي الجديد ويقول لهم هبي يير ويرد عليه واحد قافله معه وما يدري وش يقصد المدرس ( مايهبا الا انت ) :( ويقوم المدرس ويطرده .. عاد يجي المراقب ويطل مع الباب ويقول يالله يا شباب استلموا الكتب ويجونك ماسكين الجاده رايحين للمستودع اللي معه حبل واللي معه شنطه( الدوافير ) واللي معه محزم احرام وبعد ما يستلمون الكتب ويرجعون للفصل يرن الجرس للفسحه عاد اللي حاط رجله للمقصف يبي يلحق على التسبده واللي قد افطروا في بيوتهم وغاطين صاموليه على حليب يبون يجلسون يفقشون على بعض ويجي السؤال المتعارف عليه اين قضيت العطله ؟ و يجي واحد خفيف دم ويرد اين والا ياهو :)

ويرد الثاني انا قضيتها في ماليزيا والثالث في ولاية فرجيينا والرابع يطمن راسه مسكين ما راح لشي ولا وده يستذب ويقول : بصراحه انا ماقدرت اروح لأني ابوي مخليني اتابع النخل وانتم خابرين خراف وصرام وحوسه

المهم يرن الجرس ويرجعون الآفات اللي تفاهموا مع المقصف وعلى طاري الآفات ترا فيه ناس يتسلطون على الطالب المصري اللي عندهم بالفصل وبيني وبينكم ما الومهم يجي هاك المصري او السوري ومعه في شنطته بردقانه وموزه وحركات وحنا ملحطين ان كثرت جبنا معنا صاموليه مملوطه بجبنه ولا نكملها بعد نرجع بنصفها للبيت عاد شوفوا هالمصري مايقدر يبتسي ولا يشكي ماله الا ينطم ويمد بوزه على قولتهم ياني اضحك لا دخلت ولقيت خوينا رافع رجليه على الماصه وقاعد يفرم في الموزه ادري على طول انه مسوي جريمه في حماده ياويله من الله عموما زي ماقلت لكم يرن الجرس ويبدا كل مدرس يعطي انطباع زين للدراسه ويحثهم ( آبوك يا يحثهم ) على الاجتهاد والمثابره وتتكرر الحكمه اللي تقول من جد وجد ومن رزع حصد <== جد والا خال واحرصوا ترا البداية هي الاهم وكل واحد يحط له برنامج ووو اغلب الطلاب حايمتن تسبودهم ودهم يسكت والغريبه ان منول كانوا يحجزون الصفوف الأمامية <== أمامية والا أماخمسين :) لكن الحين صاروا يتسابقون على الصفوف الخلفيه عشان يصكون اللطمه ويفخووووون ابوها في كل درس وخاصه دروس المصاريه

اييييه يبني ما تصحى الله يقبر بخاطرك أنتا قالس في بلكونه ؟

على طاري بلكونه هذي مصريه مقفاها كبير تطل من بلكونه شافها واحد قال ايه البلكونه الشرحه دي ؟ ردت عليه وقالت : ماتيقي تشم هوا


<== تراها نكته لحد يصدق

واذكر مره من المرات يوم كنا في بداية الدراسه اول يوم كان الطابور ممل وما خففه الا هاك المراقب الله يذكره بالخير قال كلمتن ترن في اذني حتى اعداد هذا الموضوع يقول (( كلها أيام وتنتهي ) وانا رديت عليه في نفسي وقلت ( أما ايام يبي لنا شهور وغثا انت مراقب ما وراك مذاكر وفصل )

عاد كان اقشر شوي لو سمعني كان عرمني مثل الصاموليه وغطني في شنطتي اللي مغطيه نص ظهري

المهم ينتهي اليوم الدراسي بعد بداية يوم دراسي <== يمديكم على هالجمله وينك يالرشيد تقرا .. ثم يرجع خوينا الطالب لبيتهم ومعه ريحة الكتب الجديده اللي لها ريحة حلوه وعجيبه كنها ريحة الفلوس والبنزيم <== حشا مهوب آدمي :( وتبدا عاد مرحلة التجليد وكتابة الاسامي والتفنن في خطهن وتبدا مرحلة الدفاتر المزركشه والاشكال المفركشه برايتن على شكل ابو ذنب والا على شكل شباصه والا قلم المحايه حقته راس ميكي ماوس

وبعضهم مهوب يجيب له الا برايات الرعيل الاول ذوليك الدويرات الحمر والخضر ومن فوقه بعد .. عاد لو تشوفون موترة وشلون صندوقه محمل كان قلتوا هذا بيبسط في ديرتهم مهوب موديه لبيتهم :(

وعلى هالحال كل سنه وياحظك يالفار تبي تلقى لك اوراقن يكفنك عمرك كله وان كان عليك حقوق مع ربعك او عزايم ومناسبات فتعال لبيتنا عني انا انك بتلقى رزقن طيب

<=== ورق عنب ملفوف بورق دفتر انجليزي

<=== محشي جبن ملفوف بورق هندسه

<=== قطوه محشيه كراسة رسم

وبالهناء والشفاء

وفي النهايه

أنصحكم عاد بالجد والمثابره ايها الطلاب واهم شي تنامون مصيفين عشان يالله تقوووموووون .. <== يبي يفصله الرشيد من وظيفته :(



فاصل إعلاني مدفوع الاجر

محل البعبع لكل شي بريالين كل ماتحتاجه للمدرسه بلا مكتبات بلا خراط فاضي تعال ايها الطالب تعالي ايتها الطالبه تعالوا كلكم تمشّوا خموا كل ماتبون شعارنا : في محلنا افتر ثم اشتر ولا تحتر قال ايش قال مكتبه لا يلعبون عليكم بس تعالوا



براية المثابرة فقط ضع المرسام واترك الباقي لها

مسطرة الدافور الانيق : منتجاتنا هي الوحيدة التي خطت خط الاستواء



دفتر ابوسنام : عندما تمسك بالاسيام تصرخ يا سلام والصراحه انك ما تنلام وانك تبي تحل واجبك قبل تنام







منقول