قصة مرايم مره روعه لا تفوتكم

05-15-2008, 04:07 AM

سماح تكلم عبد الرحمن بالتلفون
++++++++++++++++++++
عبد الرحمن: وحشتيني سماحي
سماح: وانت اكثر .. ليه امس اتصل ماترد علي ..خبرني عنك شحالك وشو سويت ..
عبد الرحمن: يسرج الحال .. حبيبتي نتائج الفحوصات كلها زينة .. وفي امل كبير كبير ان شاء الله .. على فكرة انا امس سويت عملية بسيطة عشان كذا ما كلمتك ..
سماح وتحط يدها على قلبها: عملية وشو؟؟
عبد الرحمن: شي بسيط وايد .. والحمد لله نجحت .. وبعد بكرة انا عندكم بالعين .. لا تحاتين
سماح: يعني انت الحين كويس؟؟ ما بك شي؟
عبد الرحمن: كويس و كويس و كوووويس مرّّة ... انا مبسوط سماحي .. راح يكون عندنا درزن اعيال انتي بس قولي آمين ..
سماح:هههه آمين يا رب ...
عبد الرحمن: فرحانة؟؟
سماح: دامك فرحان اكيد فرحانة ...
عبد الرحمن: شخبار اميه؟؟ سلمي عليها وطمنيها علي .. ماروم اتصل لها بعدين ..
سماح: يوصل لا تحاتي .. امك والشهادة لله شايلتني على كفوف الراحة .. ما تخليني اسوي ولا شي ...
عبد الرحمن: خايفة عليج و .. وعلى الجنين ..
سماح: وام الجنين تنطر جيتك بأسرع وقت ... لان الجنين من دونك ما يسوى ..
عبد الرحمن: انا اعرف شكثر ربي راضي علي و امي تحبني .. لان ربي هداني فيج .. يا اغلى هدية بحياتي ..
سماح: وانت احلى حياة بهالوجود ...
عبد الرحمن: ياللاا ابسكر الحينه .. تصبحين على خير ...
سماح: وانت من اهله .. تغطى زين .. يقولون برد بالرياض ,,,
عبد الرحمن: وانتي بعد حبيبتي .. سماح
سماح: لبيه.؟؟
عبد الرحمن: لبيتي حاية ...ابيج اتديرين بالج على حالج ...
وسكت شوية وكمل
عبدالرحمن: حلليني
سماح تفاجأت ما توقعت تسمع منه هالشي.. واهو بغربة و بعيد عنها .. وكانت تبي تبجي .. خافت و قلبها عورها..
سماح: عن هالرمسة وربي زعل منك
ابتسم لها عبدالرحمن في خاطره و حاول يغير الجو
كملوا سوالفهم شوية و كل حد منهم سار ينام
***++***
عرس مروان
***++***
عرسه صار في فندق ومرة وحدة مسويها حفلة استقبال ...
الجو كان عجيب مع الرزفة الشباب كانوا مرتبشين .. جو وناسه من جد شي ...
شباب القهوة كلهم هنـاك ... "محمد" أسامة " علي" مبارك " والكل .....
دخلوا توايهوا وسلموا على مروان " المعرس" و جماعة العروس ...
محمد:مبروك مبروك .. حيا الله المعرس ..
مروان: يحييك .. الفاال لك
محمد يرفع ايده يدعي بحركة ضحكتهم: يارب يسمع منك .. انت بس ادعي لي في ليلتك المفترجة هذي
مروان:هههههههه لا توصي وانا خوك ...
مبارك: منك المال و منها العيال مروان ...
مروان: تسلم خوك وعقبالك .. مشكور على جيتك ..
مبارك: ولو .. لا تقول جي خوك.. اصلا لو ما عزمتني بعد كنت باييي ... عشان اصدق واشوف بعيني ههههههه
مروان:هههههههه
علي : مبروك مروان ...
مروان: ربي يبارك فيك .. هلا والله بأبو حسن ...
علي شاق الحلج مستانس لانه قال له ابو حسن
علي: هلا بيك ..
مروان: من يوم و ساير لا تنادوني إلا ابو اسحاق ...
اسامة مبطل عيونه: ابو شنو؟؟
مروان: ابو اسحااااااق ...
وضحكوا الجماعة و عدوها ... " ابو اسحاق " !!!!
__________________

¤؛° الجزء الرابع و الثلاثون °؛¤
/////////////////////
بيت ناصر السالم
الظهر
/////////////////////
بالصالة كانت جالسة شما مع ريلها وولدها احمد ...
مريم ياية من المطبخ وحاملة بيدها كوب الكوفي وترشف منه ...
مبارك نازل بسرعة يركض على الدري ...
شافه ابوه ووقفه ...
ناصر: خير ابويه .. شفيك جي مستعيل .. تو ما جيت ...
مريم تكلم مبارك: وينك من البارح ما شفتك
شما: اهو سأل عنج ... كان عرس رفيجه وتم مع ربعه للصبح ...
مريم: حشى شتسوون كل هذا ...
احمد ويبي يشيش ابوه: كانوا في شقة وجمعة شباب .. ومايندرى كل هالوقت شيسوون ...
ناصر: جب انت اسكت ...
مبارك كان في حالة لا تسمح له انه يتكلم ...
ناصر: خير ابويه شفيك؟؟
مبارك منزل راسه و خانقته العبرة و الدمعة بعينه .. بلع ريجه و تكلم ...
مبارك: البقى براسك ...
كل العيون توجهت ناحيته ... والقلوب مقبوضة ..
ناصر: في منو ؟؟؟
مبارك: عبدالرحمن .. اخو علي رفيجي ولد بوعبدالرحمن..
سقط الكوب من عند مرايم و تحطم ووحطت يدها على فمها واليد الثانية على قلبها...
ناصر: لا حول ولا قوة إلا بالله ... إنا لله .. هالولد الطيب ... من شو؟ لا تقول حادث؟
مبارك: في التفجيرات اللي صارت بالرياض ..
شما: حسبي الله ونعم الوكيل ... حسبنا الله ونعم الوكيل ...
__________________

05-15-2008, 04:12 AM

/////////////////////
العزا في بيت بوعبدالرحمن
/////////////////////
الحريم كلهم في الصالة ...
ام عبدالرحمن جالسة جنب بنتها اللي حاطة راسها على ريول امها وذابحه نفسها من الصياح ...
ام عبدالرحمن الدموع تسقط من عيونها من دون صوت ... القلب يتعذب والاحشاء تتقطع و صراخ الصمت يقطع الجميع ...
وعلى طرف كانو حريم يتكلمون و يتهامسون ...
الحرمة: وين مرته ما بينت؟؟
حرمة ثانية: يقولون انها بالمستشفى وحالتها حالة ...
الحرمة: المسكينة تبجي على شبابها ...
الثانية: يقولون انها حامل بعد ... شلون بتقدر تربيه لحالها وتوها اصغيرة ...
الحرمة: ما يندرى .. بس اكيد اهله ما بيخلونها .. اسمه من ريحته وما أعز من الولد الا ولد الولد ...
الثانية: حسبي الله عليهم .. ريال مسكين رايح البلاد الطاهرة بأمان الله ما تهنى بشبابه ..
الحرمة: الله يجيرنا .. ويغمد روحه الجنة ...ويصبر اهله ..
دخلت عليهم "الجدة حصة" و شما " أم احمد" ومعاها "مريم" و"فطيــم" ...
سلموا على اهل سمـاح و بعدين على أم عبدالرحمن وسارة ...
اول ما شافت وسمية " ام عبدالرحمن " مريم احضنتها بقوة ... وتمت تبجي ... و بصوت عالي منهارة ... ومرايم تبجي معاهاا ...
وحضنت شما ام عبدالرحمن و سارة احضنت مرايم ..
ام عبدالرحمن: راح ولدي يا ام احمد رااح ..
شما: اذكري الله يام عبدالرحمن..
ام عبدالرحمن: راح عبد الرحمن رااح .. اللي تناديني بأسمه راح يا شما .. ولدي آآه
شما: اطلبي له الرحمة ياوخيتي ..
ام عبدالرحمن: عمره ما عصاني .. كان سند لي ولأبوه .. راح الطيب .. اقتلوه ..
شما: حسبي الله ونعم الوكيل ...
وسارة كل ما سمعت رمسة امها زاادت في البكى ...
مريم من بين دموعها: اذكري الله يا خالتي ..
ام عبدالرحمن: والنعم بالله .. آآه يا مرايم .. آآه يا قلبي ..
سارة: يمه .. يمه شفيج ...
ام عبدالرحمن فقدت الوعي .. وتلاحقوها بالماي ..
ودوها غرفتها ويابوا لها الدكتور ...
++++++++++++++++
في عزا الرياييل
++++++++++++++++
بو عبدالرحمن مو قادر يمنع دموعه وماجد ولده لاصق فيه وذابح عمره من البجي ...
... وعلي منهار كليــا ... وجنبه مبارك يهديه ..
محمد حالته حالة وعيونه حمر من كثر البجي .. ومعاه اسامة بدل ما يواسيه اهو بعد يبجي معه ..
عبدالرحمن كان طيب مع الكل .. واللي يعرفه اوما يعرفه تأثر من اللي صابه ...
مـاجد كان لاصق في ابوه .. ويبجي من قلب ...
ترى دموع الرجال ماهي سهلة وما تنزل بسهولة .. ولكن هذا يهز جبال ماهوب بس الرجال ...
بو عبدالرحمن ينادي على محمد
بو عبدالرحمن: يبـه .. ابيك تروح اتطمن على مرت اخوك بالمستشفى ..
محمد: ان شاء الله امرهم المغرب ...
بو عبدالرحمن والدموع بعينه: الله يخليك ويرضى عليك يا ولدي
وحضن محمد ابوه وبجي من الخاطر ...
************************
كثيرين يعتقدون ان بكاء الرجل ضعف منه و لكني اراه وسيله للراحه النفسية.. البعض يقول ان الرجل لابد ان تكون كرامته قويه بحيث يتماسك ولا يبكي امام الاخرين.. ولا يضعف امام أي مشكله تواجهه.. ولكنهم يتناسون انه في النهايه انسان بمشاعر واحساس.. وانه يحتاج ان يعبر عن نفسه ومشاعره وينفس عن همومه ..
قد تكون المرأة اكثر بكاء من الرجل.. لكن هناك مواقف لا تفرق بين المرأة والرجل وما اصاب عائلة الماجد ليس مجرد هم .. بل انها صاعقة صعقت قلبهم وحطمت نفوسهم ..
كل منا مر بمراحل مختلفة من حياته.. والانسان منذ ولادته وهو يتعلم من هذه الحياة ويكتسب من خلالها الخبرات منها الجيدة و منها السيئة ... وبالطبع لكل منها تأثير على مجرى حياته.... وهناك الكثير من الحوادث التي لا تترك أي أثرفي حياتنا ....وبنفس الوقت قد يكون هناك حادث واحد يقلب حياتنا بأكملها ...
مذا سيفعل هذا الحدث بأبطال قصتنا .. اكيد سيؤثر عليهم .. كيف .. الله يعلم ...
************************
++++++===++++++
محمد بغــرفته
++++++===++++++
مستلقي على السرير وهو مغمض وحاط يده على عيونه ...
ابي حد يمسح دموعي .. ويخفف آلامي .. ويلملم جروحي ...
رحت وخليتنا يابو ضاحي ... وربي اني محتاج لك ...
دموع محمد كانت تنزل من تحت يده اللي مغطي بها ويهه ...
اخذ تلفونه اللي قافله من جم يوم .. من وفاة اخوه الغالي " عبدالرحمن "
"مـــــرايـم" ... وينج يا الريم الحينه عني ...
ونزل راسه بحزن .. مرايم بعيدة .. ومايندرى إذا كانت تحس فيني الحينه وإلأأ ..؟؟! ..
ايميلها عندي ... يا ترى جالسة الحينه وإلا نايمة .. ما ينام إلا خالي البال ...
جلس على الكمبيوتر ... واول ما جلس دمعت عيونه.. لانه حاط خلفية الشاشة صورة عائليه كل الاخوان عندهم شراتها... اخذوها لما كانوا راحيين سيرة بر وحتى ابوهم معهم ...
فتح ايميله ولقى فيه فوق ال 100 رسالة يديدة لكنه طنشهم كلهم وراح يبي يرسل رسالة.. وماهي أي رسالة ولأي حد ...
هذي رسالة للغالية اللي اخذت قلبه و عقله ... ويريدها توقف معه و تواسيه بحزنه ...
كتب عنوانها " رسـالة من قلب تعبان هايم بحب المرايم "
---------
مريم كانت بغرفتها
---------
فاتحة الكمبيوتر والمسنجر لكنها جالسة اوففلاين لانها كانت تشتغل على بروجكت الجامعة ..
وصلها تنبيه ان اكو رسالة وصلتها على البريد الالكتروني والمرسل محمد الماجد ... !!!
حست ان قلبها انقبض ...
فتحت الايميل ودقات قلبها في تسارع .. خافت .. ارتبكت .. قامت قفلت الباب ....
فتحت الINBOX ياويل حالي شو هالعنوان
*****رسـالة من قلب تعبان هايم بحب المرايم*****
إلى اغلى إنسانة بالقلب مسكنها ... عساج بخير وعسى باقي مع الذكرى غلانا ...
ما كان ودي اول رسالة مني تكون احزان ومأسى ..
احنا محتاجك وربي الشاهد مشتاقلك ... قلبي في شقا وايام الهنا عني ولّت انا ...
وانا بهذا المكان احس اني ماني بأمان .. هذا غدر الزمان حرمني من أغلى انسان ..
ماأسهل الكلمة على قلب الانسان .. لما ينطق أحبك وساعة الجد يبيع بأرخص الاثمان ...
نرضى بمقسـومنا ما أنتذمر ... واللي يعطينا ربنا فيه راضين ...
احبج وربي الشاهد يا مريم ...ومحتاجج توقفين معاي باللي حصل لي ...
احسن اني وحيد .. ودمعتي تبي من يمسحها ..
خسرت انسان غالي .. وحاسس اني بهالدنيا لحالي ...
مريم انا محتاج لحد اسولف معاه .. محتاج لقلب يلمني بدفاه ..
يمكن تقولين عني جرئ .. او فقدي لاخوي خلاني مجنون ...
وربي يا مريم اني حاس مهزوم ... وقلبي الهايم بحبج صار مكسور ...
انا انكسرت ..
ردي علي لو سمحتي ماتعرفين شلون ردج بيرد لي الروح وبيرفع من معنوياتي..
========================
وهذي اهي كل الرسالة ...
مريم من قرأتها طاحت دموعها ...
شتسوي ماتدري ..
تخاف ترد عليه ...
وابويه .. لو حد يشوف هالرسالة شو اسوي انا ...
شسوي .. ارد عليه .. اكيد بيستانس .. اكيد راح اخف عليه بأي كلمة اكتبها له .. لكن انا اخاف .. ماعرف .. ولامرة سويتها ... زين شسوي ...
اهو محتاج لي ... وانا بعد .. انا احبــه .. واهو الحين في ضيق .. واقدر اخفف عليه ...
جلست عالكمبيوتر ... راحت لايميلها اللي كان للحين مفتوح ...
فتحت الرسالة مرة ثانية اللي حفظت كل حرف من حروفها ... وسوت لها رد ...
شو اكتب له يا ربي .. مابي شي يديني لو احد شاف الرسالة ...
لا لا شو حد يشوفها .. اكيد مابيخلي حد يقرب من ايميله ... ياربي شسوي ...
بتوكل على الله .. ومن توكل على الله فهو حسبه ...
ارسلت له رسالة ...
عنوانها " السلام عليكم ورحمة الله "
Send
وارسلت الرسالة .....
الحين تبي تحذف الرسالة اللي اهو دزها لها .. لكن ما تروم .. قلبها ما يطاوعها ...
لكنها هم حذفتها من بريدهاا .... وقبل هذا سوتها برنت من دون العنوان واحتفظت فيها ....
++++++===++++++
محمد بغرفته جالس عالكمبيوتر
++++++===++++++
ينتظر على احر من الجمر ان يوصله رد .. حتى لو كانت رسالة فاضية .. المهم انه يحس انها معاه ... وتشاركه باللي اهو فيه ...
تم يالس .. نص ساعة .. ساعة .. ساعتين .. لحد ما بدأ ييأس ... !!!
>>>>>>وصلتك رسالة ...
من ... ريم السالم ...
" السلام عليكم ورحمة الله "
+++البقى براسك ...
كل شي يصير حكمة من رب العالمين .. ويخلق الله عسر واحد ويسرين
دير بالك على نفسك وانت اقوى من هالمحنة بعون الله +++
فديتج يا بعد قلبي ... هالكلمات هذي حتى لو انها قليلة لكنها تعني لي وايد .. وايد .. وايد ...
على طول ارسل لها رسالة ثانية ... !!!
محتواها
== مشكورة وايد على الايميل وما تعرفين شكثر انج هونتي علي اللي انا فيه.. ربي يحفطج ويخليج لي يالغالية ويكفي اني احس بحبج بقلبي .. وحبي بقلبج .. بوجودج معاي كل الهموم بإذن الله تهون ..
تصبحين على خير ==
مريم ردت عليه بقلبها وانت من اهل الخير .. يــا .. ابتسمت بينها و بين نفسها ... ... وامسحت الرسالة نفس اللي قبلها .. واتركت كل شي وراحت تنام...
حتى محمد .. حس انه ارتاح شوية ... وراح لسريره واهو يحاول ينام من عقب هالتعب كله ...
+++++++++++++++
مستشفى توام
+++++++++++++++
محمـد وأم عبد الرحمن رايحين يشوفون حرمة ولدهم وفقيدهم اللي فجع قلوبهم ...
وصادفوا أمها وابوها واخوها طلال جالسين بالاستراحة ...
يتوايهون الرجاجيل ...
محمد: السلام عليكم والرحمة ..
ابوها " بوطلال": وعليكم السلام ورحمة العلام ... عظّم الله اجركم يا ولدي ..
طلال: البقى براسك ..
محمد: اجرنا واجركم ...
اما ام عبد الرحمن من سلمت على ام سماح طاحت دموعها ...
بو طلال: ليش تعبتوا نفسكم وتعبت الوالدة معاك يا ولدي ...
محمد: اهي اللي لزمت عليّ تجي واتطمن عليها ...
ام عبد الرحمن: هذي من ريحة الغالي يابو طلال ...
ام سماح: الله يرحمه ويغمد روحه الجنة =+ وبكت هي بعد +=
ام عبد الرحمن: ابي اشوفها ...
ام سماح: مدري اذا يسمحون لكم .. لان حالتها النفسية تعبانة .. واذا توتعي تبجي و اتأثر حالتها ... عشان جي ما يخلونا ندخل عليها ..
ام عبد الرحمن: و الجنين شحاله؟؟
الكل يتطالعون في بعض .. وينزلون راسهم ما يدرون بشو يردون ...
محمد: صار شي لولدنا؟؟
بو طلال: ماراح يصير الا الخير ان شاء الله ..
وصل الدكتور المتابع لحالة سمــاح ... واستئأذنو منه ان تدخل عليها ام عبد الرحمن ... وافق الدكتور وادخلت لها بروحها ...
تركوها لحالها مع سماح ...
سماح اول ما حست بوجود ام عبد الرحمن بعد ما مسكت يدها ... فتحت عينها بدون ما اتحرك شي من جسمها.. حالتها النفسية اتعبتها جسديا وايد .. لدرجة ان ريولها منشلة .. ويبي لها علاج طويل عشان ترجع تمشي على ريولها ...
ام عبد الرحمن: شحالج بنتيه ..؟؟
وسقطت دموع سماح ردا على سؤال ام زوجها ... أم عبد الرحمن ...
ام عبد الرحمن وتحاول تتمالك نفسها عن تبجي ...
ام عبد الرحمن: شدي حيلج يا بنتي ... ربج اخذ امانته وهذا قضاء الله وقدره ...
وهني ام عبد الرحمن ما قدرت تستحمل اكثر وتساقطت دموعها ... وضغطت سماح بيدها على يد ام عبد الرحمن لتواسيها.. لانها مهما كانت مأساتها وحبها لزوجها ما يعادله محبة ام عبد الرحمن لولدها اللي كانت تحبه و تعزه دون الكل ....
ام عبد الرحمن: انا الحينه سايرة ... ابي اييج بكرة وانتي بحال احسن .. اذا مو عشانج وعلى عشان خاطري .. عشان ولدج .. ولد عبد الرحمن وكل ما بقى لنا من ريحته ...
وزاد بكاء ودموع سماح و صارت تبكي بهستيرية ودموع لا تتوقف .. ووصلت لدرجة الاختنااق .... حتى تسارع لها الاطباء .. واعطوها ابرة مهدئة ...
ومشوا بعد ما سلموا على اهلها ...
واهم بيركبون بالمصعد بيسرون البيت ... طلبت ام عبد الرحمن من محمد ان اول يروحون للطبيب المعالج يستفسرون عن حالة سماح ...
الدكتور: ماكو حمل ولا شي ..
الاثنين منصدمين !!!!!
ام عبد الرحمن: انا اقصد سماح العالي ... مرت ولدي ..!!
محمد: تأكد دكتور واللي يخليك ..
الدكتور: انا متابع الحالة من دخلت المستشفى .. وماكو حمل ولا جنين ...
ام عبد الرحمن: يعني البنت سقطت اللي ببطنها؟؟ واا بويه عليها يا ويلي .. كله من الصدمة!!
الدكتور: ماشي حمل من الاساس !!
محمد:ماشي؟
الكتور: هيه .. وكل اوراقها عندي .. وتوضح هذا الشي ...
ام عبد الرحمن: يعني شو؟؟؟
ويطالع محمد بأمه بعلامات استغراب !!
وتطلع امه من غرفة الطبيب بسرعة...
محمد: مشكور دكتور مع السلامة
الدكتور: مع السلامة ...!!
<< خارج غرفة الطبيب
محمد: شبلاج اميه ..
ام عبد الرحمن: انت ما سمعت .. يقول ماشي حمل .. اياا عليك يا ولدي ...
محمد: يعني شو امـي؟؟
ام عبد الرحمن : تعال معاي ...
وراحوا لعند غرفة سماح ... وشافت بس امها يالسة عندها...
دخلت عليهم ام عبد الرحمن وكانت سماح مبطلة عيونها وامها تقرأ عليها آيات من كتاب الله ...
ام عبد الرحمن: ليش سويتي جذي يابنتيه؟؟؟ انا اعتبرتج شراة سارة .. ليه تخدعينا ...
سماح تطالع في ام عبدالرحمن بعيون استغراب وماتدري شو صاير ...
ام طلال" ام سماح" : شو مستوي يأم عبد الرحمن؟؟ ليش هالرمسة؟؟
ام عبد الرحمن: مسوية حالج ما تدرين يام طلال .. ليش تخدعوناا ... ليش تكذبون علينا ... خدعتوا ولدي وخدعتونا... !!
سماح: خالتي!!
ام عبد الرحمن: طلع صوتج يام ضاحي .. وين ضاحي ؟؟ كسرتي قلوبنا .. منج لله ..
ام طلال: صلي على النبي يا ام عبد الرحمن انتي ما تدرين شو السالفة..
ام عبد الرحمن: ادري بوشو .. راح الغالي واهو متأمل بييبون له ولي العهد ... ذبحتونا للمرة ثانية .. بالاول اللي ما يخافون الله بوليد قلبي اذبحوا حشاشة يوفي.. والثانية بوليده يا سماح ... حرام عليج ... حسبنا الله ونعم الوكيل ...

__________________

05-15-2008, 04:13 AM

وانهارت سماح كلياً ... !!
وطلعت ام عبد الرحمن واهي تبجي ومنقهرة من حرمة ولدها "عبد الرحمن" .. وينك يا يمه تركتني ورحت عني ... من وين اجيب الصبر على فرقااك ..

==============
شمس ونـادر بشقتهم
==============
نادر جالس بالصالة يتابع القناة الرياضية ...
يات له شمس وحاملة معها سلة الفواكه والعصير و حطتهم جدامه عالطاولة ...
نادر كان مندمج مع التفزيون و شمس كانت تقطع له الفواكه و تصب له العصير ...
شمس: حبيبي رحت العزا خلفت على بوعبدالرحمن .؟؟
نادر انتبه لها و خفّض من صوت التلفزيون ...
نادر: هيـه .. الله يكون بعونهم و يصبرهم على ما بلاهم ...
شمس: وشلون حالتهم الحينه؟؟
نادر: الشي ماهوب هين .. وعبدالرحمن والشهادة لله ريـال محبوب ...
شمس: في هالزمن الطيب اهو اللي يروح و الظالم باقي مكانه ...!
نادر: شو هالرمسة يا شموستي ... هذا قدر الله و حكمته ... وكل واحد ما يروح إلا بيومه ...
شمس: استغفر الله ربي
وتقص له شمس فاكهة وتعطيه ياكل..و اهو بعدها يواصل حديثه ..
نادر: واللي تقولين عنهم الظالمين .. ربج يزيد من عمرهم عشان يزيد ظلمهم و يكثر عذابهم بالآخرة ...
شمس: والنعم بالله ...
نادر:وانتي ما رحتي يم الحريم؟؟
شمس: لأ .. ماحد رضى اروح ..يدتي تقول ماهوب زين لأني توني عروس يديدة و اروح عزا او بيت احد متوفي ...
نادر: ليش ان شاء الله بعد؟؟
شمس: مادري .. بس يقولون فال موب زين ...
نادر: وربي هذي رمسة حريم .. شو هالخرابيط فال وما فال .. سكتي واللي يعافيج..
شمس: طيب ليه تسكتني .. هذا اللي قالو لي ...
نادر: انتي انسانة واعية وفاهمة .. موب رمسة عياييز تخليج ما تقومين بواجب مثل هذا .. على الأقل لانهم اهلي ...
شمس: مايصير خاطرك إلا طيب.. كل شي ولا زعلك ...
نادر: ولا انا اروم ازعلج غناتي ...
شمس: اوكي بكرة شنو تبيني اطبخ لك عالغدا؟؟؟
نادر: وليه انتي تطبخين .. نطلب لنا أي اورد من مطعم وخلاص...!
شمس: احنا من تزوجنا انت ما ذقت طباخي ...
نادرويفر راسه عنها: مو هذا اللي خايف منه !!!
شمس: لا والله .. احلف بس؟؟؟.. طباخي ماكو احلى عنه .. كفاية امي الغالية الله يرحمها برحمته اهي اللي علمتني الطباخ..
نادر ويرفع يده للسماء: الله يرحمج يا عمتي ...
نادر: انزين شماسي .. يعني انتي طبختي من قبل في بيت اهلج؟؟
شمس: لأ .. بس اعرف .. الطباخ ما يبي له شي ...
نادر: انزين طبخي لي كبسـة لحم تعرفين؟؟
شمس وبدون تردد: اكيد ماكو اسهل منه ..
نادر: خلاص عيل بكرة سويلي ...
شمس بفرح: من عيوني .. ولا يهمك
نادر: تسلم عيونج يا بعد عيني ..
شمس: تأكد مسبقا راح تاكل اصابعك وراها ,,,
نادر: فداج الغلا .. نشوف بكرة .. يا انتسمم و نروح فيها ... يا الله يستر علينا ...
وتطقه شمس على خفيف فوق كتفه .. ويضحك اهو عليها ....
================
في بيت بو عبد الرحمن
================
سارة وابوها جالسين بالصالة و الهنوف على ريل جدها .. وسارة حاطة يدها على خدها وتطالع في اللا شيء...
بو عبدالرحمن: يا بنيتي لمتى بتردين بيت ريلج صار لج اسبوع من تركتيه ..
سارة: ماروم اترككم..
بو عبدالرحمن: ريلج له حق عليج .. والمسكين ماهوب مقصر اهو الثاني معانا ...
سارة: يصير خير يوبا ...
دخلت ام عبدالرحمن حالتها النفسية عالزيرو ..
ومحمد داخل بسرعة ورا امه وسويش السيارة بيده لانه بسرعة قفل السيارة ولحق امه ...
سارة:شو مستوي؟؟
وسمية: راح ولد عبدالرحمن راح ... !!
وترك ابو عبدالرحمن الهنوف على الارض ..
ماحد مستحمل يسمع اخبار سيئة جديدة .. الكل هب في حالة .. وصدمتين بالراس توجع ..
بو عبدالرحمن: شو صار على ولد الغالي؟؟
وسمية وهي تبجي: ماكو ولد يابو عبدالرحمن ولا شي .. بنت العالي كانت تضحك علينا .. ماكو حمل ولا كو شي ..
سارة: شلون .. عبدالرحمن بنفسه أأكد لنا هالشي ...
وسمية: انضحك عليه .. ولدي طول عمره طيب .. ماهقى ان اقرب الناس له واللي اهي زوجته تجذب عليه ... آآه يا ولدي .. مارحموننا بموتتك .. والحينه ذبحونا بولدك ...
بو عبدالرحمن: شو هالرمسة .. اذكري الله ..
وسمية: انت ما عندك قلب .. هذا ولدي .. ولدي ... هذا عبدالرحمن تدري يعني شنوو .. هذا اول فرحة لي .. اول من قال لي يمه .. عمره ما عصاني .. دوم رافع راسي ... اخذوه مني بسهولة .. راح بموته شنيعة .. افجعوا قلبي فيه ... افجعوني بالغالـــي ... آآه
بو عبدالرحمن: الله يسامحج ويكون بعونج يأم عبدالرحمن.. مثل ما عبدالرحمن ولدج .. اهو ولدي وسندي بهالدنيا ... وانكسر ظهري بوفاته ...
وكان بيتركهم لولا ان الجرس ضرب ... وراح يشوفه ...
اللي جاي كان واحد من السفارة .. جايب صندوق وفيه اغراض عبدالرحمن من الرياض ...
جابو الصندوق وحطوه بالصالة وخبرهم بو عبدالرحمن شو هذا .. افتحوه .. وطلعت ملابس عبدالرحمن واغراضة اللي كان حاملهم معاه بهالسفرة المشؤؤمة.. وشوية هدايا جايبهم لاهله .. واوراق وصور .. ومغلف اصفر ...
يلست ام عبدالرحمن تشوف اللي بالصندوق ...
تاخذ ثياب عبدالرحمن وتشمهم .. وتبجي ... هذا من ريحة الغالي .. وهذي هدومه ...
وشافت صورة صغيرة عائلية له ولاخوانه ... اختفيت منهم يا ولدي .. وماعدت موجود..
وتلملم اغراضه بحضنها واهي تبكي ... و تحاول سارة تبعدها واهي الثانية دموعها تارسة عينها ...
سارة تحاول تهدي امهاا لكنها ما تروم .. واهي نفسها من شافت اغراض عبدالرحمن ما قدرت تستحمل .. وقلبها عورها.. معقولة عبد الرحمن يروح بكل هالسهولة .. وبديار غريبة عن اهله و بموتة شنيعة مثل هذي..
محمد يحاول يبعد الصندوق عن امه لكنها تبعده عنها: خلني يا ولدي.. اخوك راح وماعندي غير اشم ريحته ... لا تمنعوني حتى من هالشي ...احرموني منه و من حنانه .. لا تزيدونيه وتحرمونيه من بقاياه ... ضيعتني يا ولـدي .. يا حسرة قلبي عليك وعلى شبابك ...
%%%%%%%%%
بيت فهد وسعد السالم
%%%%%%%%%
سعديدخل البيت و معاه ولده و حرمته ....
>> انتقل سعد مع زوجته للعيش في بيت اخوه " بيته اهو بعد" من بعد ما علم اهله عن سالفة زواجه و استقلوا في الطابق الأرضي والفوقي كان لفهد و بدور<<
وفهد نازل من الدري وحامل بيده جريدة ...
فهد: قوة اخوية شحالك؟
سعد: يخير يعل لك الخير ..
فهد: شحالج مرت اخويه؟؟
ليليان: بخير والحمد لله ... انت شو احوالك؟
فهد: نحمد الله على كل حال يام سالم...
ليليان: الحمد له
فهد: وينك من بدري؟؟
سعد: سلوم كان عنده تطعيم و فحص بالمستشفى وتوني ييت ...
ويلاعب فهد خدود سلوم الكبيرة: هالولد حلو كأنه لعبة .. العيون الزرق ماشاء الله و البياض وصاير كأنه دب و خدوده الحلوين اللي تخلي غصب الواحد يلعب فيهم ...
سعد: خدود ولدي لا يروحون ...
فهد: ولدك ماخذ منك الا خدودك ...
ليليان: وانا اقول .. ماذا مستوي وليش ولدي خدوده جذي طلع ابوه كان كذا ...
سعد: سكتي واللي يعافيج .. الا لهجة سعودية و مرة بالفصحى و مرة رمسة اماراتية ....
ليليان: تبيني ارمس معك بالالماني؟؟
سعد: يكون احسن يا معودة ...
واطالعته ليليان بغرور وبأبتسامة مرسومة على ويهها و قالت له واهي ماشية...
ليليان: انا اعتز بكوني عربيــة .. ليه اتكلم بلغة الاجانب...
فهد: هههههههاااااي جوااااااب مسكت يا خوك ..
سعد: معليه اوريها ...
فهد: ما غلطت الحرمة ...
سعد: وانت شكو اتدخل بيني و بين حرمتيه؟؟!
فهد: آنا!!!!!!! ليش شو قلت لك او لها انا الحينه ..؟؟؟؟!!
سعد: ولا شي .. بس اغطي على فشلتي ...
فهد:ههههههههه هاهاهاها نياهاااااااهههههههههها ....
سعد: حاسب على حلجك من الضحك وانا خوك ...
فهد: ضحكتني من قلب .. حسبي الله على بليسك
توهم افتكروا يجلسون على الكراسي بالصالة تحت ...
فهد: شخبارك .. شكو ماكو؟؟؟
سعد: ماشي .. الحال على ما هو عليه ... بس ياخوك يمكن ادور لي بيت واطلع عنكم ؟؟
فهد: افا .. ليش عاد جي .. حرمتك متضايقة من وجودي ما تاخذ راحتها بالبيت؟؟
سعد: لا وانا خوك .. بس مابي اضايقك وابيك تاخذ راحتك في بيتك ...
فهد: شو هالرمسة اليدية بعد .. هذا بيتك مثل ماهو بيتي .. وانا ما رضيت انك تدفع نص حق البيت الا عشان لا اسمع منك هالرمسة البايخة ...
سعد: يعني راح اعيش طول حياتي في هالبيت يابو بدر؟؟
فهد: وشنو فيها ... الغرف وايد .. واعيالك اهم عيالي .. او اذا كنت متضايق تقدر تاخذ الملحق و توسعـــه وتسويه ملاصق للبيت داخل .. بس بتكون منفصل كأنك بيت لحالك ... وكذا نحل المشكلة ..
سعد: ان شاء الله ماكو مشاكل .. بس انا كنت افكر من كم يوم بهالسالفة .. وفكرتك هذي واايد زينة واحسن حل ...
فهد: الله لا يفرق شملنا و يبعد بينا ..
سعد: آمين يا رب العالمين ...
فهد: شالح اخوك راشد ما تدري عنه؟؟
سعد: مدري عنه من زماان .. من اخر مرة كنت في بيت ناصر وياب عياله عشان يتعرفون على ليليان ...
فهد: انا سمعت شوية كلام عن شغله .. يقولون فرع الشركة اليديد خسران...
سعد: لالا .. غريبة .. اخوك اداري من الدرجة الأولى وبزنس مان ناجح ... شلون صار جي ...
فهد: مدري .. بس هذا اللي سمعته و يبي لنا نسأل عنه ونوقف معاه
سعد: مع انه نقل قريب مننا من بوظبي الى العين لكن هم ما نشوفه.. بس ولده سيف ما يقصر بين فترة و فترة يسأل علي ..
فهد: سيف ونعم الرجال .. الله يحميه لشبابه و يخليه لابوه ...
سعد: ذكرتني بالمرحوم عبدالرحمن .. الله يغمد روحه الجنة
فهد: آمين يا رب العالمين ..
سعد: حرمته عندنا بالمستشفى وحالتها النفسية تعبانة وايد .. الله يكون بعونها ...
فهد: الله يرحمه و يصبر اهله ..
--=--=--=--
بيت بوعبدالرحمن
--=--=--=--
مــاجد جالس بغرفته عالكمبيوتر و مشغل صوت القرآن الكريم بصوت رائع يُخشع القلوب ...
ابو عبدالرحمن كان طايف على غرفة ولده .. ولما سمع صوت القرآان بهالليل ومن غرفة اصغر عياله رق قلبه عليه .. ماجد وايد متعلق بعبدالرحمن ويحبـه .. والكل يدري ان اسراره عند عبدالرحمن ومتعبره ابوه الثاني ..
دق بوعبدالرحمن الباب على ماجد ومارد عليه يمكن لان الصوت عالي .. فدخل بو عبدالرحمن غرفه ولده .. ولقى ماجد جالس عالكمبيوتر و حاط راسه على الكيبورد ومغطي وييه بيده ...
بو عبدالرحمن حسب ان ماجد نايم وحاول يصحيه ... لكن ماجد كان يالس .. لكنه يبكي ...
بوعبدالرحمن: يبجي يا ماجد ..
وتزيد بكاء ودموع مايد ... ويحضنه ابوه ..
ماجد: يبه انا ما راح اشوف عبدالرحمن مرة ثانية !!!!
بو عبدالرحمن: اذكر الله يا ولدي .. هذا قضاء رب العالمين ومابيدنا شي ..
ماجد: يوبا ..؟
بو عبدالرحمن: سم يا ولدي ؟؟
ماجد: يوبا .. عبدالرحمن كان يدري ان سماح ماهي بحامل ....
بو عبدالرحمن: وانت شدراك ..؟؟؟ اهو قال لك..؟؟
ماجد: مو بالضبط .. بس اكيد انه يدري
بوعبدالرحمن: زين قول لي شدراك شو عرفك؟؟
وحكى ماجد لابوه ماحدث بينه وبين عبدالرحمن ....
السالفة صارت قبل لا يسافر عبدالرحمن تقريبا بشهر ...
وقت صلاة الصبح اوتعيت وكان عبدالرحمن يصلي بالصالة الفوقانية .. وكان يدعو بصوت خاشع .. وعيونه ملئ بالدموع ..
للحينه اذكر دعاءه .. لاني يلست استمع لصوته و دعاءه بخشوع لله سبحانه و تعالي ...
""اللهم اني اسألك من خير ما سألك به محمد صلى الله عليه وآله وسلم واستعيذ بك من شر ما استعاذ به محمد صلى الله عليه وآله...
اللهم يا ذا الجلال والإكرام يا حي يا قيوم ندعوك باسمك الأعظم الذي إذا دعيت به أجبت,أن تبسط على والداي من بركاتك ورحمتك ورزقك ...
اللهم ألبسهما العافية حتى يهنئا بالمعيشة , واختم لهما بالمغفرة حتى لا تضرهما الذنوب , اللهم اكفيهما كل هول دون الجنة حتى تبَلغهما إياها .. برحمتك يا ارحم الراحمين
اللهم لا تجعل لي و لهما ذنبا إلا غفرته , ولا هما إلافرجته , ولا حاجة من حوائج الدنيا هي لك رضا ولهما ولي فيها صلاح إلا قضيتها ...
اللهم و أقر أعينهما بما يتمنياه لنا في الدنيا ... وارزقني ذرية صالحة ...
اللهم إجعل أوقاتهما بذكرك معمورة ....و اللهم أسعدهما بتقواك
اللهم اجعلهما في ضمانك وأمانك وإحسانك
اللهم ارزقهما عيشا قارا , ورزقا دارا , وعملا بارا ..
اللهم وأعنا على برهما حتى يرضيا عنا فترضى , اللهم اعنا على الإحسان إليهما في كبرهما .... اللهم ورضهم علينا تمام الرضى...للهم ارزقني زهو جنانك , وأشربني من حوض نبيك واسكني دار تضيء بنور وجهك ........
اللهم اجعلنا ممن يورثون الجنان ويبشرون بروح وريحان ورب غير غضبان ..
اللهم حرم وجهي عن النار واسكني الفردوس الأعلى بغير حساب...
اللهم ارزق عبدتك الصالحة سمـاح و عبدك المؤمن بقضاءك عبدالرحمن بخلف صالح...
اللهم آمين
اللهم آمين
__________________

05-15-2008, 04:15 AM

الجزء (11)
بوعبدالرحمن: يا ولدي اخوك معروف بتقواه و قربه من ربـه .. والله يرضى عليه دومه يطلب رضا الله ثم رضا الوالدين ..
ماجد: بس اهو كان يدعي ويطلب من الله ان يرزقه عيال ...
بوعبدالرحمن: مافيها شي يا ولدي ...
مايد: انا سألته .. قلت له الحمد لله ان حرمتك حبلى .. وان شاء الله جريب بتصير ابو يا بوضاحي .. رد علي وعلى ويهه ابتسامة حزينة .. بكلمتين " الله كريم" ...
بوعبدالرحمن: والنعم بالله ..
مايد: لا تظلمون حرمته .. اعرفوا منها السالفة أول ..
بوعبدالرحمن: نحن ما نظلم احد .. وبكرة ان شاء الله القصة تبان و نعرف اصل هالسالفة ..
مايد ساكت و حزين ..
بو عبدالرحمن: اطلب له الرحمة يا ولدي .. مثل ما كان اهو قريب من ربه .. الله بيكون قريب منه ...
مايد: والنعم بالله .. إانا إلى الله وإنا اليه راجعون ..
بوعبدالرحمن: ابيك جي يا ولدي .. شراة اخوك الله يرحمه .. بالرغم من قلبه الطيب والحنون كان قوي وينشد فيه الظهر ..وايمانه بربه اهو دافعه لهالحياة ...
مايد: الغالي علمني حديثين انا ماشي عليهم وراح امشي عليهم طول حياتي .. بالاول ان الله خلق عسر واحد ويسرين.. والثاني اعمل لدنياك كأنك تعيش ابدا و اعمل لآخرتك كأنك تموت غدا ... وانا احاول اني استمر بالعيش بهالدنيا واخلي الامل موجود دايما ... لان على قولت المرحوم .. الامل يمرض لكنه ما يموت ... وبنفس الوقت ما انسى ان تمسكي بربي وتوكلي عليه بكل اموري اهو سبيلي بهالدنياا للنجاح ...
بوعبدالرحمن: هذي الرمسة السنعة ياولد الماجد ...
مايد:بس فراقه وايد ضايقني يبه .. فراقه ذبحني ..
بوعبدالرحمن: كلنا انذبحنا و اكسرتنا وفاته ... استهدي بالله وسير نام لك شوية يا ولدي .. بكرة وراك مدرسة ..
مايد: ماحس طعم لاي شي ... وماعتقد اني راح اروم اسير المدرسة باجر ...
بوعبدالرحمن: عبدالرحمن دوم يحفزك على دراستك .. ويبي يشوفك متفوق و رافع راسه و راسنا .. وإذا انا ما كان لي خاطر عندك .. على الاقل عشان رغبة المرحوم ...
مايد حضن ابوه ...و ابتسم له ابوعبدالرحمن وودعـه وطلع عنه ....
--=--=--=----=--=--=----=--=--=--
قبل لا يروح بوعبدالرحمن لغرفته .. سار لغرفة علــي ... اكثر واحـد تأثر من وفاة اخوه ... دمـوعه ما يتنشاف .. ولكنها بالقلب تنزف ... اكثر واحد يكسر الخاطر اهو علـي ... طيبته من طيبة اخوه ...
الزمن غدار.. آآه يا دنيا .. الشكوى لله ..الحزن بالقلب .. قتلتو القلب يا عديمين الضمير.. وتركتوالروح في مأتم حزين .. ضاق صدري .. راحت احلامي وافراحي وزاد همي .. رسمتوا بجراحي مآسي .. وحزني تايه بلا مراسي .. كل لحظة ينذكر اسمك بقلبي .. وشفتك في عروقي ودمي .. ياولد ابويا وامي .. انا نايم وانت بأحلامي .. وأنا صاحي وتراودني بأفكاري وبهالليل وسط الدم ساكن كأنا ما تفارقنا ولا ثواني ...
يذهب بو عبدالرحمن لدار " علي " .. وقبل لا يدق عليه الباب .. سمع صوت تلفونه يرن... وقف شوية يشوف إذا كان ولده راح يرد على التلفون او لا ...
علي رد على تلفونه .. ولما سمعه ابوه .. وسمع صوته الحزين .. تطمن انه بخير ... وسار عنه ...
مبـارك اهـو المتصل لرفيجه ...
مبارك: شحالك الحينه ؟؟
علي: الحمد لله على كل حال ...
مبارك: اذكر الله يا خوك ..
علي: والنعم بالله ...
مبارك: ماتروم ترمس؟ تعبان؟
علي: ودي ارمس معك .. بس ماروم ..
مبارك: البكى زين و ريح النفس ...
علي: الموت صعب .. وفرقا الاحباب .. وخصوصا اللي شراة الغالي وبهالطريقة ماهو شي سهل ...
مبارك: الله يرحمه .. قطع فينا كلنا ..
علي: ولما كنت اعصب عليك واقول لك لا تدعي على نفسك كنت مستهتر .. كنت كاره هالدنيا .. وناسي اللي فيها ..
مبارك والعبرة خانقته: انا حاس فيك ياخوي ..
علي: ما تجوز عليه إلا الرحمة ...
مبارك: الله يرحمه و يغمد روحه الجنة ان شاء الله ...
علي: كنت موصيه على شوية اغراض ... والتمر للربع كلهم (سكت شوية لان دمعة نزلت على خده و مسحتها) مع اشياءه اللي جابوهم السفارة ... ياب لي كل اللي بغيته منه .. إلا اهو مارد معاهم ..
مبارك ساكت ما يدري بشنو يرد عليه عشان يواسيه ...
علي: اسمح لي استأذن ابي انام لي شوي وانا خوك ..
مبارك: مسموح الغلا ... تصبح على خير
علي:و انت من اهل الخير ..
--=--=--=----=--=--=----=--=--=--
اكمل بو عبدالرحمن مشواره ناحية غرفة ولـده محمـد ...
دق عليه الباب .. بس ماحد رد عليه .. فتح الباب .. ولقاه نايم وماهوب متغطي ..
دخل له و غطاه بلحافه ... وتأمل في ملامح ويههه المتكدر .. وكان باين عليه انه كان يبجي قبل لا ينام ..
طلع و سكر الباب وراه ..
واصل لغرفه أم الهنوف ...
طق الباب ولا احد رد عليه ...
دخل شوي شوي وبهدوء ... لقى سارة نايمة .. وبنتها جنبها على السرير اوتعت لما حست على يدها .. ربت شوية عليها عشان ترجع تنام .. وغمضت عيونها ونامت ... هني اقعدت سارة ...
سارة: يوبا .. خير صاير شي.؟؟
بوعبدالرحمن: سلامتج يا بنتي .. لا تخترعين .. انا بس ياي اتطمن عليكم ...
سارة: اكيد ماكو شي؟؟
بوعبدالرحمن: اكيد يا بنتي .. ردي نامي .. تصبحين على خير ...
سارة: وانت من اهل الخير ..
--=--=--=----=--=--=--
راح بوعبدالرحمن لغرفته اخيراً ..
وكانت وسمية قايمة من على السجادة بعد ما صلت صلاة الليل ...
بو عبدالرحمن تنهد تنهيدة كبيرة ...
واخذ لحافه ونام ..
وسمية تطالع في ريلها .. اهي من يوم وفاة الغالي واهو رمسته قليلة .. وهذي حالته كل يوم .. يسير يتطمن على عياله واحد واحد ... ويناام .. او يحاول ينام ... وسقط دموعها على خديها ... حزنا واسا واسفا على حالة هالعايلة من بعد فقدى غاليها...
--=--=+++++=--=--
++في المستشفى++
--=--=+++++=--=--
بوعبدالرحمن مع علي ومحمد في المستشفى ...
عندهم صور واوراق واشعة لقوها في الصندوق اللي وصلهم من السفارة مع اغراض عبد الرحمن ..
الدكتور: هذي الاوراق تبين ان ولدكم كان مسوي عملية في الرياض قبل اسبوعين تقريبا ..
بوعبدالرحمن: شقاعد تقول يا دكتور .. شفيه ولدي ماكان يشكي باس .. وبعدين اهو متوفي من قبل اسبوعين..
الدكتور: اظاهر انه عمل العملية قبل لا يتوفى بيوم واحد او يومين .. هذا من الاوراق اللي جدامي ...
محمد: وهالعملية مالت شنو يا دكتور ...
واخذ الدكتور الاشعة وحطها على لوحة بيضا وراه وقام يطالع شوية بالاوراق ..
الدكتور: ولدكم كان يعاني من مشكلة في الانجاب .. وهالعملية اللي سواها سهلة جداً وكانت ناجحة 100 % ..
بو عبدالرحمن: معقولة؟؟؟
علي: يعني لو انه عاش .. كان يقدر ينجب اولاد كأي انسان طبيعي ..
الدكتور: نقدر نقول انه طبيعي تماما ..
محمد: وشنو سبب هذا يا دكتور؟؟
الدكتور: اظاهر انه من قبل ولادته ..
عبدالرحمن: احنا تأخرنا في انجاب عبدالرحمن تقريبا سنتين .. وام عبدالرحمن كانت تتعالج وتاخذ حبوب كثيرة.. مع اني سليم واهي سليمة ...
الدكتور: يبدو ان هذا السبب .. بس العملية اللي سواهاا كانت ناجحة .. ولو ربه عطاه عمر .. كان يقدر يجيب درزن عيال ... على العموم البقى براسكم ...
بوعبدالرحمن: لا حول ولا قوة إلا بالله ... ظلمنا البنت ...

¤؛° الجزء الخامس و الثلاثون °؛¤
--=--=+++++=--=--
بيت بوعبدالرحمن
--=--=+++++=--=--
اجتمــاع عائلي...
بوعبدالرحمن و أم عبدالرحمن و محمد و علي و ماجد و سـارة
بوعبدالرحمن: انا جمعتكم اليوم يا عيالي .. عشان نعرف مصير بنت الناس ويانا شلون راح يكون من يوم وساير...خصوصا ان اربعينية المرحوم طافت..
ونزلت دموع ام عبدالرحمن والكل كان متأثر .. كفاية ذكره و ذكر اسمه عشان يزيد آلامهم ويبجي عيونهم و يدمي قلوبهم ...
علي: خلونا نبتدي بقرآءة سورة الفاتحة ونهدي ثوابها لروحـه ...
وقرأوها جميعا ...
أم عبدالرحمن: مسكينة البنت .. ماكان لها ذنب بأي شي ...
بو عبدالرحمن: بس احنا للحين ما عرفنا ليش قالت انها حامل على الرغم من ان عبدالرحمن كان يدري انه ما فيه عيال.. معقولة ما شك فيها!! ولا بكلامها!!
سارة: يمكن كانت خايفة ان العيب منها .. وعشان تنقذ زواجها كذبت هالكذبة ..
ماجد: وليش المرحوم ما واجهها من بعد ما قالت له ؟؟
سارة: انت للحين صغير وما تعرف لهالسوالف ...
محمد: انتي شفيج عليه ..؟
ماجد: انا ساير ... اظاهر كلامي ثقيل عليكم .. وانا من البداية ماكنت ابي ايي ...
بوعبدالرحمن: اذكر الله وايلس يا ولدي ...
ماجد ويطالع بأخته بلا مبالاة: لا إله إلا الله ...
علي: والنعم بالله ...
بوعبدالرحمن: انا توصلت لقرار .. وابي اعرف رايكم .. واعتقد انكم لازم توافقوني عليه .. لان هذا اللي لازم يكون ..
ويتطالع اهو وام عبدالرحمن .. و يطالعون محمد عشان يشوفون ردة فعله ...
ام عبدالرحمن: الله يرحم اخوكم .. لازم نريحه من بعد وفاته ...
علي: الله يرحمه برحمته .. شلون أميـه؟؟
بو عبدالرحمن: مرت الغالي ..
وسكت
بوعبدالرحمن: ادري ان اللي بقوله صعب .. لكن شي لابد منـه...
محمد: شعندك يوبا .. ؟؟ شصاير؟
سارة: انت قول واللي فيه الخير ان شاء الله نسويه .. وامرك واجب علينا نسويه و نطيعك في اللي تقوله ...
بوعبدالرحمن: محمــد ... يتزوج ... سمـاح مرت المرحوم ...
وكأن حد صب عليهم ماي بارد .. محمد وقف على طوله ... يتكلم بنفعال واندهاش...!!
محمد: اتزوج منو؟؟؟ ابويه انت شتقول؟؟
ام عبدالرحمن: عشان اخوك يرتاح بترابه .. وتكون حرمته الغالية بيد امينة ..
سارة: يمه ماكو حل غير هذا؟؟
أم عبدالرحمن: لازم تظل بيننا ... وماكو حل غير هذا ...
محمد: انا .. اتزوج مرت اخوي الغالي .. شلون .. مستحيل اتقبل هالفكرة .. مجرد التفكير فيها يتعبني .. مستحيل .. شي لا يمكن يصير ..
بو عبدالرحمن : خذ وقتك بالتفكير... مابي منك رد الحين ...
محمد: يوبا انت شتقول .. مستحيل افكر في هالشي ..
ام عبدالرحمن : كل هذا عشان بنت السالم ؟؟؟
التفت له علـي اخوه.. اونه يدري ان عبدالرحمن كان يبيها.. ودحين محمد يبيها!!! شو هذاا يعني السالفة صج ..
محمد: حتى لو كانت بنت السالم على قولتج بحياتي وقلبي وعقلي.. شلون اتقبل ان سماح .. يمه مستحيل . هذي اختي .. ومرت الغالي.. عمري ماراح اتخيلها انها حرمتيـه.. يمه شلون؟؟ .. هذي حرمة عبدالرحمن ..!!! يمه ما تستوي .
ام عبدالرحمن والدموع بعينها: إن ما خذيتها يا محمد انا غضبانة عليك دنيا وآخرة ..
محمد: يمه ارجوج.!!
ام عبدالرحمن: ليه ما تريحني .. وتريح اخوك بترابه .. اخوك اللي ما تهنى بشبابه .. شلون ترضى حرمته تترمل واهي صغيرة.. وتظل بهالزمن على ذكراه وحيدة ...
محمد: يوبا.. يمـه!! ... قلتيها اميه .. عمرها ماراح تنسى اخوي .. وتنسى اني اخوه..!! شلون راح تكون معاي وقلبها معاه.. شلون بالامس كانت حرمته و بكرة حرمة اخوه ؟!!!
بو عبدالرحمن : مع السنين و الايام راح تتعود عليك وتنسى ..
محمد: تنسى شنو؟؟ تنسى اني اخو زوجها و حبيبها الاولي .. تنسى اني اخو عبدالرحمن؟؟ تنسى شنو ابويه ... واذا اهي نست .. انا راح انسى؟؟ وبنت الناس اللي واعدها بعد التخرج اخطبها؟؟؟؟ شلون تستوي ؟؟
ام عبدالرحمن: بنت السالم حرمة فاهمة .. وراح تتقبل هالشي ..
سارة: ماهوب سهل على أي بنت يا يمه .. المفروض كلها ايام وتتحير له .. وكلها شهر وإلا شهرين وتصير حرمته ..
ام عبدالرحمن: انا راح اكلمها واكيد راح اقنعها ..
علي: إذا عقلها اقتنع .. قلبها راح ينكسر يا يمه ..
ام عبدالرحمن: أي مو لانها اخت رفيجك

__________________

05-15-2008, 04:16 AM

علي: لانها انسانة لها كرامة.. وماهي بلعبة وقت ما نبيها ناخذها ووقت اللي ما تناسب ظروفنا نتركها ونرميها بكل سهولة .
ام عبدالرحمن: ليه تصعبونها يا عيالي .. ارحموني ..
محمد: وليش انتي ما تبين ترحميني؟؟
بو عبدالرحمن عصب: شو هالرمسة يا ولد ..
محمد: واللي يخليك يوبا .. وربي حتى لو كانت هالبنت ماهي بحياتي .. وربي ماروم .. والله ماروم اخذ مرت اخويه.. يبه انا حّرمت علي بنت السالم لما خطبتوها له .. وحرمتها يوم انه بغاها .. وما ارتحت الا لما اهو بلسانه قال لي انها حلالي وانه ما يفكر فها و اهي شراة اخته دام اني فكرت فيها و بتصير حرمتيه .. وهذا مجرد تفكير ... شلون .. شلون يا يمه تبيني احين اتزوج حرمـته؟؟ وربي بجن .. عقلي ما يستحمل هالشي ...
الكل في حالة سكوت .. وكأنه الهدوء الذي يسبق العاصفة .. سارة منكسر قلبها على اخوها ..
ماجد ماهوب عاجبه الوضع .. شلون سماح ام ضاحي؟؟ تستوي حرمة محمد وتصير ام جاسم؟؟؟
علي: انا عندي لكم الحل ..
الكل يطالع علي .. شو هالحل اللي ممكن يحل هالمشكلة ويطلعهم من هالشتات ...
علي: انـا راح اتزوجهـا ....!!!
محمد: علي!!
بو عبدالرحمن: شو هالرمسة يا ولدي!؟؟ من صجك؟
علي: أي .. من صجي!!
أم عبدالرحمن: محمد اهو الكبير .. شو بيقولون الناس علينا إذا خطبنا لها الصغير ...
ماجد: الناس والناس .. شو سوو لنا الناس عشان نحاسب لهم؟؟ الناس بيرجعون لنا عبدالرحمن؟؟ الناس وينهم عن مرت اخويه؟ بتنفي عنها صفة ارملة؟ الناس بترجع ضاحي ولد الغالي؟؟ الناس بتجبر قلب البنت اللي يبيها محمد؟
ام عبدالرحمن: انت شلون ترمس جي وتعلي صوتك ..
ماجد: اذا كان صوتي مو مسموع .. ولا يعجبكم .. ليش ناديتوني لهالاجتماع؟ عشان تعورون قلبي وتسمعوني رمستكم اللي تضيق الصدر ؟؟ ...
وتركهم وراح بيصعد الدري و بيسير غرفته والدموع بعيونه ..
ماجد: خلاص راح اللي يسمعني .. ويفهمني ...
سارة قعدت تبجي من الخاطر: والله حرام اللي يصير لنا .. الله يجازي اللي كان السبب ...
بو عبدالرحمن: ولدج صاج يا وسمية ...
علي: انا للحين عند قولي .. مستعد اتزوج مرت الغالي .. واحطها بعيوني ..
محمد: علي.. اذا نسيت انها حرمة اخوك.. اخذها بالعقل .. اهي اكبر منك .. وفوق هذا ارملة .. وانت لا تشتغل ولا عندك مدخول ..
ام عبدالرحمن: ابوك راح يصرف عليه وعليها ...
محمد: يمه انتي ليه جذي .. ؟؟ تبين تريحين المتوفي و عايش بنعيم الله و ان شاء الله في جناته .. وتعذبين الحي بهالدنياا ... طول حياته!!
بو عبدالرحمن: امك ماتبي الا الستر بهالدنياا لحرمة الغالي .. وانا اللي قلت هالشي .. لان اهو اللي لازام يكون ...
ام عبدالرحمن: تبي تقول اني ظالمة يا محمد ؟؟!...
محمد: للأسف أميـه ..
ام عبدالرحمن : هذا كلامك .. جزاك الله خير ياولد حشاي..
محمد:الرمسة مامنها فايدة .. لانج مستحيل تغييرين اللي في بالج ...
بو عبدالرحمن: إياك تغلط على امك
محمد: السموحة .. وإذا تبوني اعرس عليها .. انا بتصرفكم .. اللي يهمني رضاكم ..ورضا الله من رضا لوالدين ..
سارة: رضا الوالدين اذا في شي ما يغضب الله ..
بو عبدالرحمن: وين غضب الله من هالشي؟
علي: انا راح اتزوجها ..هذا اهو الحل الوحيد.. انتوا فاتحوها بالموضوع ..
محمد باستهزاء: قرة عينج يام عبدالرحمن .. عيالج الاثنين يبون يتزوجون حرمة اخوهم .. خبريها .. وشوفي راح تختار منو فينا ..
بو عبدالرحمن يعطي ولده محمد كـف !!!
الكل تفاجأ و صرخ وحط يده على فمه..
محمد: جزاك الله خير .. يجي منكم اكثر يوبا ..
واخذ يد ابوه اللي عطاه كف فيها .. وباسها ..
وياخذه ابوه بحضنه .. ويبجي ..
محمد: أنا ساير ..
وطلع من البيت ودموعه على خدوده ...
ام عبدالرحمن تكلم علي وهي تبجي خايفة على ولدها: روح وراه يمه شوف اخوك وين سار ...

--=--=+++++=--=----=--=+++++=--=--
نفس الوقت في بيت بو مبـارك
--=--=+++++=--=----=--=+++++=--=--
مرايم بغرفتها معاها الجازية ..
مرايم: افتكينا من الامتحانات والحين نحاتي النتايج .. الله يستر بس ..
الجازي: كل واحد ودراسته .. على قد ما زرعتي راح تحصدين ..
مرايم: مو من زرع ياوخيتي .. يصير ان ريح عاتية تجيء للزرع و تقتلعه..
الجازي: وشلون هذا يصير مع الامتحانات يا فالحة ..
مريم: حين تأتي الامتحانات بما لا تحتوي الكتبُ..
الجازي: ههههههههه .. وصرتي ترمسين عربية فصحى .. اللي يسمعج يقول تدرسين عربي ماهوب انكليزي ..
مريم: شاسوي .. عشان لانسى لغتي الأم ..
الجازي:ههههههه يقطع بليسج ..
مريم: ياللا سولفي لي عن ياسر.. شخباره؟
الجازي: زين
مريم: بس زين؟؟
الجازي: هيه بعد شو بس ..
مريم: ومتى الملكة؟
الجازي: يعني بعد النتايج بيتحدد كل شي
مريم: الله .. يعني كلها اسبوعين ..
الجازي: يقولون ..
مريم تطالع بالجازية وعينها في عينها..
مريم: ليش احسج مو مبسوطة ..
الجازي: عادي .. انتي شايفتني حزينة
مريم: بس مانتي بفرحانة..
الجازي ساكتة ...
مريم: لايكون .. ؟؟
الجازي: لأ ..
مريم: شنو اللي لا .؟
الجازي: اللي بتسأليني .. واللي بتقولينه ..
مريم: تدرين شنو اللي بقوله ..
الجازي: اكيد عن اخوج ..
مريم: هيـه .. !!
الجازي: اخوج ما يبيني .. ماحبني .. ولا راح يحبني ..
مريم: اخوي يحبج..
الجازي: كأخت .. وانا بعد احبه مثل اخوي ..
مريم: نفسي اصدقج ..
الجازي: لا تعورين قلبي يا مرايم .. خلينا نغير هالسالفة ..
مريم: سلامة قلبج حبيبتي .. نغيرها ..
الجازي: راح اسولف لج عن ياسر ...
وتتكلم الجازية و مرايم تطالع فيها .. حاسة بالنار تحرقها واهي اتحاول تخبي .. تبي تبين انها فرحانة و راضية بياسر على الرغم ان قلبها للحين متعلق بمـبارك ...
يندق باب غرفتها ..
ويدخل مبارك بعد ما عدلت الجازية شيلتها ,, ويفز قلبها على طاريه و نغمـة صوته ..
مبارك: شحالج جازية؟؟
الجازي: بخير جعل لك الخير .. انت شحالك؟
مبارك: بخير و نعمة .. نسأل عنج .. قاطعتنها من زمان ..
الجازي: بعد تدري الدراسة و الامتحانات ..
مبارك: بالتوفيق ان شاء الله .. والنتايج قريب نبي المعدلات السنعة ..
الجازي: ان شاء الله وانت بعد .. ومرايم ..
ويطالعها مبارك و يبتسم بوجهها .. هالابتسامة يا ناس لخبطت كيانها !!!
مبارك ويكلم اخته ..
مبارك: الريم .. ابيج لحظة شوي .. إذا ما عليج امر تييني غرفتي ..
مريم: يعني ما اتأجل ؟؟ تشوفني مشغولة مع الجازية
مبارك: يعني شعندكم .. كله سوالف حريم وهذرة وسوالف بطالية ...
مريم: احنا سوالفنا بطالية هاا .. معليه شوف من يكلمك ويسولف معاك بعد ..
مبارك: إلا امزح انا ..
مريم: انزين شوية وجاية لك ..
مبارك: صار ... اخليكم ..
وطلع عنهم و صك الباب ..
الجازية: مريوم.. ليش اخوج يطالعني جي؟؟
مريم: شلون طالعج يعني ما انتبهت..؟
الجازي: مدري .. على العموم انتي روحي شوفي شيبي ولا تبطين .. انابيلس عالكمبيوتر على ما تردين..
مريم: اووكي .. سي يو بعد شوية ...
الجازي: سي يو ..
+=--=----=--=+
في غرفة مبارك
+=--=----=--=+
مبارك كان يالس على كرسي الميزتوليت ..
دخلت عليه مريم من بعد ما استأذنت ويلست على السرير مجابلته ...
مريم: خير اخوية شو مستوي؟؟
مبارك: شخبار الجازي؟؟
مريم: انت مناديني عشان تسألني عن اخبارها .. كاهي عندك قوم اسألها ..
مبارك: ابي اعرف اخبارها منج .. واعتقد تدرين أي الاخبار اللي ابي اعرفها ..
مريم: مبارك انت اشتبي من الجازي؟
مبارك: ابيها ....!!
مريم منصدمة: يعني شنو تبيها؟؟
مبارك: يعني ابيها لي .. ابيها تصير حرميته..
مريم: مستحيل!! شو ترمس انته؟؟
مبارك: وشنو المستحيل باللي قلته ..
مريم: انت من قبل قلت انها شراة اختك .. وانت من قبل حبيت شمس .. وانت ..
مبارك: قلتيها .. من قبل.. يعني شي راح وانتهى ..
مريم: بس الجازية راح تنخطب .. قريب .. كلها ايام ..
مبارك: راح تنخطب.. يعني ماصار شي للحين .. وانا اولى من الغريب..
مريم: الغريب حبها وبغاها من الخاط


العضو المميز	الموضوع المميز	المشرف المميز
قــريبا	قــريبا	قــريبا

الإهداءات
إضافة إهداء