إذا جاك الضابط لا تعابط

على طاري السياره ذاك اليوم طالع في السيارة وماشي في أمان الله وكنت رايح الاستراحه وفجأه لقيت تفتيش بالطريق ولقيت الشرطي اللي يفتش ماله خلق من كثرة العالم وبس يأشر بيده يعني انقلعوا .. المهم يوم جاء دوري وأمر من عنده ورفعت يدي اسلم عليه .. وبحسن نيه مشيت ولا ادري هو رد السلام ولا لا بس الاكيد اني ما تعديت التفتيش بـ 500 متر ألا ودورية الشرطه تمشي وراي وتقول وقف ياراعي التايوتا ((طايحه من عينهم اللكزس خخخ))


وقفت على جنب ونزلت وطلبوا مني اثباتي وعطيتهم قالي الشرطي : اركب الدوريه
قلت : ليش وش انا مسوي؟
قال: انت ما تستحي يومنك تمر من عند الشرطي اللي يفتش وتسوي له حركه وصخه بيدك انت شكلك ماتربيت بغض النظر أن هذا رجل دوله أنت شلون تسمح لنفسك تسوي الحركه الوصخه هاذي؟؟
قلت: اقول استريح بس والله انك اخذتني بشراع وميداف (( وجه الصلال مايدري وش السالفه )) وبعدين تعال ياوكيل عريف أنت منهو اللي قالك أن السلام حركه وصخه بالعكس السلام حركه نظيفه خخخ
قالي الشرطي: لا تستخف دمك تراك تتكلم مع رجل دوله
قلت له : يعني وانا اللي من العدو الحين .. كل الشعب رجال دوله وكلنا في خدمة الدوله الله يحييك
وبعدها قالي: خل عنك البربره واسكت ولا اسمع لك ولا كلمه واركب الدوريه برضاك لا اطلب تعزيز يركبونك بالقوه ويخلون اللي مايشتري يتفرج (( حتى اللي يشتري يبي يتفرج اصلن اذا صار حادث بخريص الدايري يصير زحمه .. مباراه ماهوب حادث )) الا صدق ليه ما يخلون اللي يبغى يتفرج على الحادث يدفع فلوس والعائد يصير للمتضرر وبكذا نقدر نساهم في أن وقفتنا وتجمهرنا عند الحوادث بتصير على سنع


دخلت مركز الشرطه وبالأمانه كان وسيع وشرح وريحته ترد الروح .. دخلوني صالة الانتظار (( وش سنعهم الكويتيين يسمونه النظاره وحنا نسميه التوقيف الا صالة الانتظار دام الاسامي ببلاش )) والمجرمين والاوباش والحراميه واللصوص والبنقاليه كانت وجيهم سمحه وفيها وقار


المهم الجزء حق الوقت اللي قضيته في صالة الانتظار ماقدر اتكلم عنه لأن الستر زين ورجاء لا اسمع أحد يتشمت لأن كل واحد دخل الغرفه هاذي او بيدخل الغرفه بيحصل له زي ماحصل للجميع تهي تهي


وفي المرحله الثالثه زفوني الشرطه ودخلوني على الضابط والشهاده لله كان الضابط وسيم وجميل وبنفس الوقت جسمه مصبوب صب تقول اندر تيكر
استقبلني الضابط بكل حفاوه وتكريم وقالي: تفضل استريح جلست وحطيت رجل على رجل (( عشان الدوالي خخخ ))
قالي الضابط الوسيم: وش تشرب طال عمرك؟
قلت: ستروبري جوس وذ كريم
المهم مادريت الا الطفايه الذهبيه اللي كانت على المكتب الا وهي لازقتن في جبهتي وقال: اجل ستروبري وحياة أمك >> شكل الضابط هذا امه مصريه لآني شميت ريحة ثوم وبعدين شعره فيه شوية شقار


شوي الا الدمعه طلعت من عيني غصب عجزت امسكها ويكون في علمكم دموعي ماتطلع الا بالمواقف الجباره يعني يوم كنت في صالة الانتظار مانزلت مني ولا دمعه ولا حتى حتى تنهيده ولا حتى ونه ولا حنه وهذا دليل على قوة باسي .. بس للاسف طفاية الضابط الوسيم والكفوف والبقوس والركب اللي عطانياها خلتني افقد شوي من باسي وادنها بتسوه >> بكاء لغير الناطقين فيها


جلست على الكرسي وسكرت رجولي وضميت ركبي على بعض وحطيت كفوفي على عيوني وقمت اشاهق مشاهق ما جاء على البال ولا على الخاطر خصوصن انه ضربني ضرب مبرح
وقالي: شلون حتة كلب مثلك يسوي حركه وصخه بايدوه للعسكري (( ماقلت لكم ولد مصريه )) المهم لما شافني الضابط الوسيم بالوضع المحزن اللي انا فيه قرب مني وحط يده على راسي وقال: بس خلاص .. بس بأأ .. حقك علي ماكنتش أأصد يا رجال >> رجال هههه صدقت انك سعودي يالدافور


طلع حونين هالضابط الوسيم وبعد ماسمع مشاهقي ومماطقي حن علي والمسيكين قامت براطمه تروح وتجي المشكله انه قهرني كل هالجسم وكل هالزنود والفخوذ والصدور ولا ساديا وكل هالتكفيخ والركب والسوبليكسات وماصدق على الله وسمع مشاهق الا دميعته طايحه على خده يا حبي له بس ابو فتحي


طلعت من مركز الشرطه بنفس الحفاوه والتكريم اللي استقبلوني فيه وركبت سيارتي واتجهت للاستراحه اللي كنت رايح لها بس ماعلمت أحد باللي صار لأن خبركم عندنا عيال زغطه في استراحه كل يوم عندهم واحد هو الحلقه الاضعف وكنت مجتهد بالاسابيع اللي راحت ماكون أنا الحلقه الاضعف بس ماجت الرياح زي ما تبي السفونوا >> اجل ماهو كذا


مايستفاد من الخنبقه

1- لا ترفع يدك الا وانت متاكد انها مرفوعه زين

2- شرطتنا حبوبين وحلوين وحونينين بس اعذروهم شوي عملهم شاق

3- الضابط الوسيم ظاهره صحيه

4- المجرم سلاحه دمعته >> تراه مايقصد السحالي