قصة مرايم مره روعه لا تفوتكم

05-15-2008, 02:55 AM

الجزء(8)

بوخليفة:ها ابويه .. شو عن العرس ؟؟
مصطفى:هممم .. هههههه تبي ادور لك عروس وإلا بتدور لنفسك؟؟
بوخليفة: طاع هذا .. انا اقصدك انت !!
مصطفى: انه .. قريب ان شاء االله
بوخليفة: صج صج يا ولديه ؟؟ ومن بنته بنت الحلال ؟
مصطفى: انت تعرف اهلها و راح يسرك نسبنا ان شاء الله
بوخليفة:فرحني فرح الله قلبك يا ولديه .. من بنته؟
مصطفى بخجل: بنت ولد بوفهد ..
بوخليفة: بنت ناصر؟؟
مصطفى: هيه
بوخليفة: زين ما اخترت يا ولدي .. ناس ما عليهم كلام ..
مصطفى: والنعم فيهم ...
بوخليفة: أي وحدة منهم يا ولدي؟؟ الكبيرة اللي في الجامعة؟؟ يتراوى لي اسمها مرايم ..اتذكر يوم انك انولدت .. بوفهد كان يعايرني .. يقول انا الحين استقبل عيال عيالي وانت يالشيبة للحين تجيب عيال..ههههههههه و اتذكر انك اكبر بكم شهر بس ..
مصطفى: يا يبـه ... انا ما اعني الكبيرة .. انا ابي اللي في المدرسة ..!
بوخليفة: بالمدرسة؟ وش لك بالبزران ..!!
مصطفى حاس بوزه من كلام ابوه: بالثانوية يوبا وين بزران الله يهداك ..
بوخليفة: وليش ما تاخذ الكبيرة؟؟
مصطفى: الخاطر ما بغى إلا الصغيرة .. والقلب ومايريد يابويـه..
بوخليفة: وابويه عليك .. ومتى شافتها عينك عشان قلبك يريدها؟؟
مصطفى: شفتها اكثر من مرة واهي رادة من المدرسة ..
بوخليفة: شو اسمها؟
مصطفى: مدري
بوخليفة: دام انها بالمدرسة اجل اصبر عليها كم شهر .. الحين المدارس امتحانات وانت وراك جامعة ..
مصطفى: يعني انت موافق يبـه؟؟
بوخليفة: اكيد يا ولدي على بركة الله ..
مصطفى فرح من الخاطر: االله يخليك لي ابوويه ..
بوخليفة: بس اذا اهلها مارضوا لزام اتقبل وانا بوك
مصطفى: ليش ما يرضون ؟؟ انا فيني شي ينعاب؟؟
بوخليفة: مو جي ابويه .. بس البنت للحين بالمدرسة و عندها اخت اكبر منها للحين ما اعرست!..
مصطفى: التقاليد ..!!
بوخليفة: هذي عوايدنا وانا ابوك ..
مصطفى: انا ما قلت شي .. لكن الزمن تبدل .. احنا نحترم عاداتنا و تقاليدنا و لكن ما قدسها ..
بوخليفة: لكل حادث حديث .. لما يجي وقته يكون لنا كلام ثاني ..
مصطفى: الله كـريم و يسهل الامور ان شاء الله
بوخليفة: إن شاء الله ........
===================
يوم الاربعا الظهر
في بيت ناصر السالم
===================
مريم ما راحت الجامعة لانها ما عندها الا محاظرة وحدة ومافيها شي مهم ..
سمعت صوت في غرفة رباب ... واستغربت لانهم الصبح راحين المدرسة يعني منو اللي في غرفتها؟؟
دقت باب و ياها صوت رباب اختها .. من؟؟
دخلت مرايم و سلمت على اختها ..
رباب كانت على السرير و متلحفة و حاضنه دبها الكبير .."" هذا دبدوب حلو جاها هدية من عند صديقتها بيوم عيد ميلادها السنة اللي طافت""
راحت مرايم و قعدت على سريرها و مسحت على شعرها ...
مريم: علامج حبيبتي روبي ما رحتي المدرسة اليوم؟؟
رباب: رحت و رديت ..
مريم: شفيج؟ عسى ما شر تشكين شي؟
رباب: تعبانة شوية .. احس عافيتي كلها متكسرة ..
مريم: ياويل حالي عليج .. ليش ما قلتي لخالتي .. على الأقل نوديج المستشفى انتطمن عليج ..
رباب:مابي اروح مكان .. شربت اسبرين و ان شاء الله بصير احسن ..
مريم: ان شاء الله! ...
رباب: ومنها عيارة بعد عشان ملكة شمس الليلة
مريم: ههههه .. بس .. اشوف بعيونج حزن !!
وما كملت مريم كلامها الا ودمعة رباب تطيح على خدها قبل لا تلحق تمسحها ..
مريم خافت على اختها ...
مريم: شفيج شو مستوي علميني؟!!!!
رباب: لميني بحضنج مريم ....
واخذتها مرايم بحضنها و تمت رباب تبجي من الخاطر ...
مريم: يا ويل حالي ... شو صار عشان عينيج تذرف هالدموع الغالية ..
رباب: ماني بقادرة استحمل .. خلااص .. كرهت المدرسة و اللي فيها .. كرهت الناس .. كرهت الكمبيوتر و كرهت الكل ... الكل يا مراايم الكل ..
مريم: شو مستوي عشان كل هذا .. معقولة ضحكة البيت ترمس بهالرمسة ..
رباب: ماروم اقول غير هالكلام .. وحشتني رجـاء بالحيل .. كنا ما نتفارق و الحين اسبوعين ما اشوفها و لا ارمسها و انا ادري انها محتاجة لي بهالوقت ..
مريم:الله يكون في عونها على اللي صابها ..
رفعت رباب راسها و اتطالع بأختها و الدموع تارسة وييها ..
رباب: انتي بعد سمعتي عنها؟!! ... افضحوها الله لا يستر عليهم دنيا ولا آخرة
مريم: انا سمعت شوية كلام بس ما دريت منهي المسكينة اللي سوو بها جي .. لكن خالتي شما قالت لي عن السالفة كلها ..
رباب: أمي ظالمة .. اظلمتها مثل ماهم اظلموهااا
مريم: ربـاب ... عيب هالكلام .. امج خايفة عليج ..
رباب: تخاف عليّ!! يعني اموت بحسرتي عشان ترحمني ..
مريم: شو هالكلام .. انتي للحين صغيرة ما تعرفين في هالدنيا كثر ما الكبار يعرفون ..
رباب: صغار و صغار .. ومنو بياخذ حق الصغار اذا الكبار اهم اللي يظلمون..
مريم: الحين استوت خالتي شما ظالمة يا رباب .. شو كنتي تبينها تسوي عشان تحميج و بنفس الوقت تكون عادلة ..
رباب: على الأقل تخليني اكلمها و ارمس معاها .. اسمع لشكواها .. أواسيها ..
مريم:امج خايفة عليج من رمسة الناس اللي ما ترحم ..
رباب: بس رجوي ما سوت شي .. والله العظيم اهي عمرها ما رمست مع صبي وهذا كان جزاتها..
مريم: بس الناس لها الظاهر ...
رباب: الناس و النااس .. منو الناس هذيلا .. احنا الناس .. لا نرمس عن غيرنا وماحد بيرمس علينا..
مريم: الله يكون بعونج .. وأنا مقدرة اللي انتي فيه ..
رباب بتوسل: مرايم ساعدييني
مريم: بشو اقدر اساعدج ؟
رباب: امي حتى التلفون مانعته عليّ.. ابي اتصل لها .. بس ابي اتطمن عليها ..
مريم: بس خالتي.............
رباب: ما راح تدري ... خمس دقايق بس ... تكفين!..
مريم اطالع في اختها وكاسرة خاطرها .. عمرها ما شافت اختها ذبلانة مثل هالايام .. وين البسمة اللي ما تفارقها.. وين الضحكة اللي تدوي البيت .. وين هذرتها اللي ما تخلص .. الحين صارت ما تقعد معاهم .. ولا ترمس معاهم .. وابتسامتها باهتة و ضحكتها من غير نفس .. حتى المدرسة كل يوم و الثاني ما تروحها .. وإذا راحت كلها ساعة او ساعتين ورادة..
مريم: بس مو تطولين .." وتغمز لها ".. وهذا سر بيننا
لمت رباب اختها واهي فرحانة و ابتسامتها تارسة وييها .. وعيونها تلمع من الدموع التي امتزجت مع دموع الفرح ...
عطت مرايم جوالها لرباب و اطلعت عنها ...
و اتصلت رباب لصديقتها رجـاء ..
===================
يوم الاربعاء العصر
في بيت فهـد وسعد
===================
سعد توه راد من برا وداخل البيت مستعيل ......
شافه فهد و ناداه ...
فهد: سعد .. سعد تعال ابيك...
سعد: خير اخويه آمر بغيت شي؟
فهد: وينك من الظهر ماندري عنك .. انت ناسي ان الليلة ملكة شمس ..
سعد: لا اخويه ماني بناسي .. بس انشغلت شوية ..
فهد: انت ماخذ اجازة اليوم و بكرة بعد انشغلت في شنو ..
سعد: شغل خارج المستشفى .. مو وقتها الحين اقول لك ..
فهد: سعد.. حالك مو عاجبني ... شصاير شو مستوي و عافس حياتك فوق وتحت جي ..
سعد تنهد و جلس على الكرسي بالصالة واهو منزل راسه: مادري شقول لك ...
فهد ويجلس معاه: قول وأنا اخوك خير؟؟
سعد: لـيـلـيـان...
فهد ويعتدل بجلسته .. شو فيها؟؟
سعد: وصلت اليوم من المانيا .. وهي الحين بالامارات ..
فهد: وهذي حزتها بعد ... ليش جاية وشو تبغي منك انت مو طلقتها؟؟
سعد: انا.. انا ما طلقتها ..
فهد: شوو .. ما طلقتها .. يعني كذبت علي ..
سعد: مو بسهولة ...
فهد: شو مو بسهولة .. شو بعد .. والحين اهي ليش رادة ؟؟ انت تبي امك تجن ..
سعد: مو هذي المشكلة .. المشكلة اكبر من جي ..
فهد: شو بعد مستوي؟
سعد: ليليان جاية ومعاها ولدي ..
فهد قام على طوله: شو؟؟ ولدك؟؟
سعد: هيه ..
فهد: ومن وين طلع ولدك هذا من سنة الحين ...
سعد: انا دريت انها حامل من قبل لا نرجع البلاد .. لكن ..
فهد: انت بتذبح امك .. وابوك وين يودي وييهه من بين العربان ..
سعد: ما دريت ..ان بيصير كل هذا
فهد: تسوي عملتك و تقول ما دريت
سعد: ابيك تساعدني و توقف معاي
فهد: وينها الحين؟
سعد: وديتها فندق على ما استأجر لها شقة ..
فهد: لا حول ولا قوة إلا بالله ..
===================
يوم الاربعا المغرب
في بيت فهـد "بوبدر"
===================
وصلت العروس من الصالون و استقبلتها الزغاريد من اول ما دخلت ...
المغرب كان بس الأهل هناك " زوجة وبنات ناصر السالم" " بنات راشد السالم" "الجازية وامها" "شيخة وامها" " الجدة حصة".. لكن المعازيم و جماعة المعرس للحين ما وصلوا ..
العروس شمس >> كانت الشمس بكل انوارها في ليلتها ...
اول ما دخلت البيت ركبوها غرفتها عشان لا حد يشوفها من المعازيم إلا ساعة الملكة ...
ركبت معاها لغرفتها اختها بدرية و مرايم و شيخة و أمها << أم زوجها
اول مرة يشوفونها بهالحلاوة و الجمال .. لانها حفّت حواجبها .. وتحنت.. و مكياجها فنان .. اهي دومها تحب الالوان الغامجة بالمناسبات .. ولكن بهاليوم لابسة فستان بيج مايل للأصفرار وفيه شوية ورد برتقالي >شمس<... فستانها كان بسيط و فخامته في بساطته .. كان بدون اكمام و لكنها لابسة طرحة طويلة لريولها ... شعرها ما لمته .. ولكن مسوية فيه قصة الشلال و مسوته بس سشوار و فعلا صاير فنان و اهو يتدلى على كتفها ... ومكياجها من جد فنان وبني وفيه شوية زهري ومتناسق تناسق عجيب مع الفستان وويها الدائري ...
راحت لها ام سامي << أم نادر << أم خطيبها ... وباستها و قامت اتفحص فيها كأنها أول مرة تشوفها ...
أم سـامي: بالبركة يا بنتي .. يا حظ ولدي فيج .. الله يرحم امج الغالية كانت اتمنى تشوف هاليوم ..
وشمس و علامات الحزن الممزوجة بالخجل بانت على وييها من كلام ام نادر: الله يبارك فيج خالتي .. والله يرحمها برحمته ...
ام سامي: من اليوم وساير تناديني يمـه يا بنتي ..
شمس: ان شاءا لله خالتي
ام سامي: شقلنا؟؟
شمس: معليه خالتي يبي لي اتعود .. ما تعودت اقول هالكلمة إلا لأمي ومن راحت ما قلتها لحد غير..
شيخة وتبوس ربيعة عمرها: مبروك حبيتي
شمس و تمسح عينها عسب تطيح دمعة: الله يبارك فيج حبيبتي عقبالج ...
وتبارك لها مرايم بعد: مبروك حبيبتي منج المال ومنه العيال
شمس:ههههههههه الله يبارك فيج
شيخة: عنلاتج الحين من اخوي العيال ههههههه
مرايم: شسوي فيها .. طالعها تبي تبجي لنا الحين و تخر هالمكياج الفنان اللي خلى من وييها اللي ما يتشاهد ملاك ...
شمس: عنلااااااااتج مريووم ..
شيخة: هيه والله صدقتي الريم
شمس: واا بويه عليكم
ام سامي:شو عندكن انتو على حرمة ولديــه .. يووزو عنها ...
شيخة: نطقت الحكومة خلاص .. يعني ممنوع نرمس
ام سامي: ام السان الطويل .. انا سايرة للحريم تحت .. تحملوا فيها ولا تغيضوها
شيخة: تـم أمية لا ادرين بال
وراحت ام سامي" أم نادر" وسكرت الباب وراها
وتنفست شمس الصعدااء و جلست على الكرسي ..
مرايم: شو هذا بعد هذا بعد كل هالتنهيدة من الحب؟؟؟؟؟
شيخة: ايوه اجل وش تضنين .. الحب عاميل عمايله عندهم .. هههههههه
مريم: سكتو سكتو .. قلبي يرقص
شيخة: كل هذا من الونااسة الله يجيب هاليوم متى يا ربي انا بعد يرقص قلبي
مريم:هههههههههه ما خبري بج جي .. من يوم يومج خجووله من العـم
شمس: انا هب متفيجة لكم .. بموت .. خايفة .. مرتبكة .. بس اتصلي شووخ لأخوج قول له أجلنا الملكة ليوم ثاني ..
شيخة: شو انتي ناوية على اخوي يروح فيها .. وربي لا يستخف .. بروحه هالايام عقله صاير خفيف!! انا شكيت فيه انه صاحي ماهو مصدق ان اخيرا بيتحقق حلمه ..
مريم: أي هذا الحب وما يسوي .. آآه آه .. الله يفرح قلبه هنياا له ..
شيخة: شوو الريم لا تعطين اخوي عين بس ..
مريم: عنلاتج الحينه انا عيني حارة يعني ..
شمس: انتو ما تحسون .. لكن وين ارمس مع بقـر!!
شيخة: Oh No!! شو هالكلمات هذي .. انتي بتستوين حرمة اخوي!! راحت على عيال اخويه دام بتعلميهم هالكلام الحلو ..
شمس: وربي الحين ببجي إن ما سكتي عني ..
مريم: تكفين .. المكياج حرام يروح ..
شيخة: تبين اخوي يغمى عليه اذا شاف الكحل سايح .. وربي تصيرين دراكورلا...
شمس: اراويج شلون اصير دراكولا ...
وقامت شمس لشيخة و اطقها طق!!
شيخة: يالياهل .. وربي انج جنيتي ..
شمس: الحينه حسيت بنشاط وهدأت اعصابي ..
مريم: تسمحون لي انسحب بهدوء واسير عنكم لا اتهزب حالي حال شووخ ..
شمس: لا الريم خلكم معاي ..
مريم: وين اقعد.. اخاف منج تسوين بي شي .. للحين ما دخلت دنيا ولا تهنيت بشبابي ..
شيخة: أي والله .. توني اكتشف فيج انج مفترسة .. لكن معليه نادر بيروضج ..
شمس: سمعي بشو ترمس .. تبي تنرفزني غصب وتبيني اسكت ..
مريم: خلاص حبيبتي انا ما راح اسوي لج شي ..
شيخة: ولا أنا خلاص .. المهم انتي هدي اعصابج .. ايوااااا شمووس كلها كم ساعة تصفين انتي و نادر لحالكم .. ههههههههههههه
شمس تصلبت مكانها: لا شو لحالنا .. لازم تكونون معاي ..
مريم: وين نكون معاج .. الريال بيستوي ريلج .. بعد اخته تنجاز معاه لكن انا مالي سالفة ...
شمس: شيخة تكفين ها ..
شيخة: لا ابويه .. انتي ناوية علي يهزبني من الزين .. ههاااي .. لا حبيبتي انا احب احتفظ بكرامتي ..
شمس نزلت راسها و نزلت دمعة من عينها...
شمس: أبي امي ... يا ليتها تكون معاي بهاليوم ...
شيخة نزلت راسها: الله يرحمها ...
مريم حست بشعور شمس .. ولأنها تعرف شكثر كانت تحب امها ومتعلقة فيها .. ولأنها نفسها فاقدة لأمها وحاسها بوجعها خصوصا بيوم مثل هذا ..
مريم: امـج بهاليوم فرحانة .. وروحها الطاهرة تبارك لج بهاليوم .. تأكدي انها حاظرة معاج هني .. ووقت العقد .. وبكل خطوة ..
لمت شمس مريم بحنان ...
مريم: والحينه خلينا نضبط لج المكياج ... خربتيه ....
وضبطت شيخة ومرايم المكياج لشمس ...
+ ******* +

05-15-2008, 02:57 AM

وصل الملا
+ ******* +
في ديوانية بيت فهد ( بوبدر) ....
"المعرس وابوه و اخوانه" و " راشد السالم وولده سيف" و "الجد سالم بوفهد" و"العم سعد" و " وناصر السالم وولده أحمد " " بو نايف وبوحميد خوال شمس"
في أحد غايب؟؟؟ .......
ناصر يكلم سيف على جنب: بـوي سيف ما تدري وين مبارك؟
سيف: لا عمي ما شفته .. اتصلت عليه قبل لا ايي هني تلفونه مغلق ..
ناصر كان متضايق لأن ولده موب معاه ولا يدري وينه لكنه ما حب يبين لحد من الموجودين بهالشي...
اخذوا الوكالة من عند العروس "شمس" وتـم عقـد القرآن و تعالت زغاريد الفرح ..
++++++++++++++++++++++++++++
""مـبـارك""وين من هذا كله
وشمس حبـه صـارت لغيره
++++++++++++++++++++++++++++
مبارك ما كان بعيد ..
مبارك كان في سيارته وعند باب بيت عمـه ..
اول ما سمع صوت الزغاريد .. عرف ان خلاص .. انتهى كل شي ..
بأستسلام و كأنه تعباان و تحول من شاب في اول العشرين الى شايب في نهاية الستين ...
لابس نظاته الشمسة مع ان الوقت ليل ..
تدرون ليش؟ ... عشان يمنع نفسه من انه يشوف دموعه ..
ياللي خذيت مني شمسي .. ذبحتني و جرحت امسي ..
بهالليل يهل دمعــي..ذاب احساسي و سمعي ..
راح الدفا و النور .. دامك خذيت الشمس ..
ساعتي تصير شهور .. دام الهمس بلا حس ..
يومي يصير دهـور .. و البسمة صارت أمس ..
ودي انسى احزاني .. وودي انسى اجراحي ..
يا أهل الله ودوني ... اعيش في زمن ثاني ..
الليل عـذاب و جفـا .. و الصبح شمسه اختفى ..
وين الدفا بهذا الشتا ... راحت شمسي وكفى ..
مبارك..:..وكفـى يا مبارك .. وكفااية ... آآه يا قلبي ..
=======
نزلوا العروس على صوت التهاليل و الزغاريد من أم العروس و الحريم
=======
سلمت شمس على يدتها و باستها على راسها و الجدة حصة تبوسها و تبارك لها ...
شما: مبروك حبيبتي ...
شمس: الله يبارك فيج خالتي ..
الجدة حصة: بالبركة يا بنيتي غديتي حـرمة .. لكن جي عظامج طالعة تفشلينا ويا العرب يقولون وشو ما نأكلج !!
فطيم: هذا الرجيم و الرشاقة يدتي ..
الجدة حصـة: امحق والله امحق ..
شمس: يعني انا موب طالعة حلوة يدتي؟؟
الجدة حصة: عين الحسود فيها عـود يحفظج الرحمن من العين ... طالعة قمر .. آآه ذكرتيني بشبابي ....
الكل: هههههههههههه
رباب وتكتم ضحكتها: انتي للحين شباب يدووه
الجدة حصة: انتي ام لسانين نقطينا بسكاتج .. افتكينا من هذرتج كم يوم و الحين رديتي ...
زينة: أي يدوه اظاهر ذكرتج بما مضى ...
الجدة: يقول المثل يا بنت راشد إذا بغيت تنسى همك تذكر ليلة عرسك..
شيخة وتكلم شمس بهمس: والله يدتج هذي مدرسة
شمس: ما شفتي شي تراج للحينه .. ههههههه
<<<<أحمد: الحريم .. المعرس بيدخل ...
شمس وماسكة يد مرايم: ياويلي .. ياويلي ..
مريم:يؤيو تركيني يا بنت الناس ريلج بيدخل علينا وأنا كذذا حالي ..
اتركتها شمس بأستسلام ..
مريم: هههههه ابتسمي يالخبلة ..
نادر كان كاشـخ .. بدلة و نيك تاي .. وجوتيه يملع .. يبيين يديد و لكن مو مقصر في تلميعة بعد خخخخ .. معرس ومرتبش ..
كان الجد سالم و فهد وناصر و راشد و سعد اهم اللي ادخلوا مع المعرس وسلموه لعروس ..
شمس فرحت من الخاطر من لمة اعمامها وخوالها معاها ...
باركوا لها على الملجة و ردت عليهم وكلها حياء و خجل و ارتباك ...
نادر متونس من الخاطر و يوم سمع صوتها ما صدق نفسه و في خاطره يتمنى ان ماكو حد معاه غيره و غيرها ..!!
مسك فهـد يد المعرس ووقفه بجنب شمـس بنـته ...
نادر واقف وجها لوجه مع شمس .. وطبعا شمس للحينه مغطية وييها بالطرحة ...
رفع نادر المطرحة من ويه شمس .. وتصلب مكانه ...
نادر: واا بويه عليج شو هالحلاة .. لا يكون بدلوج وعطوني وحدة ثانية ؟؟
شمس احترق وييها من المستحى و اطالعته بطرف عين تتوعد فيه ...
الكل ضحك وخصوصا اهله لانهم يعرفونه و يعرفون سوالفه : هههههههههههاااي
وباسها نادر على جبينها و زادت حمرة خدودها ..
نادر: مبروك شمسي
شمس: مبروك لك بعد ..
نادر: مستحية مني شمسي .. امشي ترى عادي ..
ام سامي: خف على البنية شوي مو من اولها يا ولدي ..
نادر ويبوس امه على راسها : ان شاء الله يمه ..
ويهمس نادر في اذن امه: ياللا اميه قولي لهم يخلونا بروحنا لاه ...
ام نادر: والله انك مفشلنا..
الجدة حصة: تعالو يا عيالي الميلس ..
شيخة و تهمس لنادر: والله يدتها راعيتها .. حققت مرادك
و تركوهم لروحهم يدخلون في الميلس ...

__________________

واهو ما كذب خبر على طول قفل باب الميلس ..
شمس: هو هو .. ليش قافله ... خله مفتوح
نادر: شفيييج ؟؟ شو مفتوح بعد خلاص استويتي حرميته ..
شمس: معليه واذا يعني ..
نادر: لا يكون بس انا باكلج ؟؟؟
شمس اسكتت ..
وراح نادر وجلس جنبها ..
شمس: بعد شوي شو انته لصقة ..
نادر: سمعي عاد ان ما ستويتي حرمة سنعة عطيتج راشدي يعدلج من اول ليلة ترى انا ريال حمش ...
شمس: امحق حمش ..
نادر: شو شو قلتي الشيخة شمس .. اشوفج تقطين خيط و خيط .. لايكون حد جابرج علي وانا مدري؟؟ خبري بج ميتة في هوااي و تنطرين هاليوم من زمان .. وإلا تغيرت النفوس الحينه؟؟
شمس: نادر انا استحي وانت ما تقدر هالشي ..
نادر: فديت اللي يستحوون .. شمسي ؟..
شمس: سم؟
نادر: سمّ الله عدوج .. قولي لبـيه احلى منج ..
شمس: لبيه ..
نادر: لبيتي حاية يا بعد قلبي ... شمسي .. انتي فرحانه؟؟
شمس: لا شمس ...
نادر:هههههههه فديت خفة الدم .. صج شموسي انتي مستانسة؟؟
شمس هزت راسها بخجل بالايجاب ...
نادر: وانا وربي يعلم اني الدنيا ماهب سايعتني .. وكل اللي اتمناه ان الله يوفقني و اسعدج ..
شمس: وانا بعد اللي اتمناه ان الله يوفقنا و يقدرني اسعدك ..
نادر: ربي يشهد علي .. اني احبج يا شمسي ..

¤؛° الجزء الواحد و الثلاثون °؛¤
عندما يفقد الانسان شخص عزيز يحس بلوعة الفراق.. لانه لن يراه . .ووداعه هذا بعده فراق ابدي .. ولكن !!.. حين يفقد الانسان شخص عزيز على قلبه .. ولكنه حي على وجه هذه الارض وبنفس الوقت هو ميت بقلبه .. فيكون الاحساس بالحياة بدون احساس .. ينكسر القلب و يصّير جريحا كسيرا بلا تجبير.. كأنه الداء و السم الدواء ..
يمتزج الشعور .. تختلف المفاهيم .. و تختلط الاحاسيس .. و يصبح الحـب داء للمحبين ..
يصبح حب الأمس .. اساسٌ للألم .. ولكن ..! ... هل تتوقف حياة الانسان بسبب فقده لحب كان كل حياته .. او اعتقد انه كان كل حياته .. هل الحب هو حياة الانسان؟؟ ولا حياة للانسان من دونه؟؟
نعم...!!
لا حياة للأنسان بدون الحب .. بدون المودة .. بدون الشجن ..بدون الاحترام وحب الافراد ...
في حياتنا من الحب الكثير .. واناس احببناهم و بشدة .. ومع مضي السنين و تواتر الأيام نمضي في طريقنا .. لان الحب يحيينا ولا يميتنا .. وإن اماتنا فنحن بيدنا ان نحيي انفسنا ..
انا احب .. وانتم تحبون .. وكل انسان في هذي الحياة يحب ..بالرغم من اختلاف الاشخاص .. واختلاف المفاهيم..كلنا نُحِب ونُحَب..ومن يقول انه لا يحب فهو ليس بأنسان ....
نحب ابونا الذي يترجم حبه لنا بالافعال .. ويعمل ليل نهار ..
نحـب امنا التي ربتنا و سهرت الليالي علينا ..
احببنا صديقاتنا و اصدقاءنا الذين عاشو معنا لحظات الفرح و الحزن .. لحظات المعاناة و الألم.. و لحظات الانسباط و روحانية النفس ..
نحب أهلنا و رحمنا .. نحب من علمونا حرفاّ فأمرنا الله ان نُصيّر لهم عبيدا ..
نحب الحب فهو اساس الحياة .. و نحب الحياة لان فيها الحب ..
نحب ان نحب .. فالحب عاطفة نقيه .. فهي اساس الانسانية .. فهي الشعور النقي الخالي من الانانية .. و إن وجد فيه الكبرياء و العفوية فهو ذلك العشق المتيم لصاحبه .. و الرافع لشأنه ..
و خلاصة الأمر ..نقول ان الحب هو اساس هذه الحياة ..
حياة << حي << حيوية<< شعور<< انسانية .. إذاً فأنا انسان حساس و شاعري بهذا العالم بهذه الدنيا الفانية ..
شمس كلها اسبوع من بعد اقترانها بحبيب قلبها .. ووليد طفولتها .. وربيع عمرها و تتزوج بـه.. فقد طال انتظارها .. وآن لها ان يفرح قلبها الشقي .. و يرتاح قلب نادر الندي ..
تمت ملكة نادر و شمس .. و فـرح الله قلبهما .. ولكن على الجانب الآخر كان مبارك .. كسير القلب .. جريح النفس .. تحطمت آماله .. و اختفت احلامه .. غابت الشمس عنه ... كان يكره منظر الغروب .. و الآن صار يكره ذكر الشمس.. ويجحد ساعة الغروب و يتذكر فيها لحظة ذوبان الجليد .. اقصد بهذا احساسه .. فصار احساسه بشمس قاسي كالجليد .. يذوب ولكن ليس بأقتراب و تزايد حرارة الشمس ولكن بأبتعادها عنه ..
مبارك الهادئ صيّر إلى شيطان جبّار .. صار بركان يفور في وجه كل انسان ... أي انسان كان .. تبدل الزمان ..و تحول الحمل الوديع إلى ذئب جائر.. تحولت ابتسامته إلى آهـة .. وحياته صيّرت لمتاهة .. و كل الناس من حوله محتارة .. لا يعلمون عنه كسرته إلا اخته وصديقه .. الذين يتعذبون بسبب كل دمعة من دموعه .. دموع مبارك ليست ظاهرة وهذا ما يجعلهم معذبين ..فمبارك يبكي بدل الدموع دما .. فما اقسى الشعور حين يكون من تحب في حالة ذبول ... و في سكرة كأنها سكرة الموت.. ومابيدك شيء إلا التفرج على الحبيب و هو يغرق في بحر غزير ..
هذا الاسبوع طويل جداً .. وجرت فيه من الحداث الكثير ..
مشاعر متضاربة .. شجار .. حب .. زعـل .. وشجن .. توديع .. وفراق ..
اليوم الجمعــة .. يـوم للراحة و السكينة .. ولكن أبطالنا يصارعون فيها .. صـراخ الصمت الذي ادوى القلوب .. وتضارب المشاعر الذي مزق الاحشاء .. احسـاس المحبوب بالحب الذي ذبَ في قلب محبوبه الدفء و الحنان ...
+-+-+-+-+
يوم الجمعة الظهر
في بيت ناصر السالم
+-+-+-+-+
مبارك جالس بغرفته وفوق سريره .. جالس جلسة القرفصاء و ضام ريوله بأيدينه ..
يستمع للأغاني و صوت الاستيريو عالي جداً..
مادري شنو الاغنية اللي يسمعها .. مو مهم .. المهم انها كانت صاخبة .. صوت يسد اذونه .. مايبي يسمع شي .. واهم صوت صوت قلبه ..!!
في دق على الباب .. وصوت ينادي عليه .. مو مهم ناديتوني او لا .. انا موجود جسدا ولكن روحي ميتة .. لا تنادوني و خلوني .. كل هذا كان حوار مبارك مع نفسه ..و بداخله!
اللي كان يدق الباب على مبارك اهو ابــوه .. مستهم عليه و حاله ماهي عاجبته ..
بومبارك حـاس بالتغير اللي صاير على ولده .. ناصر يحب عياله وايد و لكن لمبارك معزة خاصة ما يعادلها حد .. كفاية انه ولده الكبير وأول فرحة له و اللي شال اسـمه...
ناصر حـاس بولده من يوم طيحته بالمستشفى اللي كانت بتروحه .. كان شاك ان شمس اهي سبب طيحته .. ولكن مبارك ما يرمس .. وماهي من عادته يرمس .. لكنه يستوي جي .. ما يقعد بالبيت وان جاهم يجلس بغرفته ولا يطلع منها ... إذا كنت تبيها يا ولدي ليش ما قلت لي ولا تعذبني جي ...
ناصر.:. لا حول ولا قوة إلا بالله
مريم طلعت من غرفتها القريبة لغرفة خوها وشافت ابوها ...
مريم: سلام عليكم .. مرحبا ابويه
ناصر: مراحب يا بنتيه ..
مريم: علامك يبـه واقف جي؟
ناصر: انادي اخوج ابيه ايي معاي المسيد .. لكنه ما يرد
مريم نزلت راسها و خنقتها العبرة على اخوها ...
ناصر: شفيه اخوج يا مريم .. انا ادري انج الوحيدة اللي يفتح لها قلبه و يرمس باللي عنده .. شو مستوي على اخوج .. والله اني اخاف يروح من يدينا ..
مريم كله منزلة راسها وساكتة
ناصر: رفعي راسج يا بنتي و خبريني واللي يعافيج ..
مريم: مدري بشو اقول او ارمس لك يوبا ..
ناصر: شمس بنت عمج لها دخل بحـالته؟
مريم ما استغربت وايد من ابوها .. لان دومه يلاحظ و ارتبطت حاله مبارك بخطبة شمس...
مريم: مبارك يحب شمس من الخاطر يبه ..
ناصر بانفعال: وليه ما قال انه يبيها .. ليش انتظرها لحد ما تنخطب وتروح من يده .. اهي بنت عمه وماهي غريبة .. لو قال لي كنا حيرناها له واهو ولد عمها وأولى من الغريب ...
مريم: هذا اللي صار يبه
ناصر: البنت املجوا عليها وانتهى كل شي ..واذا فات الفوت ما ينفع الصوت .. الحين شو بيسوي يعني ؟؟ بينتحر؟ بيترك الدنيا وراه و بيتم جي؟؟
مريم و دموعها على خدها: يوبا مبارك يبي حد يوقف معاه و يطلعه من اللي اهو فيه
ناصر: لا حول ولا قوة إلا بالله .. إنا لله و إنا إليه راجعون ..
وترك ناصر بنته مرايم للحين واقفة عند باب غرفة مبارك و راح اهو يتيدد عشان يلحق على صلاة الجمعة ..
تمت مرايم واقفة شوية عند الباب .. كل ما تسمع صوت الموسيقى العالية و الصخب اللي يرج البيت كل ما تزيد دموعها على خدودها .. و آخرتها رجعت لغرفتها لتكمل بكاءها..
مبارك و يرن تلفونه
<< عالي الشان يتصل بك
هذا رفيجه علي.. فر التلفون بعيد عنه لانه ما يروم يرمس مع حد وهو في حالته هذي .. وحتى لو كان هالحد اهو رفيج عمـره ..
""" الله اكبـر الله اكبر """"
انتبه مبارك لهذا الصوت الذي اخترق اذنه بالرغم من الصخب اللي كان محيط فيه ... " صوت الآذان ... ألا بذكر الله تطمئن القلوب ..
وقام و بند الصوت .. و تعالى صوت الأذان بشكل اوضح تخشع له النفوس ... ساعتها بس نزلت دمعة مبارك ..
صوت ثاني>> .. مسـج واصله على تلفونه ..
<""حبك وهم خادع والفشل عليه غالب .. شقا بك والتعاسة عنوانك.. والدليل من أول هزة يأست و فشلت وعن الكل ارتحلت.."">
المرسل عالي الشان
مبارك يطالع بالمسج .. ابتسم له ابتسامة ساخرة و قفل تلفونه ...
يدري ان علي الحين منقهر منه .. من كثر خوفه عليه .. يقسى عليه بالمسج .. لانه ما رد عليه ..
تيدد مبارك و تجهز عشان يروح المسجد .. واهو طالع من غرفته تمنى انه ما يشوف احد ((إياك نعبد وإياك نستعين)).. والله حقق مناه و ما شاف احد واهو طالع من البيت .. وراح وين المسجد .. لكن مسجد بعيد لانه ما يبي يلتقي مع ابوه او مع احد يعرفه .. يبي يكون في بيت من بيوت الله لحاله .. بينه و بين ربـه...
= صلـى بخشـوع =
حس بكل كلمة يقولها بصلاته .. بقيامه و بسجوده .. بركوعه و بخضوعه ...
اول مرة يحس بطعم كلمات الله .. ياا الله .. هذي الكلمة التي تريح القلوب وتريح الخاطر و النفس .. يـا الله .. قالها بتنهد و براحة ..
استغفرك يا ربي ... نسى ذكر الله في وقت كان يبي المساعدة من عنده .. اعوذ بالله من ابليس .. اهو اغواني و انساني ذكر ربي .. ولكني انا اللي سمحت له بهالشي ...
كان شيخ جالس عند المنبر .. شيخ ليس طاعن في السن و بالكثير عمره في نهاية الاربعينات .. كان اهو شيخ الجامع و كانت عنده مسبحته و يسبح بحمد الله .. ولما شاف مبارك اللي كان ماسك بيده كتاب ادعيه و علامات الخشوع و الحزن باينة عليه راح جنبه و اقترب منه ...
الشيـخ: السلام عليكم و رحمة الله و بركاته
مبارك: وعليكم السلام و الرحمة شيخنا ..
الشيـخ: انت من منطقتنا يا ولدي؟ لاني اول مرة اشوفك هنا ..
مبارك: لا انا من وسط العين .. هذي اول مرة اجي فيها هذا المسيد
الشيـخ: بارك الله فيك يا ولدي .. انا يعجبني الشباب المواضب على الصلاة و خصوصا صلاة الجمعة و الجماعة .. لان في هذا الزمن الالتزام قليل جدا ..
مبارك ابتسم للشيخ: وانا بكل اسف مواضبتي على الجماعة نادرة .. ولكن احاول قد ما استطيع اني ما افوت صلاة الجمعة ..
الشيـخ بادله الابتسامة: الحزن باين على وجهك يا ولدي .. و طريقة قراءتك للدعاء يبين ان عندك مطلب وحاجة من رب العالمين ..
مبارك: اطلب من ربي الهداية يا شيخ ..
الشيـخ: إن الله لا يغير ما بقوم حتى يغيروا ما بأنفسهم ..ولازم تكون مع الله حتى يكن معك، وساعتها ما بيخيب سعيك إليه بإذن شاء الله
مبارك: ابي اغير من نفسي يا شيخ .. ولكن اكتشفت اني انسان ضعيف .. تهزني الدنيا و زينتها ..
الشيـخ: واجه نتائج أعمالك بشجاعة وصبر وثبات ومسئولية محتسباً كل ما يصيبك عند ربك، ولتعلم أن ما أصابك لم يكن ليخطئك وما أخطأك لم يكن ليصيبك رفعت الأقلام وجفت الصحف، واحذر من كثرة الشكوى والضجر فهما من صفات الضعفاء و (شر ما في الرجل شح هالع وجبن خالع) ياولدي..
مبارك: اسأل الله ان يصبرني على بلواي
الشيـخ: قال تعالى: (إنما يوفى الصابرون أجرهم بغير حساب)
مبارك: والنعم بالله ..
الشيـخ: ما قلت اسمك يا ولدي ..
مبارك: مــبارك
الشيـخ: بارك الله فيك وبأسمك وحفظك الله لأهلك و ذويك ..
وبهذا الوقت جاء شاب و سلم على الشيخ يبي يكلمه وكان مبارك عاطي الشاب ظهره ..
الصوت ما هو غريب عليه .. التفت وكانت المفاجأة..
مبارك: اهــلا مرحباا الساع
الشاب متفاجأ: هلا والله بالغالي شلونك وشخبارك
مبارك: الحمد لله على كل حال .. انت شلونك وين هالغيبة يا ريال ..
مروان: الحمد لله ما نشكي باس .. تغيرت الاحوال وانا خوك و انشغلنا بدنيانا ..
الشيـخ: اظاهر انكم تعرفون بعضكم من زمان
مروان: هيه والله عشرة عمر .. وصار لنا شهور ما شفنا بعض .. خبري فيك من قبل لا اترخص من المستشفى ..
الشيـخ: عسى ماشر يا بني يا مبارك وش كنت تشكي؟
مبارك: مرض بسيط وبلاء من رب العالمين و الحمد لله تحسنت ورجعت مثل الأول ..
الشيـخ: الحمد لله .. ربك ما يبلي إلا اللي يحبهم يا مبارك .. لانه يبي يختبر قوة ايمانهم..
مروان: صـدقت شيخنا ..
الشيـخ: اترخص عنكم الحين .. في امان الله
مروان و مبارك: أمان الكريم شيخنا ..
مبارك: وينك انت شو هالغيبة ؟؟؟
مروان: سالفة طويلة ..
مبارك: وشو آخر اخبارك
مروان:مادريت قريب راح اعرس
مبارك باستغراب: اوه اوه تطـور .. مروان يعرس؟؟ ما اصدق
مروان:هههههههههههه اقول لك الدنيا تغيرت وانا خوك
مبارك: ياللا ارمس لي شلون جي؟
مروان: معليه ..بس هني مو مكان مناسب لهالسوالف ..
مبارك: زين عيل ..نروح أي كوفي شوب وعلى حسابي و حياتك بعد ..
مروان: ما بينا حساب ما تقصر والله .. شخبار الشباب و القهوة؟ للحين تسيرون هناك ..
مبارك: ايوه للحين وافتقدنا سوالفك و سواد ويهك هههه ..
مروان: ايام الله لا يعيدها
مبارك: انا آسف ما كان قصدي اني اجرحك .. وخصوصا الحين وانت تغيرت
مروان: هذا الماضي .. وان شاء الله بينمسح مع الزمن .. مع ان مستحيل الشي اذا انكسر ينجبر و يرجع مثل أول .. ياللا خلينا نسير الحين
مبارك: سرينا ..
---------------------------

05-15-2008, 02:59 AM

وصل ناصر السالم لبيته ...
دخل الحديقة ولقى ابوه ماسك مقص الحشيش و يعدل بالزرع ... وتقدم له يسلم عليه ...
بومبارك: شحالج ابويــه .. عساك بخير
بوفهد: الحمد لله يا ولدي بخير ونعمة .. انت شحالك .. حرمـاً ان شاء الله
بومبارك: مانشكي باس . جميعا ان شاء الله
بوفهد: اونك تأخرت .. توه فرغتوا من الصلاة؟؟
بومبارك: لا والله من بدري ..سرت لبيت اخويه بوبدر .. بس ما لقيت احد هناك إلا البنات ..
بوفهد: وحشونا القاطعين .. فهد ومعذور بعرس بنته .. لكن سعودو اللي اختفى ما يزورنا بالمرة ..
بومبارك: بعد تدري ابويه المستشفى ودواماته .. بأي لحظة يستدعونه وما يروم ما يسير لهم ...
بوفهد: الله يعطيه العافية ... و يخليكم لي يا عيالي بالعالي .. دومكم رافعين راسي ..
بومبارك: الله يسلمك ابويه و يخليك لنا ..
بوفهد: اشفيك ياولدي .. ؟؟اونك مانت طبيعي ..
بومبارك: شقوول لك يبه .. والله ان مبارك مضيق خلقي ...
بوفهد: يعديه الشر ان شاء الله .. بس زين انه طلع من غرفته ..
بومبارك: وربي؟؟ .. وين سار؟
بوفهد: مدري ياولدي.. بس عقب ما انت طلعت كلها كم دقيقة واهو سار وطلع وراك ... وانا شفته طالع مستعيل قلت مابي اكلمه واوقفه .. خليه يطلع يغير جو ..
بومبارك: الحمد لله .. والله هالولدمخليني هب في حالة ..
بوفهد: هذي مراهقة عند ولدك ... وان شاء الله ازمة وتعدي ...
بومبارك: أي مراهقة ابويه .. مبارك تعدى ال 22
بوفهد: مراهقة متأخرة وانا بوك .. وانت اخبص بها ..
ناصر(بومبارك) عامل نفسه ماهوب فاهم ويحك براسه: شقايل ابخص بعد ابويه ؟؟..
بوفهد: نسيت من بعد وفـاة المرحومة أم مبارك .. مو جيتني تبيني اخطب لك شمـا أم احمد من عند اهلها .. وانا اقول لك يا ولدي البنت صغيرة ويمكن اهلها ما يرضون وانت عندك عيال .. قلت لا البنت ضوتني .. واهي الوحيدة اللي رادها قلبي من بعد المرحومة ولازم ابيها ..
بومبارك وحاس بالاحراج: وانت يبه يعني ما تنسى شي كلش ..
بوفهد: هههه ليش تحسبني عيزت عنلاتك .. بس اذكرك ان على زمنك واستويت انت جي .. شلون عيل حال ولدك..
بومبارك: الله يخليك لنا يوبا ..مالنا غناة عن شورك ..
بوفهد: ولدك إذا يبي يرمس .. راح يرمس لحاله .. بس انت لا تضغط عليه ... ولا تكلمه وتدخل بشؤؤنه إلا ساعة اللي تشوفه بيطيح في الغلط ..
بومبارك: صـار .. عن إذنك يوبا ..
بوفهد: اذنك معاك .. خليهم ينجبون لنا الغذا متنا يوع ..
بومبارك:ان شاء الله ..
---------------------------
في مقهى من مقاهي العيــن الراقية الهادئة .. وعلى أنغام الموسيقى الكلاسيكية ..
كان مبارك و مروان جالسين جلسة أخوية ..
مروان: مسامحة خوك ما قدرت ازورك لما ترخصت من المستشفى
مبارك: مسموح خوك .. إلا انت شخبارك و شعلومك .. سمعنا انك رحت العمرة
مروان: اي و الحمد لله .. من شهر جي رجعت
مبارك: عمرة مقبولة ان شاء الله
مروان: ان شاء الله .. قريب الملكة ولازم تحضر عرسي
مبارك: ولا يهمك اكيد لازم بنحظر .. - ويغمز له بعينه - إلا من هي العروس
مروان ويبتسم: بنت اجاويد .. كانت معاي بالعمرة اهي و اهلها ..
مبارك: على بركة الله
مروان: وانت شخبارك .. غريبة انك تكون بهذا المسجد ..!!
مبارك و ينزل راسه متظاهر انه يشرب العصير وماكو شي صاير ..
مبارك: ولا شي .. بس كنت مار عند هذا المسجد و اجا وقت الصلاة وصليت فيه
مروان: اها براحتك خوك .. اذا ما تبي ترمس ما راح اغصب عليك
مبارك: انت شلون اهتديت جي يا مروان
مروان: تمر على الانسان ساعة وتكون مرة بالعمر .. إذا ما استغليناها بنخسر وايد .. المفروض ما نترك هزات بسيطة تزلزل كيانا.. ولازم نملي قلوبنا بالايمان و طاعة الرحمن .. لازم تشوف اللي انت فيه .. إذا كان لمرضاة الله او لغضبه
مبارك: وإذا كنت محتار .. انت ما قاعد تغضب الله و ولا قاعد تسوي شي يرضيه
مروان: لازم تشوف لوين وصلك هالشي .. انا صحيح مادري شنو سالفتك يا مبارك .. بس انا اعرفك واعرف اخلاقك .. ماعتقد انك سويت شي محرم .. او شي يغضب رب العالمين .. لكن لحظات الضعف اللي تمر على الانسان تكسره في اغلب اللحظات و لكن بالارادة القوية و العزيمة و تمسكنا بالايمان و طاعة الرحمن بعون الله نقدر نغير من نفسنا و نبني حياتنا من جديد
مبارك: والنعم بالله
مروان: وانا اخوك مافي شي بهالدنيا يسوي ان ننعزل عن الدنيا والناس .. ربك رحيم ..
مبارك: الله كريم واناخوك ..
مروان: اذا ما خاب ضني ما سوا بك جي إلا حرمة ...
مبارك يطالع في ويه مروان .... لا تظن فيني ظن السوء
مروان: انا اعرفك واعرف اخلاقك يا مبارك .. وانا متأكد اذا كانت فعلا السبب بنية .. معناتها انك حبيتها من قلب.. ويقولون الحب كلمة صغيرة في مبناها .. لكنها كبيرة في معناها.. الحب كما يقال يحول المر حلو ، والتراب تبر ، والألم شفاء،والسجن روضة ، والقهر انشراح وسرور وغبطة ، ومجتمع ما تقوم علاقاته على المحبة المتبادلة ، يتحول إلى جحيم لأنه مجتمع بتسود فيه الأنانية ..و مجتمع مليان بالكراهية.. انا حبيت من قبل يا مبارك بصدق ... حبيتها وضوت راسي .. لكن انا ,, ما كنت استاهلها .. واذيتها واذيت اهلها.. وإذا كنت راح تكون سبب في اذيتها ابتعد عنها لانه احسن حل .. وإذا كانت سبب اذيتك .. سامحها وانا خوك لان اللي يحب ما يعرف يكره وخصوصا اذا محبوبه ...
مبارك: بس انه كرهتها وعافها الخاطر
مروان: لو كنت كرهتها جان مو هذي حالتك .. كله من ورا قلبك ونا اخوك ..
مبارك: اللي انا فيه عذاب .. عذاااب
مروان: القديمين قالو لو ساد الحب ما احتاج الناس إلى القانون .. وانت تقول عذاب .. العذاب سجن .. والقانون عقاب .. والحب ماهو عقاب من المحب للمحبوب ..
مبارك: تركتني .. اخذت غيري ...
مروان: مادري ليش احسك تغالط نفسك ... الحب المتبادل ، حب قلبي يظهر على السلوك وبشكل عملي،،، يوضح للمحبوب انه يحبه .. تبتدي من الابتسامة الصادق وتنتهي بتشارك الهموم واعباء الحياة ..
مبارك: ابتسامها كانت صادقة .. لكن نهايتها ما كانت مشاركة .. او على الاقل ماهي معاي ...
مروان: معناتها ابتسامتها كانت اخوية ..
مبارك وعلى طرف لسانه ابتسامه ساخرة: اخوية ... الكل يقول جي .. حتى اهي .. يعني ما انفع الا اخو او صديق . لكن حبيب مستحيل .. ليش يعني شو ناقصني ...
مروان:الاذكياء اهم اللي يعرفون شلون يكسبون القلوب ..
مبارك: تبي تقول اني غبي
مروان: يمكن انت غبي.. بس مو لانك ما عرفت تكسب قلبها .. لا !! .. لانك حبيتها !!.. وخليت قلبك يجنن عقلك .. مع ان الافضل ان العقل يعذب القلب ... ومن جن بالحب فهو عاقل ومن جن بغيره فهو مجنون ...
مبارك: الفلسفة هذي انا ما افهمها ...
مروان: خليها لأهلها ..
مبارك: وانت من اهلها؟
مروان: كنت .. وكان فعل ماضي.. والله لا يعوده .. خلاص انا اللي يهمني الحين خطيبتي .. وحياتي الزوجية القادمة اللي راح اكمل فيها نص ديني ...
مروان: انت شنو نوع حبك لها؟؟
مبارك: شلون يعني ما فهمت ...
مروان: في نوعين للحب .. اما حب الذات او .. حب الصفات ..
مبارك: ممكن توضح لي اكثر ...
مروان: يعني اللي حببك فيها اهو جمالها .. دلالها .. ضحكتها و ابتسامتها .. طولها ..او النوع الصاني اخلاقها .. شخصيتها .دينها .. خلقها .. حشمتها ..
مبارك: الاثنين ونا خوك الاثنين ... هالبنت آية من الجمال سبحان الخلاَق .. واخلاقها يشهد عليها الرحمن..
مروان: يــه .. اونها تنحب هالبنية ... طيب شلون خليتها راحت من يدك ...
مبارك: تزوجت .. راحت لحال سبيلها ...
مروان: وانت تارك حياتك .. عشان وحدة شافت حياتها بعيد عنك ..!!
مبارك: لحظة ضعف .. انكسرت ..
مروان: هههههههههههههههههه

__________________

مبارك: تضحك؟!! انت شايف اللي فيه انا يضحك ..
مروان: اضحك على الزمن .. زمان ..كنت انت وغيرك تنصحوني .. و تدعوني ابتعد عن الخرابيط و اذكر الله .. والحين انا قاعد وبهالمكان .. انصحك انك ما تضعف ..
مبارك: تبي تقول اني انسان مهزوم .. قوي من الخارج وضعيف من الداخل ..
مروان: ماهو قصدي .. ماعرفت اوصل لك اللي ابيه ..
مبارك: هذي الحقيقة .. انت اللي صابك قواك .. وانا اللي صابني هدني هد الجبال ..
مروان: لو انك انهديت .. كنت يأست .. واليأس اكتئاب وراه انتحار .. ولكنك لجأت لربك الواحد العلام بمافي الصدور .. انت تقدر ترجع مثل اول واحسن .. وتواجه دنيتك وتوااجهها اهي نفسها اللي خلتك بهالحالة ..
مبارك: قلبي انكسر كسر ما يتجبر ..
مروان: لكنك تقدر تعيد الحياة له .. وتقوم من هالامتحان أقوى من قبل ...
مبارك: الله كريم .. لكن من اليوم المشاعر ماتت من قلبي .. ومن يوم و ساير ماراح يهمني شي غير دراستي ومستقبلي ..
مروان: والنعم بالله.. وانت ابخص بحياتك .. ياللا خوك سرينا .. عندي شغل ضروري ...
مبارك: انت سير .. انا بتغدى هني ...
مروان: على خير ..لا تنسى تعزم الربع كلهم .. وعلى العموم انا على اتصال مع محمد .. وراح اخبركم اول ما يتحدد الموعد بالضبط
مبارك: صار وعلى بركة الله .. منك المال ومنها العيال ...
مروان: مشكور والفال لك خوك ..

---------------------------
بعد ساعة
العصر
في قهــوة الشبـاب المعتادة
---------------------------
القهوة مليانة من الناس .. وصوت الراديو شغّال على أغنية من الأغاني اللي ماليها معنى و المنتشرة في هذا الزمان ...
كل واحد يغني على ليلاه .. وكل واحد سرحان وفي عالم ثاني غير اللي اهو قاعد فيه ...
محـمد يشرب الشاي ويلعب بتلفونه ...
اسامة يلعب كيرم مع واحد من الشباب ..
علي جالـس واعصابه واصله لخشمه.. جالس و يتأفف ..وكل شوي يطالع بتلفونه عسب استلم ميسدكول واهو ما حس عليه .. او وصله مسج وماسمع صوته ...
القهوة كانت هادية .. صحيح فيها زباين.. ويسولفون .. ولكن بالنسبة لقهوة وفيها شباب كثير تعتبر هادئة ..
وصل مبارك لعند الباركنات اللي بالقهوة .. طل من بعيد و لمح علي جالس هناك .. ابتسم في خاطره و بركن السيارة وراح لوين ربيعه يالس ..
مبارك: السلام عليكم
>> ماكو جواب .. ردوا عليه الشباب السلام .. لكن اهو يبي علــي يرد عليه .. اونه ما سمع ..
مبارك: شحالك علي؟
علي تخرع: بسم الله .. هذا انت ..
مبارك: لا خيالي ... شو شايف جني جدامك ..
علي: يمكن جني .. ويمكن خيالك .. لكن انت هني .. هذا اللي الواحد يشك فيه ..
جلس مبارك بالكرسي اللي جنب كرسي علي وكان فاضي ...
محمد واسامة كانو يتبادلون النظرات .. وقام محمد من صوبهم وراح مع اسامة و ربيعه يلعب معاهم..
مبارك: انا عاذرك ..
علي: قصورك بعد .. تكفى لا تعذرني
مبارك: اعذرني انت بعد .. مو تعاملني جي ..
علي: تبيني اصفق لك .. -ويهمس له بصوت واطي- .. تبيني اقول لك زين تسوي .. ادفن نفسك وانت حي لانها بتاخذ غيرك ..
مبارك: على الأقل لا تعاملني بهالاسلوب ..
علي: اوه اوه .. نسينا الاخو حساس .. لازم ما نجرح احساسه ..
مبارك بعصبية: علــي
علي ويتكلم من حرقة قلب: علي طقت جبده من سواياك .. علي ما يروم يشوفك وانت بهالحالة و يسكت .. علي وده يشوفك ميت ولا يشوفك تسوي بنفسك جي ..
مبارك: إن كان موتي يريحك .. خلاص اعتبرني ميت ولا راح تشوف رقعة ويهي ..
علي ويعطي مبارك كف جدام الكل: الحين تقدر تروح .. روح .. ليش واقف
الكل كان منصدم من هالموقف .. ولا يدرون شاللي صار لكل هذا ..
محمد: علـي!!
مبارك بتفاجؤ .. ما حس على ألم الصفعة إلا لما شاف علي قابض على يده: أنا .. انا تصطرني .. انا يا علي ...
علي: يمكن هالكف يوعيك ..
مبارك: اللي وعاني ماهوب كفك .. اللي وعاني خوفك علي ... مو الكف يا علي ..
وراح مبارك بسرعة برة القهوة .. مبتعد عن كل النظرات .. مبارك يبجي .. دموعه تطيح ويطيرها الهوا ...
علي قابض على يده اللي ضرب بها مبارك بيده الثانية ... و بقبضة قوية ضرب اقرب طوف جدامه...
محمد: شو اللي سويته هذا .. انت في وعيك ..
علي ما رد على حد .. وطلع اهو بعد وترك القهوة ...
---------------------------
على التلفون نــادر  وشمــس  ..::..
---------------------------
شمـس: زين حبيبي ما فيها شي ..
نادر: اول مرة انا بعد اشوف ..
شمـس: واكا راح تشوف .. راح نكون احنا اول ناس نسويها
ندار: احد عقب ما يعرس بشهرين يروح يسافر شهر العسل !! وين صارت ذي ..
شمـس: بعد تدري وقايلة لك ظروف دراستي ما تستحمل اني انتقل الحين لبوظبي .. ولا تحتمل اني اسافر شهر عسل بهالوقت ..
نادر: بس حبي انا حجزت وكل شي .. وعسب كنت بسويها لج مفاجأة …
شمـس: ماعليه أخر الحجز إلا كلها شهرين ..
نادر: خلاص .. انا أجرت شقـة في العين .. راح نسكن فيها لحد ما تخلصين امتحانات ... وانا اوريدي عندي دورة هالحين ..
شمـس: يعني بعد ماراح تكون فاضي لي على طول ..
نادر: احسن عشان دراستج ولا اتعطلين وتنشغلين فيني ..
شمـس: راح توحشني ..
نادر: من الحين
شمس: من الحين وحشتني و بعنف ..
نادر: وانا احبج وبعنف و لكل انواع العنف ..
شمس: ههههههههههههه
نادر: االيوم بقربج سنة يا حياتي .. لوفي اي مكان ..
شمـس تبي تغيضه: لا حبيبي اذا انت تبينا يكون عسلنا بأول شهر زواجنا ما يصير خاطرك إلا طيب ..
نادر: وشلون .. ودراستج انا بعد ما يرضني تخسرين الكورس ومابقى عليج شي ..
شمـس: من قال راح اخسر الكورس
نادر: عيل شلون؟
شمـس: نأجل الزواج لبعد الامتحانات .. ونضرب عصفورين بحجر واجد ... اكمل دراستي و نقضي شهر العسل بوقته .. ها شرايك
نادر: حلفي والله؟؟ ...
شمـس: موب زين يحلفون لا ..
نادر: انا عندي حل ثاني عيل
شمـس: وشنو هالحل؟
نادر: نتزوج عقب ما تخلصين سنوات الجامعة كلها .. واخليج معلقة لا متزوجة ولا مطلقة .. وساعتها نلف العالم بعد .. ها شرايج؟؟
شمـس: احلف بالله؟
نادر: موب زين يحلفون لا ههههههههههههههههههه
شمـس: يا خفـة دمك والله ..
نادر: عيل بس انتي اللي خفيفة دم ويا هالويـه ...
شمـس: انه بس كنت ابي اغيضك شوية .. لانك تينن وانت معصب
نادر: وانا بعد كنت ابي اعصبج شوية .. لانج يا كرهج وانتي تغيظيني ..
شمـس: شسوي احبــك
نادر: آآه يا قلبي ... لحقي عليّ
شمـس: شفييييييك؟؟
نادر: قلبي ذاب ..
شمـس: يووو .. ليش ثلج عشان يذوب ..
نادر: لا حديد بس اصهرته الشمس ..
شمـس: بيــاع رمســة .. كم وحدة قبلي قلت لها هالحجي ..
نادر: انا!! انا شمسي؟؟ وربــي هالكلام اول مرة اقوله .. وطالع من القلب للشمس ..
شمـس: نــادر
نادر: ياااااا لبيــه
شمـس: شكثــر تحبني ..
نادر: مادري ..
شمـس: ماتدري؟؟؟ شلون يعني؟؟ ما تدري تحبني او لا؟
نادر: احبج حب ماله حد .. واخاف اوصف لج وما اوفيج حقج ... انتي خلينا انتزوج وانا اقول لج
شمـس: خوفي إلا كل هالحب يروح بعد الزواج ...
نادر: اونج وايد تطالعين افلام و مسلسلات خربوطية ... حبيبتي .. الزواج يكلل الحب .. و يبارك هالعاطفة النقية ..و المشاعر النبيلة..
شمـس: أي نبيلة هذي؟
نادر: وحدة من المعجبات كنت احبها بس بعدين افترقنا ..
شمـس: يا كرهك .. ندوووووور انا اغاااار
نادر: حبيبتي .. مو انتي تقهريني .. انا مندمج وعايش دور العاشق الولهان اللي قريب بيتصير حبيبته له و قدام الناس وماحد يروم يقول له شي او ياخذها منه .. وانتي اتدلعين و اتطنعبزيت ..
شمـس باستسلام: خلاص ما عودها ..
نادر: فديت اللي يغارون والله ..
شمـس: صج نادر انت كنت اتكلم معجباتك او ترمس معاهم ..
نادر:الحين هذا وقته هالسؤال ...
شمـس: ابيك تجاوبني و بصراحة
نادر: انا قط جذبت عليج عشان تقولين لي بصراحة ؟؟
شمـس: لأ .. بس بعد .. عشان لا تاخذها بمزح ..
نادر: بصراحة كلمت كثير .. معجبين .. ومعجبات .. ويتصلون لي بعد .لكن طبعا انا ما عطيت احد منهم فرصـة .. لان القلب مشغول و هايم بوحدة تسواهم كلهم ومايروم يبدلها بحد ..
---------------------------

05-15-2008, 03:00 AM

بيــت بوعبدالرحمن
---------------------------
عبـدالرحمـن بيسافر الليلة ...
أم عبدالرحمن وهي تبجي: تروح و ترجع بالسلامة يـا ولدي ..
عبدالرحمن: الله يسلمج امــيه .. بسج عاد يمه كفاية بجي ..
بوعبدالرحمن عند الباب: يالله يا ولدي لا اتأخر .. مابقى شي على الطيارة ..
عبدالرحمن: كاني جيت يوباا ..
بو عبدالرحمن: اترك عنك هالحريم .. ما بتخلص سلاماتهم ولا دموعهم ...
عبدالرحمن: ياللاا يما سرينا .. ما يهون علي امشي وانا اشوف دموعج ..
ام عبدالرحمن: وش لك بهالسفرة .. ليش ما خليت احد يروح مكانك .. ما تعودت على فراق احد منكم
عبدالرحمن: اللي يسمعج يقول اني بهاجر او راح ومانبراد ..
ام عبدالرحمن وتطق ولدها على كتفه: الله لا يقوله .. فال الله ولا فالك
سماح: هههه عمتي خايفة عليك .. كل هذا من حبها لك ..
عبدالرحمن: عورتيني آآي ..
ام عبدالرحمن: بعد قلبي تغطى زين .. اكل زين ..
عبدالرحمن: اللي يسمعج يمه يقول انا رايح آخر الدنيا .. إلا قريب السعودية و كلها اسبوع وراد لكم ..
ام عبدالرحمن: تروح وترد سالم ..
بو عبدالرحمن: عبدالرحمن وينك انت وينك .. ترى انا اعرف امك .. بتم جي ترمس لحد ما تروح الطيارة .. ترى تسويها ومتعمدة بعد ..
عبدالرحمن: شفتي ابوي شلون كاشفج ..هاهاها
ام عبدالرحمن: وليش تضحك جي .. رح بس رح ..
عبدالرحمن: انا رايح ..وين عيالج ما ياو يسلمون عليّ .. عنلاتهم
ام عبدالرحمن: مدري عنهم .. من العصر طالعين وماردوا البيت
عبدالرحمن: مـاجد سلم علي من شوي قبل لا يطلع ... وسارة اهي وزوجها بيروحون المطار.. لكن محمد و علي ما شفتهم اليوم من بعد الغدا..
ام عبدالرحمن: احنا في ايام عادية ما نشوفهم .. شلون واليوم اجازة .. المهم انت لا تدير بال تسافر وترجع لنا سالم غانم ..
عبدالرحمن: يالله .:. في وداعة الرحمن ..
وباس امــه على راسها ... و زوجتــه على جبينها ..
سماح بصوت واطي: منصور ان شاء الله حبيبي ..
عبدالرحمن: دعواتج .. راح توحشيني .. ديري بالج على نفسج
سماح: لا تدير بال ..- وتكلم خالتها- خالتي واختك ما بيقصرون معاي ..
عبدالرحمن: يعني خلاص ماراح تروحين بيت اهلج؟
سماح: هني بيت اهلي وبيتي بعد .. راح انطرك لحد ما ترجع بالسلامة..
ام عبدالرحمن: الله يرضى عليج يا بنيتي ...
عبدالرحمن: في امــان الله .. ولا إله الا الله
سماح وام عبدالرحمن: امان الكريم .. محمد رسـول الله
وحمل عبدالرحمن شنطته الدبلوماسية في يده .. وسار لوين الباب عشان يطلع .. إلا بجية اخوه محـمد
محمد: ها خوك .. زين لحقت عليك كنت بروح لك المطار مباشرة .. ياللا ابويه ينطرك بالسيارة ..
عبدالرحمن: على خير .. وين علـي ما بيّين ..
محمد: علي شفته في القهوة العصر .. تهاوش مع ربيعـه ومنها ما شفته ..
عبدالرحمن: سلم لي عليه عيل .. ياللا الوالد الحين اكيد معصب ..
محمد: يللاا سرينا
---------------------------
علـــى شـاطئ البحـــر
---------------------------
في آناء الليل .. على شاطىء البحر .. الامواج المتلاطمـة .. كان مبارك جالس على الرمال المبللة .. يراقب البحر وموجه العاصف بالارض .. في آناء الليل ..
يخلو المكان من أي صوت عدا صوت الموج .. وضكات بعض الاطفال الذين يلعبون الكرة على مقربة منه ... ياليتني طفل صغير .. كل همي ضحكتي ... لا هم اشيله ولا شي يعكر صفوتي ..
مبارك ..:.. آآه يا قلبي الشقي اللي ما تهنا ..
كانت هناك يـد امتدت على كتف مبارك ...
ادار مبارك راسه يشوف منهو اللي ماسكه ...
ورجع مبارك راسه بكل هدوء بتأمل بالبحر مثل ما كان ...
مبارك: جـاي تعطيني كف على الخد الثاني ...
علي: جاي اخليك تقص يدي اللي مديتها عليك ..
##############################
مبارك شو بيتسوي حاله ؟؟
هل بيواصل حياته وكأن ما كان لم يكن؟؟
مروان خلاص استوي ريـال محترم وفوق هذا بيكمل نص دينه .. هل بتنتهي قصته معانا؟؟
عبدالرحمن وين سافر؟؟ ليش سافر؟؟ الله العالم
مبارك وعلي شو بيستوي بينهم؟؟

¤؛° الجزء الثاني و الثلاثون °؛¤
ادار مبارك راسه يشوف منهو اللي ماسكه ...
وارجع مبارك راسه بكل هدوء بتأمل للبحر مثل ما كان ...
مبارك: جـاي تعطيني كف على الخد الثاني ...
علي: جاي اخليك تقص يدي اللي مديتها عليك ..
جلس علي جنب مبارك .. وكردة فعل عكسية مبارك قام من مكانه ...
جدم للبحر و اهو حاط يده في مخباه و يتأمل في الموج و نسيم البحر الرائع ...
علي: أنا آسف .. بس هذا كان لازم يصير ..
مبارك ساكت عنه .. وكأن علي يرمس مع الهوا ...
علي يواصل كلامه: انت خوفتني عليك .. طول اليوم وانا احاتيك .. ولادري شصاير عليك ...
مبارك: شصار عليّ .. انتحرت وإلا مت؟؟
علي تمالك نفسه و غضبه ... وضغط على اسنانه ...
علي: الكلام هذا انا ما احبه ..
مبارك: شتحب تسمع الشيخ .. ؟؟
علي:ابيك ترجع مبارك الأولي ...
مبارك دار راسه له وباندفاع و هجووم...
مبارك: مبارك الاولي مات.. انتهى.. اللي جدامك مبارك المحطم ... مبارك المهزوم اللي انكسر كسر ما ايتجبر .... انا انطعنت .. حس باللوعة اللي فيني.. احبهــا.. أي احبهاا .. وحبتها كل ذرة و كل تكوينه فيني ... شلون راح ااشوفها معاه .. تضحك ... يدها في يده .. تخيل هالموقف وانا اتفرج ...
علي: المفروض تفرح لفرحها .. ودامها اختارت البعد عنك و اختارت غيرك خلاص .. ليش كل هالعذاب كفاية..
مبارك: هذا كلام اللي ما يدري.. اللي ما عاش هالاحساس .. الحب تملك .. شوق.. راح اشتاق لها يا علي
وجثا مبارك على ركبتيه على رمال البحر المبللة.. والدموع في ملقتا عينيه.. وهو يردد كلمة راح اشتاق لها علي ما يدري شيسوي .. رفيجه منهار .. محطم .. وفوق هذا رافض أي يد تنمد له عشان تساعده وتطلعه من اللي اهو فيه ..
علي: تمنى ... تمنى لها الخير ...
مبارك: تعتقد اني اتمنى لها الشر؟؟ وربي قلبي يدعي لها بالسلامة و السعادة وين ما كانت ... لكن ما للمحبوب يد .. القلب اللي حبها ما يروم يكرهها .. وهذي اهي المشكلة حتى لو غالطت نفسي..انا اقدر ازفها لنادر بيدي .. وتكون الابتسامة شاقة حلجي .. لكن من الداخل القلب ينزف ..
علي: يعني انتهت الدنيا بالنسبة لك ؟؟ خلاص ماكو شي يستاهل تعيش عشانه .. وتتمنى الموت بكل ساعة وطاريه ما يفارق لسانك ..
مبارك: افهمني ... تبيني من بعد هذا كله ما اتعب .. التعب اقل كلمه تنقال ...آآآه .. تبيني ولا كأن شي صار لي .. ولا شي انفقد مني ؟؟ ... انا انســان .. بشر ... اتأثر حالي حال غيري .. ليش مطلوب مني دايما اكون الصلب و الجبل اللي ما تهده الريح .. و الريح اللي صابتني ماهي ريح عادية ... ريح اقلبت لي كل موازيني وحياتي و كل خططي المستقبلية... لازم اعيد حساباتي .. اتكيف على وضع انفرض عليّ ... الله لا يحطك باللي انا انحطيت فيه ولا يذوقك من المر اللي ذقته ..
مد علي يده لمبارك عشان يقومه ...
وقف مبارك و قام من على الرمل .. وكانت ملابسة تلعوزت من الطين ...
لكنه رجّع يد علي خايبة ... ولا كأنه شافها ..
وقف مبارك يأشر على البحر ...
مبارك: شوف البحر هذا .. ماقدر يستحمل همّي ... شكيت له و هاج .. ثار وتعاطف معاي .. لكن انت .. = ويأشر لعلي= عطيتني كف ... = ويحط يده على خده= .. وجدام الكل ...
علي:وربي كنت خايف عليك ...
مبارك: تخاف عليّ !!؟؟ ... هـااها ( يضحك بسخرية )
علي: إذا شكيت بحبي لك ولو للحظة .. بيكون هذا اكبر كف اخذته انا في حياتي ...
مبارك منهار: انا تعباان ... تعبان حيل ...
علي: عسى التعب اللي فيك فيني .. ولا اني اشوفك بهالحالة وانا خوك ..
مبارك: راح تعرس هالاسبوع .. مستعيلة .. لكن لما انا قلت ابيها .. قالت مافكر الا بعد ما اكمل دراستي..
علي: انساها مبارك تكفى انساها ..
وحضن علي مبارك ..وتم مبارك يبجي و علي لامه ... وكأنه طفل صغير محتاج لحنان من يواسيه .. كأنه برداان و محتاج لدفء يقيه برد هذه الايام العاصفة ...
ابتعد مبارك عن حضن علي
مبارك : اكتفينا من البجي .. صار الوقت عشان احط حد لكل اللي يصير لي ...
علي: شراح تسوي ...
مبارك: لازم اوقف مع بنت عمي .. و نرفع راسها بين قوم خطيبها ...
علي: مبـــارك !! ..
مبارك: مو تبوني انسى؟؟؟ مو تبوني ولا كأن شي صار؟؟
علي ســاكت ..
مبارك:عن اذنك خوك ... رايح البيت ابدل هدومي .. واشوف اذا محتاجين شي ...
علي: سامحني خوك ...
مبارك: مشكور ..
علي: مشكور؟؟
مبارك: كنت محتاج لهالكف .. لكن ما راح اعديها لك ... لازم تعتذر لي جدام كل اللي كانوا موجودين لما صطرتني ...
وابتسم علي لمبارك و قال له: ما يصير خاطرك الا طيب .. وهذا حقك عليّ...
مبارك بادلة بابتسامة باهتة سرعان ما اختفت و بانت حمرة عينه و الهالات السوداء اللي حواليها ....
مبارك: ما راح تسير انت بعد ..
علي: راح اتم هني شوي .. الجو حلو ...
مبارك: ما خبري بك تحب البحر ..
علي: اللي يرافجك .. يحب البحر و ملحه بعد ..
مبارك:ههههههههههههههههه
علي: الله يدوم هالضحكة يا رب ...
مبارك: تسلم ... في امان الله ..
علي: امان الكريم .. دير بالك الشوارع مرّة زحمة .. عن السرعة..
مبارك: ان شاء الله بابا علي .. تامر شي بعد.؟؟ ..
ابتسم له علي مودعا .:. علي: سلامتك...

__________________

05-15-2008, 03:01 AM

الجزء(9)

++ سـار مبارك عن علي .. وتم علي جالس شوية على شاطي البحر .. و نسيمه يداعب شعره .. لكن وين الشعر الجل تارسه و مسويه سبايكي ... اخ عليك يا شعري لو انك حرير شراة شعر مبارك ... ههههههه .. وضحك على نفسه من هالتفكير .. و ابتسم بخاطره يوم طرى اسم مبارك ... ++
تـذكر علي اخوه عبدالرحمن وانه بيسافر الليلة ..
مسك تلفونه ودق رقمه يتصل عليه لكن لقاه مغلق ...
واتصل على رقم ابوه ... ورد عليه ... وكان معاه عبدالرحمن ...
علي: وينكم يوبا ... معك عبدالرحمن ... طيب عطني اياه اكلمه .. زين زين يبه شاسوي ما قدرت اجيكم .. اوكي عطني اياه ..
علي: مرحبااا السااع بوضاحي ..
عبدالرحمن: مرااحب مليون ..
علي: الحين انت ما لقوا الشغل يدزون غيرك .. امحق اختيار
عبدالرحمن:امحق ها.. شقول ما ينشره عليك .. وينك يالخام ما ييت تسلم على خوك ...
علي: شسوي يخوك ماقدرت .. صادني ظرف جي خلاني ماروم اسير لك المطار.. والحين ماشي وقت بعد..
عبدالرحمن: و اصطلحت ويا مبارك لو للحينه ؟؟
علي: ها ..!! منو قال لك .. اكيد محمد ...
عبدالرحمن: هيه محمد قال لي .. شو .. بشرّ؟
علي: الحمد لله تصالحنا .. وعدت السالفة على خير ...
عبدالرحمن: وانا اخوك .. ترى مبارك ربيع ما يتعوض .. ولا تخلي الدنيا تفرق من بينكم .. ومهما صادتكم ظروف خلوها تشد علاقتكم و تقويها مو تسوون جي انتو هب يهال ...
علي: ان شاء الله ابوية .. قصدي اخويه ... نصايحك على هالراس ...
عبدالرحمن:هههههههه ما تيوز .. اصلا انا استغربت منك هالحركة .. دومك فطين و اعصابك بثلاجة .. شلون طاوعتك نفسك تمد يدك عليه ..
علي: ماقدرت امسك نفسي .. المهم الحينه الساالفة انتهت .. ورجعنا شراة قبل ...
عبدالرحمن: الحمد لله .. وسلم لي عليه .. يللا تامر شي .. خلاص راح نصعد ..
علي: سلامتك .. بس لا تنسى تجيب لك معك تمـر كثير عاد لي وللربع .. وساعة على ذوقك مادري شو مستوي فيها وقفت ساعتي .. وخاطري بشماغ سعودي بعد .. إذا معاه عطر ماركة فرنسية من اللي قلبك يحبهم بعد زين تسوي .. لو تلبق لي معاه جوتي و يكون سيفتي ولونه بني جزاك الله خير ...و
عبدالرحمن: اقول خوك جب واللي يخليك ...
علي: بل ..
عبدالرحمن: في امان الله .. سلم لي على الاهل و الربع ..
علي: امان الكريم خوك ..تلفونك مغلق .. وينه ما بتوديه معاك ؟؟
عبدالرحمن: لا خليته بالبيت .. راح يكون معاي خط الشغل ..
علي: ايواا .. طيب يلاا ... لا إله إلا الله ..
عبدالرحمن:محمد رسول الله ...
+-+-+-+-+-+-+-+
في بيت بوعبدالرحمن
+-+-+-+-+-+-+-+
أم عبد الرحمن و سمــاح كانوا جالسين بالصالة ...
دخلوا عليهم محـمد و سـارة شالة بنتها " الهنوف" وجلسوا معاهم ...
ام عبد الرحمن: ها أميــه وصلتوا اخوكم؟؟
محمد: هيه اماية ... طارت طيارتهم بالسلامة ...
ام عبد الرحمن:وين ابوك عيل ؟؟
سارة: سار مع بو الهنوف القهوة ...
ام عبد الرحمن: ريلج بيخرب لنا الشيبة ...
سارة: وه!! .. شيخربة بعد .. وين مودية اهو بار و إلا مرقص .. الا قهوة ...
ام عبد الرحمن: ابوج ماهو متعود يسير قهاوي .. إلا ريلج يحده ...
محمد: اماية ابوية يحب سيرة القهاوي .. واصلا كلهم ربعه اللي هناك .. وبوالهنوف ماهوب متعود يسير لو ما ابوي يشجعه ..
سارة: وشهد شاهد من اهله... شفتي ؟؟
سماح: معليه اعذرو خالتي ... مسكينة اتم سهرانة للفجر تنطر ردته ...
محمد: زين سيري رقدي .. هب لازم تنطرينه ... الله يهداج اماية
ومحمد يضحك اهو و اخته و سماح من تحت لتحت اتطعبزون على امهم ...
ام عبد الرحمن: الحين انا صرت مطنزة لكم يا مسودين الويه ...
سارة: ويهي ابيض وش حلاتي ...
سماح: انا بعد معاهم خالتي؟؟؟
ام عبد الرحمن: يعني انتي اخير عنهم؟؟ ماكو احد شراة الغالي .. ربي يرده لنا سالم غانم ان شاء الله .....
الجميع: ان شاء الله
سماح: عن اذنكم .. سايرة ارتاح بغرفتي شوية ..
ام عبد الرحمن: اذنج معاج حبيبتي.. وإذا احتجي شي حتى لو نص الليل خبريني .. لا يردج الا السانج غناتي ...
سماح: ان شاء الله خالتي ...
وسارت سماح اصعدت وين غرفتها ...
محمد: آآه يا قلبي آآه ...
ام عبد الرحمن: شفيك بعد ..
محمد: ولا شي .. احسدكم على السعادة والاستقرار اللي انتو فيه ..
سارة: هوو.. لا تعطينا عين ...
ام عبد الرحمن: هاتي الهنوف عنج ...
الهنوف كانت نايمة على ريل امها ... واخذتها من عندها ام عبد الرحمن...
محمد: عساج تشيلين عياالي ان شاء الله قولي آمين ...
وسمية اطالع ولدها بطرف عين : آمين ...
ام عبد الرحمن: باخذ بنتج عندي وقت اللي بتمشين تعالي اخذيها ...
سارة: صــار ...
محمد نطر امه تبتعد و تفدع من الضحك ........ هاهاهااهاههههههههاااااهههههههها.....
سارة: ههه .. ليش جذي انت تسوي لأمك ما تيوز ..
محمد: يا حبيبتي .. لازم اذكرها بكل دقيقة وثانية ولا يروح من بالها اني ابيها .. وماراح انساها ... وتحط في بالها هالشي .. واول ما تخرج تنفذ وعدها و تحيرها لي .. ماروم اصبر اكثر .. آآه الله يهنيك يا قلبي ..
سارة:ههههههه اونك تخبلت ياخوك ...
محمد: انا اللي يطمني عبد الرحمن انه في صفي و يعرف يقنع الوالدة .. والحمد لله ابوي ماهوب معارض جان بتستوي سالفة ثانية بعد ..
سارة: تصدق انها وحشتني ووحشتني سوالفهاا ...
محمد: وحشتج.. على الأقل اتصلي لها .. آآ ه يا قلبي. ومادري جم آه بعد بستحمل .. تقدرين ترمسينها وقت ما تبين لكن انا .. اشمشم اخبارها منج ..
سارة:هههه .. وعليا اخوي .. بعد انا انشغلت ..وهي هم عرس بنت عمها و يمكن مشغولة بالتجهيزات معاهم ...
محمد ويتقرب من اخته .. ويجلس جنبها ... ويمد تلفونه لهــا...
محمد: زين ام الهنوف .. ليش ما تتصلين لها الحين ..
سارة: اخاف انها مشغولة او ارقدت ...
محمد:إذا مشغولة بتقولج .. واذا ارقدت ماراح تشيله .. وبعدين وين ترقد تو الناس ..
سارة: زين ليش ماد لي تلفونك اخوية ..
محمد: اتصلي منه .. الفاتوره كلها عليّ ...
سارة: عندي رصيد في تلفوني .. بعدين انت مينون لو ما تستحي اتصل لها من رقمك .. تبي تفضحنا ...
محمد حاس بوزه: جزاتي يعني اللي بتبرع لج عشان ترمسين كثر ما تبين ...
سارة: شكرا على خدماتك .. وفّرها خووك ..
محمد: وبعدين تعالي انتي ليش ما تاخذين لج خــط بدل ما كل مرة تشحنين رصيدج ..
سارة: بو الهنوف ما يرضى .. يقول انا رصيد وكل يوم بطاقة .. عيل لو خط مفتوح يبي لي ميزانية..
محمد: والله ما ينلام فيج .. عيل حاط لج تلفون البيت جي زينة و كله ترضعين بالجوال 24 ساعة ...
سارة: مو الجوال اكشخ .. برستيج هو انت ما تفهم لسوالف الحريم...
محمد: امحق سوالف ... يلاااا اشوف اتصلي لها ...
سارة: وانت شكو اتصلت ما اتصلت ...
محمد: لا حبيتي حرمتيــــه هذي .. واتصلي لها وخليه على السبيكر ابي اسمع صوتها واهي ترمس ..
سارة: لاخوك اخاف اتطيح ويغشى عليك من حلاة هالصوت ...
محمد:وأأأبــــويه عليج .. يلااا فديتج الغلا ام الهنوفة الحلوة انتي يالله اتصلي ...
سارة: راح اتصل .. لاني لي نية اتصل .. وراح اخليه على السبيكر .. لكن تحمل تقول ولا كلمة ... ولا همس ولا نفس... ولا حركة ..
محمد: ولا نفس .. ان شاء الله اختنق بعد .. يلااا ....
وتدق سارة رقم مرايم ببطء ومحمد يراقب وعلى اعصاابه ...
>> ريــم السالم ...
محمد: فديت هالأسم .. يا محلااااه ومحلا صاحبته ..
سارة: اسكت لا تفضحنا ...
سارة: مرحباااا الساع..
مرايم: مرحباا مليون الغلا ...
محمد ويحط يده على قلبه ويمثل لاخته انه راح يغمى عليه ...
وسارة اخته تأشر له عسب يسكت لا يفضحهم ..
سارة: وينج وين هالغيبة ..
مرايم: التهيت شوي .. انتي شلونج حبيبي ..
محمد .:. يا ويل حالي .. تقول حبيبي .. متى تقول لي حبيبي ...
سارة عصبت من صجها عليه وتحط يدها على فمه عشان يسكت ..
سارة: الحمد لله بخير و نعمة .. بعد بكرة عرس بنت عمج .. خلصتوا كل شي؟؟
مرايم: هيـه الحمد لله .. مع ان دراسة و خبرج تونا طالعين من امتحانات الميد تيرم .. بس كل شي تيسر..
سارة: الحمد لله .. الفال لج غناتي .. وتنورين لنا هالبيت ان شاء الله ..
مرايم بخجل: تسلمين.. انتي في بيت ابوج ؟؟
سارة خافت اونها سمعت شي: هيه الغلا .. شو دراج ؟؟
مرايم: تقولين انور لكم هالبيت.. قلت يعني انج اكيد في بيت ابوج .. يعني مو بيتج لانه منور بوجودج..
محمد شاق الحلج ... ورافع يده يدعي ربــه ويقول متى بس متى ...
سارة:ههههههه فطينة .. بس حبوبة بيت ابوي منور بوجودي بعد ...
مرايم: هذا شي اكيد النور نورج ونور اهل البيت ..
سارة: ما تنغلبين في الرمسـة ...
<< احد يدق باب غرفة مرايم ...
مرايم: لحظة شوي بس اشوف منو بالباب ..
سارة: اوكي الغلا...
الجازية كانت اهي اللي ياية لمرايم .. و سلمت عليها و لمتها .. من زمان ما تلاقوا ... كانوا بس على اتصال بالتلفون من فترة طويلة .. تقريبا من ترخص مبارك من المستفشى ما زارتها ...
مرايم: لحظة بس الجازية ...
<< مرايم: هلا ام الهنوف ..
سارة: بالمهلي حبيبتي ..
مرايم: مسامحة بس راح اقفل الحينه ...
سارة: مسموحة الغلا .. ولا تقطعينا ..
مرايم: ان شاء الله .. ولازم تحظرين العرس انتي وخالتي ام عبدالرحمن ... وسلمي لي عليها ..
محمد وقبض حواجبه .. ليش ما لي انا سلامات ... وينغز اخته ...
سارة: وعرب هم يسلمون عليج كثير السلام .. ما تبينا نرد لهم سلامهم ...
مرايم واحمرت خجلاً وما تروم ترمس شي و الجازية معاها بالغرفة و اطالعها ...
مرايم: سلمي عليهم ..
سارة:هههههههه اونه حد معاج .. على العموم وصل سلامج ..
مرايم : بهالسرعة وصل ..
سارة: مو من درى اني ارمس معاج قام اتميلق و ايتلص وجلس جنبي.. مو الحبايب اللي يرمسون موب أي حد ثاني ..
مرايم:ههههه
محمد يتفدى هالضحكة .. يعلها دووووم يــــــــــاااا رب ...
سارة: يلاا مع السلامة الغلا
مرايم: مع السلامة..
>>> طوط طوط ...
>> >> مرايم و الجازية<<<<
الجازية: اقول مريومة .. منو كان متصل بج ؟؟
مرايم: هذي سارة .. اخت محــمد...
الجازية: ليش متصلة ؟؟ في شي؟؟
مرايم: ماشي .. بس تسأل وتسلم ..
الجازية و تبتسم لمريم بخبث:: وليش ويهج قلب احمر و انتي تكلمينها ...
مريم: تقول في عرب يسلمون علي ..
الجازية:ههههههه
<< دق على الباب ... "" فطيم""
تناديهم عشان ينزلون تحت للعشا ...
>> محمد وسارة<<
محمد: يا قلبي يا قلبي ... بتينني هالبنية ...
سارة: زين ما فضحتنا ... مينون
محمد: من جن بالحب فهو عاقل و من جن بغيره فهو مجنون حبيبتي ..
سارة: الله يكملنا بالعقل و الدين ...
محمد: احبــها احبــــهااااااااا...
سارة: قصر حسّك ...اتيي لنا العيوز تسوي لنا سالفة الحين ...
محمد: متى تستوي حرمتي واعبر عن مشاعري على كيفي ...
سارة: عبر خوك عبر .. بس بينك و بينها ماهوب علانية ...
محمد: انتي ما بتسيرين بيت ريلج؟؟ لمتى بتمين هني .. قومي قومي .. راح اوصلج؟؟
سارة: بتطردني من بيت ابوي بعد.. انا قاعدة على جبدك يالسبال ... وإلا لان مصلحتك خلصت خلاص الحينه... لكن بتشوف .. بتقول لي مرة ثانية تبي شي .. شوف عاد من بيطاوعك..
محمد ويبوس اخته على راسها: مالي غناة عنج ام الهنوف .. انا الا امزح معاج ...
سارة: مزاح ماسخ نفس ويهك ..
محمد: ويهي ماسخ؟؟ ليش ذقتيه...
سارة مبطلة عيونها:: وابويه عليك .. استح على ويهك ..
محمد: انتي شكو في ويهي .. محترة يعني لاني احلى من ريلج؟وحرمتي احلى عنج؟؟
سارة: تخسي إلا انت ... اقوم اسير بيت ريلي ابرك لي..
محمد: تبين اوديج .. اخاف يتأخر عليج واتمين على جبدي مدة اطول بعد..
ويدخل عليهم اخوهم مــاجد ....
ماجد: سلام عليكم
محمد وسارة: وعليكم السلام
محمد: وينك انت للحين برا البيت .؟؟؟
ماجد: سرت مع ربعي .. ليش شنو فيها .. توها الساعة ..
سارة: وين توها الساعة .. الحينة بتيي 10 ..
ماجد: و شو فيها .. انا ماني بنت بتحكروني بالبيت وانام من اساعة 8 المغرب ...
سارة:وا بويه عليك .. ما ينقدر على السانك ...
ماجد: اذا الوقت متأخر ام الهنوف ليش ما سرتي بيت ريلج عيل ..
سارة: انتو شفيكم عليّ ما تستحون .. كل واحد يطردني من صوب ..
ماجد واهو ماشي عنها : من السانج الطويل اختيــه..
سارة: مجوود هذي طريقه تكلم فيها اختك العودة ...
محمد: عيب ماجد لا... شو هالرمسة ...
ماجد: السموحة .. انا ساير غرفتي تبون شي ؟؟
سارة: اكيد رايح تجابل الصنم مالك ...
ماجد: ما تدخلت في شؤؤنج لا اتدخلين في شوؤني ...
محمد: شو استوى على الموضوع الحينه ؟؟
ماجد: الحمد لله .. كل الامور سارت بخير ..
محمد: الحمد لله .. الله يعطيك العافية ما قصرت خوك ..
سارة: أي موضوع ..
ماجد يهز راسه وحقر اخته وخلاها بفضولها وماطاع يقول لها أي شي ...
سارة: طاع هذا .. خلاني ارمس لحالي ... اقول بوجاسم موضوع شنو؟؟
محمد: موضوع جي بيني وبينه .. شي انتي ما تفهمين فيه ..
سارة: عشتوو .. ما عرف فيه ...
ودق تلفون ام الهنوف رنتين ..
سارة: كاهو ريلي وصل .. بسير اخذ بنتي ...
محمد: اخيرا يا ريلج وفكنا منج ومن السانج ..
سارة طقت اخوها على كتفه ..
سارة: شوف حمودو .. اذا اخذت كلامك بجد ما راح تشوف رقعة ويهي مرة ثانية ..
محمد: جان زين بس تسوينها .. لو كم يووم..
وترد سارة و اطق اخوها على نفس الكتف ..
محمد: هي انتي اجوف اعجبتج السالفة .. لحقي ريلج اهوو ..
سارة: الحقة ابرك من مشاهد ويهك ..
محمد: ردت على ويهي .. صج من الحرة ,, ههههههههاااااااي
يت سارة تبي تطق محمد على كتفة للمرة الثالثة ومسك يدها .. وقبضها الباب ...
محمد: سيري لريلج .. بنتج انا بييبها لج السيارة ... عنلاتج ...
وراح محمد اييب بنتها لها ... وسارت هي جدامه ووصلها بالهنوف لعند باب السيارة ..
**********************


العضو المميز	الموضوع المميز	المشرف المميز
وردة سورية	جزء من واقع المجتمع السعودي !!	ـآ‘لـ ً‘ـرٍآبـً‘ ـح

الإهداءات
إضافة إهداء