]][[الجزء الثامن عشر]][[
رديت انسدحت على سريري .. هلت دمعاتي وانا اتذكر طفولتي .. الي عشتها بين امي وابوي واخوي .. وعيال عمي بوحمد
تنهدت .. ااه ياخوي .. وينك عني .. وين؟ .. ااااه .. من فترة طويله وانته مافكرت تتصل فينا وتطمنا عليك .. حتى حتى عزا ابوي ماحضرته ... نزلت دموعي .. ياترى الحين شنهي احوالك؟ .. بخير انت ولا لاء؟ ... راقد الحين ولا قايم؟ .. صاحي ولا تعبان .. ماكل ولا شارب ..يوعان ولا شبعان .. ليش ياخوي قطعتنا ؟ ..
شنهي اعذارك؟انا اختك ليش تخليني ؟..
من لي بعد مارحلت امي؟ .. من لي بعد ماتوفى ابوي ..؟؟؟؟..
صار لي سنتين وماني داريه عنك ... تذكرت اخر مكالمة لي وياه ..
بصوت مرهق:عواشي انا تعبان مب ناقص ويع راس
انا: عمور هاي ابوك تعرف شنو يعني ابوك؟ ..ليش جي تسوي فيه؟ شذنب عليك؟ .. الحين انته ولده ومفتشل منه عشانه تشلل؟ ليش؟هو الي رباك .. هو الي يتعب طول اليوم حتى يوفر لك اللقمة .. ليش الحين وهو محتاجك انته بعيد عنه؟ ..
قاطعني: اووووووووه اقولج انا بصكر واحلموا تعرفون اخباري بعد اليوم
ومن بعدها صكر .. تندمت .. وصحت بدل الدموع دم ..صار لغيابه سنة و10 شهور بالضبط .. يعني تقريبا سنتين واحنا مانعرف عنه شي ..عمي وولده .. وحتى ابوي حاولوا يتصلون فيه ..واتصلوا بالسفارة القطريه الي هناك ..لكن من دون خبر لانهم قالو احتمال عطوه الجواز وخصوصا ال10 سنين الي هو هناك وهو من مراهقته دوم يسافر لهم .ااااه... ليش انا دايما حياتي جي؟ .. ليش دايما انا حزينة؟ .. ليش دايما المصايب تلاحقني .. ليش كل هالعالم فرحانه الا انا حرام علي السعاده؟؟؟؟
تنهدت :استغفر الله .. استغفر الله ..
طالعت ساعتي جفتها تعدت الـ 12 ونص ..
قمت من فراشي ورحت الحمام توضيت وفتحت سيادتي وقعدت اقرا عليها قرأن وصليت الشفع والوتر ..
ورحت اناااااااااااام ..
عالساعه 11 الصبح صحيت وانا احس اني بموت يوع خصوصا اني ماتغديت ولا تعشيت امس .. بدلت ملابسي .. وتذكرت اني ماقمت لصلاة الصبح توضيت وصليت الصبح "قضاء" .. ورحت للتسريحة مشطت شعري .. وتعطرت .. وطلعت من غرفتي ,..
تصادفت مع ابتسام .. وقعدنا نسولف شوي عن الجامعه ..
وكل وحدة فينا تحلم انها تدشها وتدش عالمها ..
قاطعتنا ام حمد وهي تقول : لاحبيبتي عويش مابتدشين الجامعه .. انتي بتمين فالبيت .. (وحاست حلجها بحركة ماعجبتني) قصورج بنت ناصر تدشين هناك بعد!
حسيت بالاهانه
بالمذله
حسيت اني فعلا انسانه مب مرغوب فيها
ليش ياخاله ليش ..
انا شسويت لج عشان تكرهيني هالكثر؟
ليش بتخلين بنتج وبتحرمينه علي؟
شقاصرني انا عشان تحرموني؟
ليش اني يتيمة؟
ماعندي حد؟
مالي والي !
عشان جي تبون تتحكمون فيني ؟
تضايقت اما ابتسام ضغطت على يدي تخفف عني ..
سمعت صوت عمي يناديني ..
فرحت له المكتب ..
جفته قاعد وعلامات الحيرة تلعب بملامح ويهه ..
:اممم يابنتي انا ابغيج بموضوع.. شوي خاص ..
انا: خير ياعمي .. تفضل!
عمي: دام فضلج ..(جفت التردد بويهه)
رديت: وفضلك ياعمي .. خير!؟
عمي: لالالا خلاص يابنتي .. روحي بس بغيت اسألج مرتاحه؟
حسيت بغرابه .. حسيت بـ ان في الموضوع .. شصاير؟ .. ليش عمي جي متردد .. عن يكون صاير بعمور شي؟ ..قلت بخوف: عمي عمور فيه شي؟
حسيت وكأن انصب على عمي ماي بارد :لا يابنتي مافيه شي!
قلت بيأس يمتلكة خوف: عيل؟ شسالفه؟
توتر عمي ..: مافي سالفه بس انا حبيت اتطمن عليج جانج مرتاحة؟ والا اذا حمد ضايقج ولا شموه او ابتسام؟
هزيت راسي بـ اني مرتاحة وطلعت بس بقيت عند الباب اتأمل الباب بحزن شالي مخبيه عني عمي؟
سمعت كلماته تتردد فأذني : شلون نسييييته .. شلووووون ..اكيد اذا رجع مابيسامحني ..ولا يمكن يمكن بعد .. ............
انقطع صوته .. مادري ليش ..
بس عطيته ظهري .. ورحت لغرفتي حزينه ..
^^^^^^^^^^^^^^^^^^^
اعلنوا عن رحلتنا وقمنا وطلعنا من البوابه متجهين للباص ..طرا على بالي الموقف الي صار يوم طلعت انادي فيصل لان تلفونه رن ..تخيلوا كان ويا من؟ .. ايه ايه كان وياها .. يسولف ..حتى بيوم عرسـنا يسولـف وياها ..مايقدر على فرقاها ..لحظتها ماعرفت كيف اتصرف بس لاحظتني نوف الي ارتسمت على شفايفها ابتسامة شفقه على حالي المنصدم ..
طالعت بفيصل اتمنى لو يبرر لي ..حتى لو يجذب علي ..ع الاقل مب فاللحظات الاولى من حياتنا يتم وياها ..
رحلت نوف وانا مااسمع شي.. كأني طرشه .. مااسمع ..كنت اشوف شفايف فيصل تبرر الموقف وابتسامة نوف الي حسيتها حااارة ومتشوقه لفيصل ..تميت اطالعه مادري كيف كانت نظراتي ولا حتى اهتميت ..خذاني الغرفه وراح يتسبح اما انا ففضلت اتماسك لاخر لحظة قبل لا ادش الحمام واتسبح ..فتحت تسريحة شعري وانا اتأمل بويهي رحت للشنطة طلعت لي جلابيه صفرا فيها نقوش باللون الفوشي والسماوي .. حطيت فوطتي وخذيت ملابسي .. وع طول اول ماطلع انا دخلت ماتبادلنا شي غير انه كان يطالعني ..دشيت الحمام وفصخت فستاني الثقيل حسيت روحي بتطلع وانا اطلعه .. ومن بعدها تسبحت وانا احاول امحي الافكار الي تدور ببالي..كانت دموعي تنمزج ويا الماي الصافي..ليش .ليش؟؟؟؟..فضلت اتجاهل الاحساس الي بداخلي
طلعت وانا لابسه جلابيتي .. وانشف شعري بالفوطة.. بعد مامسحت المكياج الي كان بويهي .. طلعت انشف شعري واعدله .. تلاقت انظاري بانظار فيصل حسيت بالغثيان وععع..
.. قعدت امشط شعري جفته رد غمض عيونه .. لازال منسدح.. قالي بطريقه امرة: خلصي بسرعه ماباقي لنا غير ساعه
حاولت احافظ على هدوئي.. وبصوت هامس: انشالله..
شوي وقام من السرير.. ويـه صوبي وقال لي وهو يسحب المشط من يدي : بمشط شعرج ..
قلت له وانا اير المشط: لالالالا انا ابي امشط شعري بروحي ..
فيصل: مابيعورج
قلت:لالالا بروحي بمشطة ..
تغلغلت يده بين شعري ..وابتدى يمشطة .. حسيت باحرااااااااااااااج .. وحسيت بويهي شوي ويتقطع من الفشيله على كيفه يسحب المشط ويمشط شعري؟؟؟؟؟؟.. مسكين كان يمشطة عدال يخاف يعورني .. تلاقت انظاري للمرة العشرين بانظارة وكل واحد فينا فضل يسوي حركة تشغله ..
قالي:حلو شعرج ماشالله طويل ..
قلت وانا اتنهد: اليوم قصوة لي..
قال لي بعصبيه: ليش؟
قلت وانا متحيرة من عصبيته: بس جذي .. مـ(بتردد يبت هالمبرر) من تحت مقصف
سكت وماكمل وهد المشط :تأخرنا ساعه ثلاث لازم نكون بالمطار ..
طالعت ساعتي كانت الساعه تشير للساعه ال2 ونص .. لميت شعري .. وتعطرت .. واممم حطيت جلوس وكحل ولبست شيلتي وعبايتي ..
:امممم زين فستاني بنخليه هني؟؟؟
رد علي وهو يلبس ثوبه :لاحبيبتي بقول لنيوف ياخذه هو وبدور .. يالله متجهزة؟احين بنسلم عليهم وبنروح المطار ..
توردت خدودي من كلامة وسكت .. طلعنا وبعدين رحنا وسلمنا عليهم طبعا فتحت "مناحه" اكيد تعرفون ليش ..لاني بختصار بفارقهم فترة الله يعلم بتطول شهر او اكثر بسبب الدورة مالت فيصل ..
وبعد الوداع وصلنا المطار .. تنبهت لمكاني .. كنا الحين بنصعد الطيارة .. ماكانوا وايد ناس ..لان وقت الفير .. تنهدت وانا اعدل شيلتي .. طلعنا من الباص ونزلنا وركبنا الدري وشيلتي كانت تتراقص ويا نسمات الهوى الي دخلت بعظامتي وجمدتهم .. كانوا ناس جدامنا واحنا كنا اخر الناس .. لان فيصل قالي اصبر لين ماينزلون بعدين بننزل احنا .. واحنا نصعد الدري طلعت قذلتي وهي تهرب من الشيله .. ا انا ماانتبهت انهم طلعو .. بس فيصل انتبه وبحركة غيور ..وعصبيه دخلهم بيده وخرب شيلتي الي كانت بتطيح من علي .. عدلت قذلتي وشيلتي .. باحراج باااااااااالغ ..الحين اكيد بياخذ فكرة غلط عني .. عضيت على شفايفي حتى اني حسيت نزل منهم دم ..
قعدنا فمكانا .. وشوي اعلنت الطيارة انها بتقلع .. حسيت برهبه شوي .. تماسكت بيني وبين نفسي .. اخاف من الاقلاع والهبوط .. صكرت عيوني .. وبديت اقرا كل السور الي حافظتها .. وشكثر ادعيه .. لين ماحسيت بيد على يدي .. حسيت بقشعريرة .. فتحت عيني بسرعه وانا اسحب يدي ..
فيصل: تخافين من الاقلاع؟؟؟؟
قلت وانا اسوي نفسي شجاعه وانا اعدل شيلتي وتوني انتبه ان احنا الحين بالجو : لـ .. ..لا .. مااخاف ..
قال بسخريه: اها عشان جي ختمتي القرأن؟؟
ياتني الضحكة مادري على الموقف ولا كلامة ..ولا على نفسي.. ولا لاني تذكرت موقف مشابه له .. طنشته واخذت اتصفح المجله واشوف العطور .. والميك اب .. وبعض الاشيا .. تذكرت ان دايما يوم نسافر نقعد نسولف انا والبنات عن العطور .. والميك اب الموجود بالمجله .. وكل وحدة فينا تقول رايها ..مرت ساعتين واحنا بالجو ..
شوي وبعد مرور نص ساعه يات الموظفه تعطينا بطانيات لان الجو كان شوي بارد فالطيارة ..لاحظت ان فيصل نايم بهدوء..ويوم يات الموظفه طلبت بطانيه حطيتها على فيصل .. ورديت سندت روحي ع الكرسي..فجأة تذكرت الكتاب الي يايبته انا وياي بالشنطة حتى اتسلى فيه فالـ5ساعات الي يايه .. قمت من مكان .. تحركت بهدوء حتى مايقوم فصول ..ونظرا لقصر طولي ماقدرت افتح المكان الي يحطون به الشنط (مكان شنطتي ) فرديت يائسه لمكاني قعدت اتعبث بالشاشه الموجودة ع الكرسي(الطيران البريطاني فيه شاشه تلفاز) المهم استانست وايد يوم فتحته وكأني مخترعه الذرة .. بقيت افرفر فالقنوات الموجودة واحاول احط القناة مع المسجل الي موجود ..اخيرا استقريت على فلم .. كان فلم الرجل المقنع .. قصته وايد حلوة .. ان في توأم واحد منهم يحكم بلدة..والثاني فالسجن وعليه قناع .. المهم قصته طويله بس حلوة .. وحلوة وايد .. تصدقون من كثر ماكنت مندمجة ماحسيت براس فيصل المتمايل على جتفي ..بس يوم حسيته تحرك ..حسيت باحراج لانه قام ولازال راسه على جتفي ..
اما عني فكنت مخدورة الحركة ..ماعرف! ..ليش شخصيتي بدت تتغير من الحين .. انا مابي اكون اليازي الي تسمع الحجي ..وماتعترض ولا حتى تعبر عن رايها .. الي تستحي وايد ..اه قاطع تفكيري صوت فيصل
فيصل:ساعه كم؟
قلت باحراج:ساعه 6 ونص
ابتسم لي وقال :رقدت ساعه ونص ؟! ليش ماقومتيني ؟اكيد كنتي متملله بروحج ..(قال بصوت عذاب) ..اســف ..
نبرته كانت مأثرة فيني .. مادري ليش..:لاعادي .. اممم اطالع فلم تجوفه وياي؟؟
قال بابتسامة حلوة: فلم شنو؟؟؟؟؟
قلت باحراج خفيف: مامداني اقرا اسم الفلم لاني فتحته من شوي ..بس جايفته كذا مرة
جاف الشاشه ضحك بعدين قال:اها .. بس هالفلم قديم!
قلت له وانا احس اني وايد بديت احاجيه: اممم أي اعرف بس حلوة قصته ..
ابتسم لي موافق على كلامي .. وبدينا نطالع الفلم ..
اشتدت الاحداث فالفلم اما عني انا فكنت منفعله من الاخ المتسلط الي رمى اخوه بالسجن .. وبعدين كان بيذبحه ..النهايه كانت حلوة وايد وانا تأثرت ودموعي نزلوا ع خدي .. مما خلى فيصل يرد لعادته القبليه والقديمة الي هي "يتطنز" علي يوم اتأثر بالافلام واصيح ومو بس علي ع الكل بس علي اكثر لاني كنت اتأثر بالافلام اكثر هع
فيصل: هههههههههههه والله تمثيليه شحقه احين تصيحين؟
قلت وانا احس بالقهر صوبه .. ودموعي تحرقني: لانه كان مب زين وسجن اخوه 7 سنين بالسجن واخر شي اخوه يسجنه 6 شهور بس وبعدين يطلعه .. كان يستاهل اكثر .. بس بعد مسكين.. وبعدين انا تأثرت مب اصيح؟
قال لي وهو يضحك:انتي متناقضه ههههههههه وياه وضده بنفس الوقت .. كان ظالم ويستاهل
قلت وانا مصرة: بس بعد ..يعني جوفه شلون كان يصارخ ..حراام..ادري يستاهل .. بس بس,..(مالقيت كلمة تبرر احساسي)
ضحك فيصل: يام مشاعر رقيقه ومرهفه ..
حسيته يتمصخر علي ويتطنز ..حسيت نفسي ياهله ..ليش احاجيه .. استاهل الي اييني .. وبعدين يعني ماقدر امسك دموعي .. اوووف صج حاله تلوع الجبد ..
قلت وانا اغير الموضوع: باقي 4ساعات لين مانوصل! وايد شبنسوي .. ؟
ضحك : ولاشي .. رقدي؟؟
قلت له وانا اتذكر : لالال مابي .. امممم (قلت بصوت واطي )تقدر تييب شنطتي من فوق ..سكتت!
ابتسم لي:ههه انشالله ..
ياب شنطتي.. وطلعت كتابي الي بقرا منه وطلعت لي سنكرس سألته: تبغي؟؟؟
قالي بدون نفس: لاء ..
استغربت تغيره بس سكت وعطيته شنطتي .. رجع شنطتي مكانها ورجع قعد عندي ..حسيته قريب مني ..لدرجة انه يسمع دقات قلبي ..طنشته .. وبديت افتح الروايه الي بديت فيها من شهر وماقريت منها الا 10 صفحات وبعدها ماكان عندي وقت .. بديت اقرا صفحة ورا صفحة حتى اني ماحسيت بان باقي شوي على نهايه القصه .. ومرت الساعات وخلصت الروايه .. ورجعت راسي على الكرسي .. وانا اطالع السما الي بدت تظلم لان باقي لنا ساعه بالكثير وتنزل الطيارة ؟..غفيت وماحسيت الا بيد تهزني بهدوء..يد غريبه .. ماتعودت عليها .. طنشت لاني توقعت اني احلم .. رمشت بعيوني وانا افتحها بتعب لاني كنت اسمع اسمي يتردد باصرار .. عقدت حواجبي ورديت غمضتهم .. سمعت نفس الصوت يتردد..
فتحت عيوني وحركت يدي عليهم .. وبعدها جفت فيصل وهو يقول: يالله وصلنا اخرتينا ..
سكت مب فاهمه شي..ليش انا وفيصل بروحنا؟ ..وين اهلنا؟؟اوي ليكون شردت انا عنهم وانا مادري؟شكثر افكاااار كانت تتزاحم فبالي .. عدلت شيلتي وعبايتي .. ونزلنا من الطيارة .. كان الجو بارد لااراديا تلصقت بفيصل .. يوم فيصل حس اني بردانه همس:برد عليج ..؟
سكت وانا تعبانه وماسكة ذراعه عشان يسحبني وياه لاني كنت "مفهيه" توني قايمة ويومين ماراقدة ماقدرت اسوي شي غير احرك راسي بموافقه على كلامه .. فصخ جاكيته وحطاه على جتفي .. وانا امشي وياه .. تصدقون حتى شنطت يدي شايلها عني .. مسكين والله ..
كملنا الاجراءات وكان باستقبالنا توم الي حمل اغراضنا بالسيارة وودانا البيت ..
^^^^^^^^^^^^^^
اظطريت ارقد ويا فهد بنفس الغرفه لان المزرعه ماشي غرف وايد ..وطول الليل ونحن نتضارب .. ان ماباه يرقد ع الشبريه وهو مايبا يرقد ع الارض .. فالاخير استقر الامر انه بيرقد ع حواف الشبريه .. واضطريت اني اوافق ..
قمت الصبح ويلست ويا امايه وعموه
وتريقنا بعدها بدقايق نزل كل من فهد وحمدان وريم ..
يلسوا ع السفرة ويانا .. فهد يلس عندي .. وريم فضلت تاخذ حليبتها وتسير تتحوط .. اما حمدان يلس عند عيوزة ..
فهد:غناتي صبيلي شاي ..
تضايجت .. بس مابينت ..صبيت له .. وقمت بسير برع ..
طلعت ويلست ع الدجه .. رن موبايلي .. شفت المتصل
"وضحة"
ضاج خلقي .. اووووووف شوتبا هاي من صباح الله .. رديت بجفاء: خير؟؟؟؟
وضحة:السلام عليج الغاليه؟
رديت بدون نفس: وعليج السلام ..
وضحة: شحالج
قلت وانا تنهد بضجر وضيج: بخير
وضحة: ادري اني مزعجتنج بهالصباح بس حبيت اتطمن عليج.. لانج حامل ومايهون عليه تكونين مضايجة ع سببي .. عليا انتي ليش ماتبين تسمعيني؟
قلت لها بضيج: بس جذه .. مابا اسمع رمسه مألفه .. وكاتبتنها انتي وفهد!
صكرت الموبايل فويهها ؟..وفلعت الموبايل ع اليدار .. شفته وهو يتهشم .. وتتناثر قطعه ..قطعه ورا قطعه ..
اكيد انتو تعرفون ان وضحة هيه نفسها حرمت فهد "الاولى" و(الاغلى)
بتقولون تغار .. هيه نعم اغار .. ليش انا هب حرمته ..طبعا بـ غار .. بس انا زعلانه .. وزعلي هب سببه خفيف .. انا احس ان فهد خاني ..خدعني .. حسيت اني مغفله .. وهاي الشعور ناتج من قلبي .. هب انا الي اخترعته .. ماباكم تجربون هالاحساس ..
بس انتو شوبيكون موقفكم اذا كنتوا بمكاني .. لا تقولون بتتعايشون مع الموقف
طيب بتتعايشون بس شو شعوركم؟
شرات شعوري ..
تنهدت بقوة .. حسيت بيد ع جتفي .. اطالعت .. جفتها غويه ..
غايه: بلاج؟
انا: ماشي ..(وانا امسك بطني واشوف الاشجار الي قامت تتراقص مع هبات الريح)
غايه: احس بج شي مضيج بج؟
امتلت عيني دموع .. وخانتني ونزلت ..
غايه خافت: شو فيج والله حيرتيني وياج؟
قلت لها: ماشي حبيبتي .. مسحت دموعي وكملت غبار دخل بعيني .. هب شي ثاني ..شو رايج نسير نتحوط؟
غايه: زين ليش لا؟ ... بس(بشك) مابيكون تعب عليج؟
انا بابتسامة خفيفه:هههه لا اصلن وايد زين لي المشي ..
غايه: اوكي ..
سرنا وتمشينا ومرينا ع الزراعه وع البيوت الزجاجيه الي مسونها حمدان لبعض الورود ..
:خلينا ندخلهم
غايوه:اوكيك .. بس هب نتأخر بيضاربونا ..
ابتسمنا ودشينا واستنشقنا عبير الورود ..ااااااه تنهدت ..
انا كنت مثل هالوردة ..حلوة ..والكل يتمنى يقطفها .. ويوم قطفني واحد منهم .. رماني بالزباله .. انا حياتي شراتها .. كنت احلم بأن الي يقطفني يحافظ علي ..يحبني ..يغار علي ..مايرضى لي بالذل .. لكن الي تزوجته ..حبيته وعشقته..وهو يعشق غيري ..اتنفس هواه .. وانا ولاشيء بالنسبه له .. اطالعت بـ غايوه
:نصيحة خذي الي يحبج ولا تاخذين الي تحبين ..
استغلت غايوه الفرصه وقامت تسألني: شو صاير امبينكم ياعليا؟
انا: شو؟ ..بين من ومن؟
قالت لي: لاتسوين نفسج غشيمة ..بينج وبين فهد..
رديت:ماشيء..
غايوه: عليا خبريني ..يمكن اقدر اساعدج ..
قلت بيني وبين نفسي: ياليت ياغايه ياليت لكن هالشيء لا بيدي ولا بأيدج ..اخوج طلع مزوج ..ومحد كان مانعه..ليته خبرني ليته .. تذكرت مروان ..وتذكرت رسايله واشواقه ...تعوذت من ابليس كيف افكر بريال ثاني ..هاي تعتبر خيانه ..بس حتى فهد يفكر بغيري ..ياني صوت من داخلي :بس هاييج حلاله
رد عليه صوت ثاني:بس بعد ماخبرج ياعليا ماخبرج اعتبرج لعبه يلعب بها ويتسلى
رد الصوت الاول يتحجى:لا هو يحبج..اكيد لاحظتي نظراته وحبه
الصوت الثاني: كل شيء تمثيل ..تمثيل ابرع فيه فهد واخذ جائزة الاوسكار فيها
الصوت الاول:لاتهدميين حياتج تمسكي فيه
الصوت الثاني: بتعيشين ذليله وياه ..الي مايباج ماتبينه
الصوت الاول:انتي الي بتخسرين هو عده حرمة وبنت بعد ..انتي الي مابيكون عندج ريل من يديد يعطيج حقوقج يهتم لزعلج ورضاج..مابيكون لج ريل يحبج ويهتم بولدج الي ياي ..
الصوت الثاني: بتعيشين وياشريكة .. وبيضيق بج ..وبيهتم بها لانها الاولى والاغلى
قلت وانا انهي الصراع الي بداخلي:حبيبتي تأخرنا يالله نرد ..
سكتت غايه وهي ماتبا تضيج بي ..فديتج ياغويه ليت اخوج شراتج
الإهداءات
