يا قلب جيت والوقت ما فات
جيت بولهك .. ولهفتك .. وبطبايعكـ
الله يا حلوك .. ويا حلو الاوقات
ويا حلو نظرات الخجل يوم أدلعكـ
يا زين جوي يوم أطالعك بسكات
ودي بطول العمر .. ساكت وأطالعكـ
تقطع عيوني .. من عيونك مسافات
وألمس عيوني في يدينك وأضيعكـ
مرات تبعدني وأقربك مرات
ومرات أحس بلذتك .. وأتجرعكـ
لو أحكي بحبك دخلت بمتاهات
والحب نفسه لو عرف يحكي أقنعكـ
من كبر هيبه حبك ورب الآيات
حتى لو أنك تحكي بصمتك أسمعكـ
أتوقع أنك بس للذات بالذات
واتوقع أني فووق فكره توقعكـ
هذا وانا توي معك بالبدايات
لو خطوتك عكس اتجاهاتي أتبعكـ
إن جيت أبرمش رابع المستحيلات
ماودي أرمش .. ودي أسكت .. واطالعكـ
وإن شح وقتك والزمن صار لحظات
أبختصر فيها واسلم وأودعكـ