رواية هذي وردة للهوى هذي جروحك عطني روحي سيدي او خذها روحك

هذي وردة للهوى هذي جروحك عطني روحي سيدي او خذها روحك
للكاتبة: shams abudhabi


هذي وردة للهوى هذي جروحك عطني روحي سيدي او خذها روحك(1(
في شركة خليفة للمقاولات
محمد: انا خلاص بنين لين الحين المبلغ المسروق 200 الف . تخيل بشهر واحد ميتين الف
سعيد: انا مب قادر افهم انتو ليش للحين ما قدرتو تعرفون منو هو اللي سرق
محمد: ليش لانه مب قاعد يسرق من الخزنة . تدري هو شقاعد يسوي. يحول من حسابات الشركة لحسابات باسمه هني وبرع البلد
سعيد: يعني هو يشتغل هني
محمد: اكيد و بقسم الحسابات بعد
سعيد: انزين يعني المشتبه فيهم معروفين
محمد: بكشفه و لو بعد مليون سنة . ولو بضطر ادفع مليون درهم
سعيد: بتدفع مليون عسب تعرف منو سرق 200 الف
محمد: السالفة مب سالفة فلوس . السالفة ان هذا اللي قاعد يسرق قاعد يتحداني انا محمد خليفة سالم بس والله لخليه يدفع الثمن غالي . وخليه يندم على اليوم اللي فكر انه يسرق فلوسي.
سعيد: محمد لا تكبر السالفة .
محمد: هي بروحها كبيرة . بس هذيل الاغبية اللي قاعدين يشتغلون عندي لين الحين ما سوو شي . انا عطيتهم اسبوع عسب يعرفون منو هذا اللي قاعد يسرق او بطردهم كلهم
سعيد: لا اله الا الله . يعني الطلعة تكنسلت
محمد: أي طلعة
سعيد: نسيت ان احنا معزومين على عرس سيف ناصر
محمد: اللي قاعد يصير ما خلى فيني عقل
سعيد: يعني بتسير ولا لا
محمد: لا بسير . أي ساعة بتسير
سعيد: الساعة سبع
محمد: عيل خلاص الساعة سبع تعال هني بنطلع مع بعظ

محمد خليفة وسعيد منصور ليسا مجرد صديقين . بل هما كالتوام . عائلاتهما متعارفة منذ زمن طويل منذ كانا مجرد طفلين . جمعت بين العائلتين عوامل عديدة اولها المستوى المادي الاكثر من ممتاز والوضع الاجتماعي الرفيع واسما العائلتين الكبير . كلاهما في الثانية والثلاثين من عمره دخلا نفس المدارس ثم سافرا معا الى بريطانيا ودرسا هناك . وعندما عادا استلم كل واحد منهما اعمال عائلته .
محمد له شقيقتين وشقيق
منال عمرها 37 متزوجة وعندها بنتين وولد (شما 19 سنه ودانة 18 سنه وخليفة 20 سنه) . احمد في الثالثة والعشرين يعمل في شركات والده مع محمد . هدى في العشرين في جامعة زايد وستتزوج قريبا من ابن عمها .
اما سعيد فلديه شقيق واحد وهو فهد عمره 25 متزوج ولديه ولد واحد . وشقيقتين امنة في الثلاثين متزوجة ولديها بنتين وهي تعيش بلندن مع زوجها . و سامية في العشرين تدرس في جامعة زايد.


في جامعة زايد
في كافتيريا الجامعة
سهيلة: طاعو من دخل الكافتيريا اعوذ بالله
حمدة: انتي تتكلمين عن منو
سهيلة: سامية الخقاقة منو غيرها بعد. انا ابي اعرف شلون هدى تقدر تتحملها
منى: انا ما اعرف انتي ليش تكرهينها
سهيلة: لانها خقاقة و متكبرة و تحسب ان ما حد مثلها
موزة: بصراحة يحقلها تشوف عمرها
سهيلة: لا والله وليش انشالله عسب يعني انها من عايلة غنية يعني
موزة: مب بس غنية مثل ما يقولون فاحشة الثراء
حمدة: الفلوس مب شي نشوف اعمارنا بسبته
موزة: السالفة مب سالفة فلوس بس . لا تنسين هي بنت منو
منى: هدى بعد من عايلة غنية ليش ما تشوف عمرها مثلها
سهيلة: انا ما اعرف هدى شلون تتحملها
موزة: اهل هدى واهل سامية يعرفون بعظ من زمان يمكن من قبل لا ينولدن
سهيلة : انا ما يهمني هذا الكلام انا هذي سامية اكرهها
موزة: اكيد انتي تغارين منها
سهيلة: لا والله
موزة: ياختي لها سنتين هني بالجامعة ما شفتها لبست شي مرتين
حمدة: منى قومي وياي هذيل ما بيلخصون حش بالناس

قامت حمدة ومنى عن الطاولة واتجهتا الى الكلاسات
حمدة: ها شلون جان يومج
منى : صحيت الساعة 2 الظهر يابتلي الخدامة الريوق للشبرية بعدين سوتلي مساج وبعدين سرت الجم
حمدة: تتغشمرين حظرتج
منى: والله انتي اللي تستهبلين شلون كان يومي يعني نشيت الساعة 5:30 الصبح اوعي اخواني عسب يسيرون المدرسة . وبعدين نظفت البيت وزهبت الغدى و ييت الجامعة
حمدة: من الساعة خمس و نص نشيتي
منى: لو ما سويت جي امي هي اللي بتسوي وانتي تعرفين انها ما تروم. وانا كل يوم اتظارب ويها عسب السالفة هذي . الطبيب قايل انها المفروظ ما تقوم من الفراش وهي تبي تطبخ وتنظف و توعي اخواني
حمدة: انزين انا بساعدج
منى: حمدة انا ما فيني شي انا بخير
حمدة: هذا الكلام مب علي انا . انا اعرف انت شكثر تعبانة وانج بعد ما تردين البيت من الجامعة . ايوونج هذيل الطالبات اللي تدرسينهم انجليزي وعقب تسيرين تدرسين في المعهد
منى: وشتبيني اسوي عندي اربع اخوان يبوون ياكلون ويلبسون ويسيرون المدارس وابوي الله يرمحه ما ترك لنا الشي الا الدين
حمدة: انزين شوفي انا وياي شوية فلوس خذيهم و بعدين...
منى : اللي يسمعج يقول هذي ابوها مليونير مب جنه الحال من بعظه . لا يا حمدة يكفي انكم قاعدين تدفعون ديونكم وجزء من ديونا . ابوج واخوج ما يشتغلون عسب يصرفون علينا يكفيهم انتو . الحل الوحيد اني اهد الجامعة
حمدة: لا منى حرام انتي شاطرة
منى: حمدة انا اقدر اخذ وظيفة بدوام كامل و اصرف على اخواني .
حمدة: وعمج شيسوي
منى: الله يعينه يكفي انه قاعد يدفع لنا كل شهر و هو بعد عنده عايلة و يبي يصرف عليها
حمدة: والله ما اعرف شقول
منى: قولي الحمدلله حالنا احسن عن وايد ناس
حمدة: الحمدلله

حمدة ومنى صديقتين جمعت بينهما شراكة في الاعمال بين والديهما . فكل من والد حمدة ووالد منى اقاما شركة صغيرة كانت تدر دخلا مادي جيد الى ان تعرضت الشركة للافلاس واضطرا لبيعها وبيع كل ما يملكان لتسديد الديون ولكن حتى ذلك لم يكفي . ادت هذه الازمة لوفاة والد منى ومرض والدتها حزنا على زوجها مما اضطر منى الى تحمل مسؤولية العمل للانفاق على اخوانها الثلاثة وهم جميهم مازالو في المدارس . اما حمدة فقد اضطر والدها ان يقبل العمل في احدى الشركات براتب زهيد حتى ينفق على اسرته المكونة من سعود 24 سنه ويعمل محاسب ويساعد والده بالانفاق على الاسرة
وحمدة في التاسعة عشرة
وامل في الثامنة عشر
ويوسف في العاشرة.
كلا العائلتين تمران بظروف مادية صعبة , و ان كانت حمدة ليست مضطرة للعمل للانفاق على عائلتها كما هي منى مضطرة.


في منزل عائلة سيف ناصر
محمد و سعيد دخلا الى المنزل
سلطان: لو كنت اعرف انه سيف عازم محمد خليفة و سعيد جان ما ييت
فاضل: ليش انت شبينك وبينهم
سلطان: ياخي محسبين اعمارهم شي
فاضل: يحقلهم
سلطان: ليش
فاضل: مثل ما يقولون مال وجمال و حسب ونسب
سلطان: يا خي هذيل مثل القرش ياكلون اللي جدامهم عسب ياخذون اللي يبونه .
فاضل: الظاهر انه في شي بينك و بينهم
سلطان: ياخي قبل شهرين سرت بشتري قطعة ارظ وخلاص اتفقت مع البايع . وقبل ما نوقع العقد بيومين اتصل فيني و قالي انه هون ما يبي يبيعني الارظ . وانا لزمت عليه ابي اعرف السبب جان يقول لي ان محمد خليفة يبي يشتري الارظ
فاضل: يعني هو هدد الريال
سلطان: لا ما هدده
فاضل: انزين
سلطان: خلاص يوم ان محمد خليفة يبي يشتريها بيشتريها
فاضل: محمد ما سار قال للريال باخذها غصب عنك بس خلاص هم بالسوق يسوون لهم الف حساب

في خيمة الرجال
سيف: هلا والله وانا اقول ليش الدنيا نورت
محمد: مبروك يا ريال
سيف: الله يبارك فيك شخباركم
سعيد: بخير وانت شخبارك
سيف: مستانس ياخي
محمد: هههه حليلك واخيرا بتعرس
سيف: هيه الحمدلله
محمد: وين عمك و ابوك نبي نسلم عليهم
سيف: عمي خليفة وعمي منصور ما يو؟
سعيد: ابوي وعمي خليفة بيوون انشاله
سيف: وفهد وينه
سعيد: يا خي هذا ريال معرس لازم ياخذ اذن حرمته بالاول
سيف: هههههه وينه بس خليه يسمعك شو تقول
سعيد: ليش انت محسب اني خايف منه
سيف: محمد انت شفيك مب عوايدك
محمد: يا خي سالفة هذي الفلوس المسروقة ملعوزتني
سيف: انزين وشو بتسوي
محمد: لا تخاف اسبوع بالكثير و بمسكه
سيف: وشو بتسوي فيه
محمد: ما اعرف
سعيد: الله يعينه لا طاح بايدك
محمد: والله هو اللي جنى على عمره يوم فكر انه يغلط وياي


في منزل ابو سعيد
ام سعيد: اليوم امنة اتصلت . بيوون عقب باجر انشالله
سامية: وريلها بيي
ام سعيد: هيه و بيتمون هني شهرين
سامية: واو حلو والله لها وحشة
ام سعيد: حرمة اخوج وينها
سامية: ما اعرف يمكن قاعدة ترظع منصور
ام سعيد: شفيها جنها متظاربة مع اخوج
سامية: شدراني فيهم كل يوم يتظاربون هذا فهود مب راعي عرس انا ما ادري ليش عرس
ام سعيد: عيب عليج تقولين هذا الكلام عن اخوج
سامية: انا ما قلت شي غلط بعدين هذي حصة ما تليقله هو يباله وحدة تقدر تتحمله
ام سعيد: والله انا ما اعرف انتي منو يعيبج
سامية: ما حد .
ام سعيد: يعني ما في بنت عندكم بالجامعة تصلح لاخوج سعيد
سامية: وع لا ما في . الوحيدة اللي تصلحه هي هدى وخلاص بتعرس عقب شهر. بعدين يمى سعيد هذا شيخ يبي وحدة مثله و ما ظنتي نلاقي .
ام سعيد: ليش هو يبي يعرس , هو مب راظي اتكلم بالسالفة وياه
سامية: عيل خلاص ريحي عمرج
ام سعيد: 32 سنه عمره ليمتى يعني
دخلت حصة المجلس
ام سعيد: تعالي يمى يلسي ابيج بسالفة
حصة : خير خالتي
ام سعيد: انتي و ريلج متظاربين
حصة: لا خالتي
ام سعيد: لا تخبين علي ا ذا في شي علميني يمى
حصة: ما في شي خالتي
ام سعيد: عيل هو وينه في
حصة: سار العرس
ام سعيد: انزين علميني انتو متظايجين من جناحكم تبون واحد ثاني او يمكن تبوون بيت بروحكم
حصة: خالتي انا وايد مرتاحة ومب قاصرني شي
ام سعيد: انزين مثل ما تبين


في منزل ابو محمد
ام محمد: شما قومي يمى شوفي خالتج وينها
شما: انشالله يدتي
منال: اقول يمى متى العرس
ام محمد: سالم يبيه عقب اسبوعين بس اختج تبيه عقب شهر
منال: معاها حق يبالها وقت لين تخلص امتحانات و تزهب عمرها
دخلت شما مع خالتها هدى الى المجلس
هدى: خير يمى في شي
ام محمد: خالتج ام سالم اتصلت فيج
هدى: خير يمى
ام محمد: ولا شي بس تبي تشوف اذا محتاية شي او ناقصج شي
منال: فيها الخير والله. يمى شما و ين اختج
شما: تتكلم على التليفون
منال: مع منو
شما: مع حبيب القلب
منال: شو
شما: هههههههه شفيج يمة اتغشمر معاج تتكلم مع خالي احمد
منال: و شتبي فيه
شما: ما اعرف يوم تي ساليها
هدى: شما سيري يبيلي ماي
شما: لا والله اصغر عيالج انا
هدى: انا خالتج
شما: هيه خالتي واكبر عني بسنه وحدة بس
منال: شما شفيج
شما: يمى لعوزتني كل كلمة جان تقولي انا خالتج وانا خالتج
ام محمد: ههههه
شما : يدتي انا ما ادري انتي ليش يبتيها
ام محمد: عسب تلعوزنا اخر عمرنا انا و يدج
هدى: الحين انا العوزكم انزين يام محمد . لين يرد ابو محمد هو اللي بياخذ بحقي
منال: والله انا ما اعرف انتي شلون بتعرسين وانتي بعدج تتصرفين مثل اليهال. انا يوم عرست جان عمري 16 سنه ويبت خليفة وانا 17 سنه
هدى: هذا اول الحين غير
منال: شقصدج هذا اول . يا ماما انا بعدني صغيرة
هدى: عندج بنات مثل هالبنات و تقولين بعدج صغيرة
منال: فهذي معاج حق و الله يمى اللي يشوف خليفة ما يصدق اني امه
ام محمد: فديته و الله متى بيرد كم لندن
شما: اكيد من يابو طاري خليفة يدتي تنسى العالم كله
ام محمد: يمى والله كلكم لكم معزة عندي بس خليفة هذا اول حفيد بعدين يكفي انه باسم الغالي
دخلت دانة المجلس
دانة: أي غالي
ام محمد: يدج
دانة: يدتي بعدج تحبينه مثل قبل
ام محمد: شهل لكلام اكيد احبه مب ريلي . وبعدين عمره ما قصر علي بشي
منال: انتي شتبين بخالج احمد تكلمينه
دانة: ليش ممنوع اكلمه
منال: لا ما قلت ممنوع بس شتبين فيه
دانة: وحدة تحب خالها و تكمله انتي ليش زعلانة
منال: و بعدين معاج نفسي اسالج سؤال و تردين بدون مقدمات
دانة: السالفة يا طويلة العمر ان يدي و خالي محمد يتصلون فيه يبونه يسير عرس سيف ناصر وهو ما يبي
منال: انزين وانتي شلج
دانة: ما شي بس قاعد يكلمني عن معاناته في بيت خالي من الديموقراطية
ام محمد: صدج انه قليل حيى و ليش ما يبي يسير
دانه: الظاهر ان غرشوبته مب راظيه عليه
منال: شباب اخر زمن والله . دانة قومي سيري البيت يلا
دانة: ليش يمى
منال: جنج ناسية انج ثانوية السنه سيري درسي
دانة: انزين خلاص بسير بسير


في منزل ابو سعود
ام سعود: شفيه سعود له جمن يوم مب طبيعي
حمدة: ما ااعرف وانا حسيت بعد انه مب طبيعي
ام سعود: يا خوفي يكون في مشكلة وهو مب راظي يتكلم
حمدة: يمى عيني خير
ام سعود: ابوج مب ناقص مشكلة يديدة اللي فيه مكفيه . والله انه كل يوم يرد البيت تعبان و مب قادر يتكلم . ابوج كبر يمى واللي كان يقدر يسويه زمان ما يقدر يسويه الحين
حمدة: يمى شكثر باقي من فلوس القرض
ام سعود: وايد يمى اكثر من 100 الف
حمدة: يمى انا بدور على شغل
ام سعود: شو بتشتغلين وانتي بعدج تدرسين
حمدة: ما ااعرف بخلي منى تشوف لي شغل مثل شغلها . يعني جي ادرس بنات انجليزي او كمبيوتر
ام سعود: و شخبارها هذي المسكينة و الله انها غامظتني بعدها 19 سنه و متحملة هم عايلة
حمدة: تدرين يمى انها دايما تتغشمر و تظحك و ما يوم شفتها تتذمر و اللي يشوفها يقول هذي ما عندها هموم بالدنيا
ام سعود: والله يا بنيتي لو كانت حالتنا احسن جان ساعدناهم بس مثل ما تشوفين
حمدة: الله موجود يمى ما ينسى عباده


في منزل ابو فارس
منى: وبعدين معاج انا كم مرة قلتلج لا تقومين من مكانج الله يخليج ما نبيج تتعبين مرة ثانية
ام فارس: يمى الحين انا ازهب العشى ما فيها شي
منى: انا بزهب الغشى ماله داعي انتي تقومين
ام فارس: شخبار حمدة و ام سعود
منى: بخير يمى يسلمون عليج
ام فارس: الله يسلمهم اقول يمى فارس اخوج له يومين متظايح ومب راظي يتكلم شوالسالفة
منى: فارس زعلان عسب اني اسير ادرس بالمعهد يقول انه ماله داعي اسير . يكفي الطلاب اللي يوني البيت
ام فارس: انزين يمى اخوج كبر 15 سنه الحين ويبي يكون ريال البيت
منى: يمى فارس مب قادر يفهم ان احن محتاجين لكل فلس عسب نصرف على البيت و ندفع القرض . وانا يمى افكر اني اهد الجامعة بعد
ام فارس: بس انتي خلصتي سنتين
منى : و باقيلي سنتين يمى
ام فارس: يمى عمج قال انه بيدفع جزء كبير من القرض
منى: يمى عمي الله يعينه من وين بييب فلوس و هو عنده عيلة شكبرها وبعدين لو دفع القرض . لازم نرد له يعني بيكون دين بعد


في شركة خليفة للمقاولات
محمد: ها بشر
داود: عرفنا من هو
محمد: شتنطر تكلم
داود: اسمه سعود عبدالله . محاسب بقسم المحاسبة
محمد: وشلون عرفتوه
داود: تتبعنا اللي سواه في نظام الشركة لمدة اسبوع . بصراحة احن كنا شاكين فيه لانه وايد خبير بالكمبيوتر
محمد: وينه ابي اشوفه
داود: الحين ساعة غدى
محمد: انزين اتصل بقسمه و اسالهم وينه
داود: انشالله
خرج داود من المكتب و اتصل محمد بسعيد
محمد: خلاص يا سعيد مسكوه
سعيد: واخيرا انزين كلمت الشرطة
محمد: لا بعدني
سعيد: وشتنطر
محمد: لازم اشوفه و كلمه بالاول
سعيد: انت على شو ناوي
محمد: ما اعرف بس احس اني ابي اشوف هذا اللي سرق مني فلوسي


في جامعة زايد
حمدة: انزين انا بسير الحين
منى: وين
حمدة: سعود عازمني على الغدى
منى: يا حظج ليت عندي اخو عود يعزمني على الغدى
حمدة: تعالي ويانا
منى: لا شو بكون رزة سيري انتي
حمدة: ما فيها شي
منى: سيري سيري الله معاج


في شركة المقاولات
محمد وداود خارجان من مبنى الشركة باتجاه سياراتهم
داود: استاذ محمد هذا هو سعود
نظر محمد باتجاه سعود
محمد: أي واحد
داود: هذا اللي نزل من السيارة و ساير للمطعم
محمد: هذا اللي لابس سفرة بيج
داود: هيه
ولكن محمد لم يكن ينظر الى سعود بل الى الفتاة التي تمشي معه باتجاه المطعم
محمد.....مين هذي الماشية وياه
محمد: هذي حرمته
داود: لا هو مب معرس
كان محمد ينظر الى حمدة و للحظة نسي سعود و داود و كل شيء و ظل ينظر اليهم الى ان دخلو الى المطعم
محمد: تعال
داود: وين
محمد: انت بس تعال
مشى محمد باتجاه المطعم وهما بالطريق
محمد: الحين بندش المطعم وابيك تعرفني عليه
داود باستغراب: اعرفك عليه
محمد: هيه بنسوي اعمارنا ما عارفين انه هني , وانت بتسلم عليه وعقب عرفني عليه
داود وهو لا يفهم ما يحصل: مثل ما تبي
كان محمد لا يعرف ما يحصل معه بمجرد ان راى حمدة نسي ما فعله سعود . كان يرغب بشيء واحد ان يتاكد من هذه الفتاة ليست مرتبطة
دخلا المطعم وما ان اقتربا من الطاولة التي يجلس عليها سعود وحمدة
داود: هلا سعود شحالك
سعود: هلا داود
داود: اعرفك على الاستاذ محمد خليفة
ارتبك سعود . فهذا هو محمد خليفة الذي سرق منه
سعود وهو يقف: هلا استاذ محمد
لكن محمد كان في عالم اخر وهو يرى حمدة. لم يفهم ما حصل له فهو لم يعجب بفتاة هكذا رغم انه راى فتيات كثيرات ولكن هناك كا يميز هذه الفتاة فرغم انها كانت محجبة ولا تظهر منها شعرة واحدة ولكنها كانت جميلة وربما ما يميزها هو الخجل و الوقار الذي فيها
محمد: اهلين . انت تشتغل عندنا
سعود: انا بقسم المحاسبة
محمد: اها يا هلا . عن اذنكم ما نبي نزعجكم
مشى محمد وجلس على طاولة مقابل طاولة سعود وحمدة بحيث يتمكن من رؤية حمدة
وتبعه داود الذي كان مذهولا من طريقة معاملة محمد لسعود فهو توقع ان يتشاجر محمد مع سعود او يفضحه ولكنه تكلم معه هدوء