المكاسرة والتجارة .. اصول وحرفنه وشطارة

الســـــلام عليكم أعزائي ،،،، كيف حالكم طيبين

اول شي القسم الجديد فله والله يوفقكم بناااااااااات وحنا نستاهل



معكم اليوم - كورس في المكاسرة -

هههههههههههههههههه

المكــــاســـــــــــــــــرة



حبيباتي قبل لا نبدا في الكورس لازم تعرفي يعني إيش مكاسرة :

وهي شراء السلعة بأقل ثمن يمكن تصديقه وهذا لصالح المشتري

وطبعا المكاسره مو دايمن تضبط لان في مشتريات اسعارها ثابته

واحنا مو هدفنا بس مصلحتنا كمتسوقين بس لا لازم نكون حقانين

وما نظلم الظرف الاخر ولا هو يظلمنا و يكون في تراضي بين الطرفين

طيب بسم الله نبدا

البائع كتاجر حاط بحسابه سالفة المكاسرة فباغلبية المحلات

يحسبون حساب هالشي فيحدد مبلغ للبضاعة ازود من سعرها الاصلي

ولما يجي الزبون لو مرتهي يعني ما عليه زود بيشترى بالغالي

ولو على قد حاله بيكاسر وفي الاخير بيوصل للسعر الاصلي

وبيخرج فرحااان عباله اخذ البضاعه ببلاش

واولا واخيرا التاجر كسبان حتى لو عطاها اياه ببلاش فهو كسب زبون

البعض يعتمد بالمكاسره على اسلوب بصراحه هالاسلوب مو راقي
لا بالتعامل ولا بالفكره .. لانه كذب وغش ويوم اكلمكم عن المكاسره
ما اقصد لا الكذب ولا الغش ولا الخداع هي تجاره من ناحية التجار
وذكاء من ناحية المتسوق ... وتوفير واننا ناخذ السلعه بالسعر الي يناسبنا
وهذا ما فيه كلام ...

بعرض لكم امثله للمكاسره الغير شرعيه بنظري لانها كذب وخداع



لو مثلا راحت الوحده حلقة الخضار والوالدة موصيتها تشتري طماطم

أو غيره من الفواكه >> تسوي كم حركة قبل لا تخش الحلقة

وهذي الحركات تكون باااااايخه بالمره وتقليل من كرامتنا

وما يسوى علينا هالشي الي بنشتريه لو بنسوي كل ذا

ولا والي يعور القلب ......

لو تلبس ملا بس شوي قديمة

عشان تحزن البايع شوي .. وتصعب عليه وغير الحركات وغيرها

ولا تبطئ في مشيتها وكأنه عندها ألم في رجلها

يعني ما تقدر تطول في الوقفة - وبكده البايع حيستحي يطول معاها ويعطيها ارخص سعر

<<<<<< هذا كله خلكم منه سوالف مالها داعي

خليج واثقه من عمرج حاولي تتعرفي على اسعار السلع المتنوعه

قبل ما تشترى اسألي الي يسال ما يتوه

لازم تكون عندج خلفيه بالاسعار

<<<< بتقولي لي ما اطلع وايد

طيب بهالطلعه حاولي تسالي قبل ما تدفعي وتشتري

حاولي تعرفي الماركات في الغالي والمتوسط والرخيص

وشوفي الي يناسب دخلج ويحقق الغرض منه

مو مهم يكون غالي او رخيص المهم يعجبك ويكون نوعيه عدله تحقق غرضها

ابعدي عن الفشخره الكذابه والمباها لانها ما تفيد

مع التركيز اني ما اقصد بالمكاسره فتح باب للسوالف مع البائع

لا بالعكس انا يوم بجي اكاسر بتكون عندي خلفيه

مثال : انا باخر رمضان رحت اشترى للعيد

شفت طقم مره حلو في مجمع تسويقي

وطبعا تفرق المجمعات الكشخه والمولااات اسعارها تكون اغلى من

المجمعات القديمه والشعبيه وهذه نقطه مهمه لازم نحطها بعتبارنا

المهم الطقم كان بــ 300 هذا السعر المكتوب عليه

مع انه كان عاجبني مره والثمن موجود بالشنطه بس قلت لا تستعجلي

وبكم لفه بالسوق حصلت مثله والسعر الي مكتوب واحد

بس لما اسال في دسكاونت ينزلوا مبلغ

بعد كذا لاحظة ان اغلبهم نزل على 250

240 260 حسيت ان السعر الاساسي بهالحدود

المهم بعد كذا اشتريت الطقم على 240

بس بصراحه حسيت انه ما صار تنزيل عدل

بس على الاقل اخذت القطعه بثمنها

مو مثل اي ذكيه جات واخذتها ب300

وهي بالاصل 240

ولما تجي تكاسر خليك واضح وصريح وعلى معرفه

تعرف من البائع السعر وتشوف السلعه

تعاينها وتتاكد من انك تبيها وتناسبك

قبل لا تشتريها وتراعي خامتها

لان في خامات غاليه مو معقول تطلب من البائع

سعر بسيط بخامه غاليه ما تضبط

وراعي ربنا في تعاملك مع البائع

حتى لو كان من بلاد بسيطه لان كلنا عباد الله

ببساطه كلمه ورد غطاها على قول اخوانا المصريين

هذي بنظري ما تستاهل كالكثر ليه هالسعر

استفسري .. يمكن في ميزات انتي ما تعرفيها

واخر شي قلي للبايع عطني دسكونت فبيمحي الرقم الوهمي الي حاطه

ولو حسيتي انه ما زال رافع السعر وما يناسبك الدسكاونت

قلي الله يوفق وطلعي

لو هذا سعرها الاساسي بيسكت

بس لو حسا انه بيضيع زبون

هو لوحده بيقلك خلاص خلاص بكذاااا .

هنا بتعرفي الصدق والسعر الحقيقي

وعلى فكره التجار يشترون بضايعهم بالجمله

واحيان من دول غير ويبيعوها بسعار مضاعفه

وهذه تجاره مو غلط والتجاره شطاره

وهم بعد التسوق مهاره مو قصدي تاخذي السلعه بسعرها

مثل ماهي في بلدها او بالجمله لا لان كذا التاجر بيخسر

وهو دافع استيراد وجمارك وايجار محل وترخيص وسوالف

بس اقصد ما ينضحك علينا بالاسعار الخياليه

والبضايع الي بعضها مو زينه ..

وقبل اي شي >>>

في حالة دخولك للمركز هناك حالتان :

إما إنه الأسعار ثابتة ، أو انها قابلة للمكاسرة

وطبعا شرحنا كله على الحالة الثانية


في نقطه مهمه وسالفه تصير بالمولات عند الكاشير ( المحاسب )

في بعض المحاسبين وخاصه الي ما عندهم ضمير

ينصبو بمبالغ بسيطه وبطريقه ذكيه


في جهاز عند الكاشير يقى رقم السلعه ويحدد السعر على الحاسبه

لما تجي تحسبي مشترياتج يكون في بعضها ما عليها سعر

فشنو يسوي الكاشير يكون عنده ورقه مثبت فيها ارقام لاسعار مختلفه

علشان هالحالات لحد الحين الوضع اوكا بس الغلط لما هو تكون السلعه ب 50

ويخلي القارئ الي بالجهاز يقرأ رقم ثاني مثل 55 وبكذا يزود 5

ومن كل زبون 5 يكون نصب نصبه محترمه

فاحسبي اغراضج مو عيب لو جهزتي قايمه بالاغراض الاساسيه قبل روحتج

خاصه لو هي للمطبخ والاشياء المعروفه احسبي مجموع اسعار مشترياتج

وقبل ما توصلي الكاشير اعرفي على الاقل حدود المشتريات

من ناحيه تكوني متهيأه نفسيا وماديا ههههههه


وما يكون في مجال للغلط بالحساب


وأخيرا ،،،،، وبعد هذه النصايح بقي أقلك عن شوية حكم ومبادئ لازم تمشي عليها

حط في بالك انه البايع هو الكسبان حتى لو أعطاك البضاعة ببلاش برضه كسبان &

مهما نزلت السعر للبضاعة فانت عمرك ما بتظلم التاجر &

التاجر يعرف مصلحته والمستهلك انصحه يتاكد من دخله &

ارفع قرشك الأبيض ليومك الأسود &

من تواضع لله رفعه &

اتقوا الله اينما كنتم &

السوق للحاجه وناخذ حاجتنا منه وخلاص مو للتمشي &

غض البصر فحتى لو احنا بنات من الضروري نغض بصرنا وما نكثر سوالف &

لا تعطي البائع مجال للكلام لا بحدود السلعه وحتى ماله داعي سوالف &

عمرج ما تتخيلي ولا تطمحي انج بتسوى مثل ام سعيد ههههههههههههههههه

كم اخر ؟؟؟ اخر كم ................

لان مافي شي بدون مقابل ..

اذا السعر يتناسب مع دخلج وتمام لا تصيري بخيله وطماعه

اخر كلمه بقولها التجاره والمكاسره وكل شي بهالدنيا شطاره

وفن والي يعشق شي او يحبه بيتشطر فيه وبيبدع

اسفه طولت عليكم

بقلم شوكولاتا

وفلسفات قيمه اتمنى اكون كتبت شي يفيدكم ولو بحرف

تحياتي

احلى شوكولاتا

يهلااااا اسعدني تواجدك يالغلااا منوره خيتووو

والله لا يحرمج الغاليه

تسلمي قلبي على الرد

شوشو

هلااا هلاا هلااا ولا هلا متكفي يالغلاا

ســـــــــولاف منوره ووحشتيني موووت

عساج بخير ويهلا بردودك الحلوه

^ ـــ ^ احم احم طراره يؤ يؤ يؤ

لا هو ذكاء مستفحل ههههههه

كل السالفه انج خجوله بصراحه انه لما يكون المحل زحمه استحلى اجادل هههههههههه

بس الحياه ظروف عاد والي يقدر ياخذ الشي بسعره خير وبركه ههههه ^ ــ ^

ومشكوره على الرد والي اتمناه كلامي يفيد ولو بحرف

منوره مرتن ثانيه دبااا * ـــ ^

شوشو

كلااامج صح انا فاهمه بس لازم تحاولي يعني مو مكاسره مكاسره بس عاد مو لدرجه ما تسالي

يالدبا عاااد هو بس الخجل شوي شوي بتعلمج الحياه اصول التجاره والتسوق ^ ـــ ^

ولا يهمج حبيبتي


منوره وانااااا سعيده بردك

اختج

شوكولاتا