سيندريلا العراق والله القصه تفوتكم عمرك خساره اذا متفوت

كان ياما كان في عتيك الزمان
جان اكو بنية

اسمها سندريلا خوش حاتة اصيلة و علمودها غنى حسام الرسام الاغنية مال العگربة

,,,المهم جان عدها مرت اب كلش خبيثة و جانت تشتغل مترجمة
و ابوها خطية يبيع قوايش مبردات حجم 1100 بعگد النصارى ومرات يبيع

شخاط فلّ بس هو خوش زلمه من اهل الاول ... و جانو الكل سايگين على سندريلا خطية

روحي سوي الجوزة مال المولد فصلت ,,,

روحي اوگفي سرة على الغاز,,,

روحي لابو المحل ابراس الفرع اشتري شحاطات لخواتج

(اللي همة جانو 3 خوات بس من غير اب هم خبيثات للهامة
),,,

روحي شلعي الشتايگر مال السطح و رجعية مرة لخ,,
روحي جيبي لفات فلافل مشي,,

روحي بدلي الدهن مال المولدة الاقصى كامت اتعفط

...

و هاي خطية جانت كلش
حبااابة و تروح ولا تفتح حلكها بس من جواها جان التقسيم مشتغل
المهم,,,,,الى أن يوم من الايام

جانت دا تصعد ماي بجليكان ابو ال 20 الماي ضعيف و الماطور ما يصعد
لان ماكو كهرباء لكت بالطرمة فانوس بس شنوو مزنجر و عتيك عبالك جان
بدوائر الدولة و تحوسم جتي عليه فركتة و چرررب كام يطلع دخان سندريلا
انرعصت و رجعت خطوتين للخلف بسبب
المفاجأة

شنو هال دخان هذا ؟ الدخان شوية شوية اتحول الى جني
لابس دريس مال برشلونة و بوتين اديداس وسوار ذهب و حاط معطر
freedom for men


و كللها:-


-شبيك لبيك عبدك بين ايديك انا الجني رامي من العرصات
شتريدين اسويلج بس عالسريع لأن ماما دگتلي مسكول لازم ارجع
كالتله

-عمو جني اريد كهرباء وطنيه 24 ساعة ممكن؟

-ولج بابا هوة اني ساحب واير 5 امبير من مولد للفانوس
شلون اجيبلج وطنيه 24 ساعة؟ شنو جني لو وزير الكهرباء؟

-زين عمو عمو اريد قنينة مال غاز متروسة لأن معوزين كلش .....

-ولج عمو شنو هال حجي؟ ولج انتي شكد فگرية.. اكو
واحد يطلب من جني قنينة مال غاز؟ شايفتني رابط الفانوس عال حصان؟
-عمو عمو لعد شتكدر تسويلي؟

-باعي عمو انتي
بعدج اصغيرة و محرومة و الامير راح يسوي حفلة و ادري عائلتج
راح تروح شنو رايج لو اخليج تروحين و تتونسين؟ احتمال تطلعين
ابصاية و صرماية لأن الشرقية هم دا تصور هناك حفلة طاگة

- زين شلون اروح عمو؟نفرات لو كيا؟

-بابة معليج هسة غمضي عينج.... سندريلا غمضت عينها (و من الغريب يا جماعة
انه اول ما غمضت عينها ما كامت اتشوف و هذا الشي محد لكالة
تفسير لي هسة ) و چررررب شافت سندريلا نفسها لابسة تنورة
كصيرة و بدي و حذاء مفتوح يعني طلعت حااتة مو طبيعيه
و كللها الحلفة اقصد الحفلة تخلص بال 8 و نص
علمود منع التجوال و كل هاي الهدوم راح توكع و الحذاء و الميك اب و
كلشي راح يختفي اذا عبرت ال 8 و نص و احتمال تنعلسين بالطريق

-حاضر عمو شكرااااااااااااااااااااااا(هاي شكرا الطويلة مال الزعاطيط)
وصلت سندريلا البيت الامير جان مسوي حفلة
لان طلع 77 بالسادس راح يروح كلية اهلية احتمال او طب بيطري بعد ما اعرف
و الحفلة جان بيها نجود و سمراء و ساجدة عبيد(كلة هجع و عالگة) و
سهام السبتي هم جانت موجودة و الامير شاد الرباط علة راسة و مقندل و
صاير فد مره و ردح و فجأة الامير صاد سندريلا و عجبته و كابلها
جتف ساعتين... و ساندريلا نست روحها و نست الكراب و السراوات و
البهذلة والسهر و نزلت ردح الى ان صارت 8 و نص ......واللهّّّّ انلاصت
اتذكرت الوصية مال رامي الجني و كالت لازم اشطح و ركضتلك عال
سريع جنها برازيلي هس توها مجفتة و الامير وراها
:
-وج تعاااي شبيج تخبلتي؟مو دا احاجيج
؟؟؟ وين امولية ؟؟؟ فضيلة(هلكد ما مثول نسة اسمها)
المهم ركضت سندريلا و چررب وكع الحذاء مالتها بلا ما تدري
جان الامير يشيل الحذاء و لزمة و ضل صافن عالعالم اللي
انتبهوا عال لقطة و كامو ايباوعون عليه الامير بقة شايل الحذاء و
مصدوم و صورة سندريلا
الحلوة ببالة,,, الحفلة توقفت طبعا و العالم سكتت من المفاجأة
جان يباوع الامير عالعالم ....صنطة.......
و كال للناس :
*
*
*
*
*
*
*
*
*
*
الشركة العامة للصناعات الجلدية - فخر الصناعة الوطنية العراقية
خبرة وتميز في مجال المصنوعات الجلدية من الاحذية والحقائب بارقى المواد ...